തിരൂരങ്ങാടി താലൂക്ക് ആശുപത്രിയില്‍ അമ്മയോടൊപ്പമെത്തിയ രണ്ടര വയസ്സുള്ള കുട്ടിയുടെ കുഞ്ഞിന്റെ മാല കവര്‍ന്നു. തിരൂരങ്ങാടി എന്‍ കെ റോഡിലെ കളരിക്കല്‍ സനലിന്റെയും വിജിയുടെയും കുട്ടിയുടെ ഒരു പവന്റെ മാലയാണ് കവര്‍ന്നത്. ആശുപത്രിയിലെ സിസിടിവിയില്‍ രണ്ടു സ്ത്രീകള്‍ മാല കവരാന്‍ ശ്രമിക്കുന്നതിന്റെ ദൃശ്യങ്ങള്‍ പതിഞ്ഞിട്ടുണ്ട്. ബുധനാഴ്ച രാവിലെ 11.45-ന് അടുപ്പിച്ചാണ് സംഭവം.

കുട്ടിയെ ഡോക്ടറെ കാണിക്കാനായി, വിജി ഒപി ടിക്കറ്റെടുക്കാന്‍ വരിനില്‍ക്കുമ്പോള്‍ ചുരിദാര്‍ ധരിച്ച യുവതിയും സാരി ധരിച്ച സ്ത്രീയും ചേര്‍ന്ന് കുട്ടിയുടെ കഴുത്തില്‍നിന്നു മാല പൊട്ടിക്കാന്‍ ശ്രമിക്കുകയായിരുന്നു. ഷാള്‍ കൊണ്ട് കൈ മറച്ച് കുട്ടിയുടെ കഴുത്തില്‍നിന്ന് മാല പൊട്ടിച്ചെങ്കിലും കുട്ടി തിരിഞ്ഞുനോക്കിയതിനാല്‍ അവര്‍ക്കത് എടുക്കാന്‍ കഴിഞ്ഞില്ല. കുഞ്ഞിന്റെ മാല പൊട്ടിക്കിടക്കുന്നത് ശ്രദ്ധയില്‍പെട്ട മാതാവ് വിജി അതെടുത്ത് ബാഗിലിട്ടു.

പിന്നീട് ഡോക്ടറെ കണ്ട് തിരിച്ച് വീട്ടിലെത്തി നോക്കിയപ്പോഴാണ് ബാഗില്‍നിന്ന് മാല നഷ്ടപ്പെട്ടതായി അറിയുന്നത്. മാല പൊട്ടിച്ച സ്ത്രീകള്‍ തന്നെ വീണ്ടും അടുത്തുകൂടി ബാഗില്‍നിന്ന് മാല കവര്‍ന്നെന്നാണു കരുതുന്നത്. ആശുപത്രി അധികൃതരും സനലും പൊലീസില്‍ പരാതി നല്‍കി. ഒപി ടിക്കറ്റിന് തിരക്ക് കുറഞ്ഞ സമയമായിട്ടും കവര്‍ച്ച നടത്താന്‍ കഴിഞ്ഞതിനാല്‍ സ്ഥിരം മോഷ്ടാക്കളാണെന്നാണ് സംശയിക്കുന്നത്.