കന്യാസ്ത്രീകളുടെ സമരം സി.പി.എമ്മിലെ ആഭ്യന്തരയുദ്ധമായി വളര്‍ന്നു. സമരം തുടങ്ങിയ നാള്‍ മുതല്‍ പിന്തുണയുമായി രംഗത്തെത്തിയ വി.എസ് ഇന്ന് തന്റെ ഗ്രൂപ്പിലെ സജീവസാനിധ്യമായ മന്ത്രി മേഴ്‌സിക്കുട്ടിയമ്മയെ കളത്തിലിറക്കിയാണ് പാര്‍ട്ടി സെക്രട്ടറി കോടിയേരി ബാലകൃഷ്ണന് മറുപടി നല്‍കിയത്. ഇന്നലത്തെ പ്രസ്താവനയ്ക്ക് പിന്നാലെ ഇന്ന് വീണ്ടും കോടിയേരി കന്യാസ്ത്രീകളുടെ സമരത്തിനെതിരെ ഇന്നും തിരിഞ്ഞതോടെ മന്ത്രി ഇ.പി ജയരാജനും രംഗത്തെത്തി. സി.പി.എമ്മിന്റെ സമീപകാല ചരിത്രത്തിലൊന്നും പാര്‍ട്ടി സെക്രട്ടറിയെ തള്ളി മന്ത്രിമാര്‍ രംഗത്ത് വന്നിട്ടില്ല. പിണറായി സെക്രട്ടറിയായിരുന്ന കാലത്ത് വി.എസ് പലതും തുറന്നടിച്ചിട്ടുണ്ടെങ്കിലും അദ്ദേഹം മുതിര്‍ന്ന നേതാവായിരുന്നു. 

സര്‍ക്കാര്‍ കന്യാസ്ത്രീകള്‍ക്കൊപ്പമാണെന്നും ഇരയുടെ കൂടെയാണെന്നും ക്യാബിനെറ്റിന്റെ അധ്യക്ഷന്‍ കൂടിയായ മന്ത്രി ഇ.പി ജയരാജന്‍ വ്യക്തമാക്കി. അന്വേഷണം ശരിയായ ദിശയില്‍ നടക്കുന്നുണ്ട്. തെറ്റ് ചെയ്തവരെ നിയമത്തിന്റെ മുന്നില്‍ കൊണ്ടുവരും. കോടിയേരിയുടെ നിലപാട് അദ്ദേഹത്തിനോട് ചോദിക്കണമെന്നും ഇപി ജയരാജന്‍ പറഞ്ഞു. കന്യാസ്ത്രീകളുടെ സമരത്തിന് പിന്നില്‍ വര്‍ഗീയ ശക്തികളല്ലെന്നും നീതികിട്ടാന്‍ വേണ്ടിയാണ് കന്യാസ്ത്രീകള്‍ സമരം നടത്തുന്നതെന്നും മന്ത്രി മേഴ്‌സിക്കുട്ടിയമ്മ. സഭയ്‌ക്കെതിരല്ല സമരം. സമരം ചെയ്യാന്‍ കന്യാസ്ത്രീകള്‍ക്ക് അവകാശമുണ്ടെന്നും മേഴ്‌സിക്കുട്ടിയമ്മ വ്യക്തമാക്കി. കന്യാസ്ത്രീകളുടെ സമരകോലാഹലത്തിന് പിന്നില്‍ ദുരുദ്ദേശ്യമുണ്ടെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ഇന്നലെ വ്യക്തമാക്കിയിരുന്നു. ഇതിനെ തള്ളിയാണ് ഇന്ന് മേഴ്‌സിക്കുട്ടിയമ്മ രംഗത്തെത്തിയത്. സഭയുമായി ഏറെ അടുപ്പമുള്ളയാളാണ് മന്ത്രി മേഴ്‌സിക്കുട്ടിയമ്മ എന്നതും ശ്രദ്ധേയമാണ്. 

കന്യാസ്ത്രീകളുടെ സമരത്തിന് പിന്നില്‍ ദുരിദ്ദേശ്യമുണ്ടെന്ന് ഇന്നലെ പറഞ്ഞ കോടിയേരി ഇന്ന് സമരത്തിന് പിന്നില്‍ വര്‍ഗീയ ശക്തികളാണെന്ന് ആഞ്ഞടിട്ടു. ഇതോടെയാണ് സര്‍ക്കാര്‍ പ്രതിരോധവുമായി രംഗത്തെത്തിയത്. ഇതോടെ പാര്‍ട്ടിയും സര്‍ക്കാരും രണ്ട് തട്ടിലാണെന്ന് വ്യക്തമായി. മുഖ്യമന്ത്രി പിണറായി വിജയന്‍ അമേരിക്കയില്‍ പോയതോടെ പാര്‍ട്ടിയിലും സര്‍ക്കാരിലുമുള്ള ഭിന്നത മറനീക്കിവരുകയായിരുന്നു. തന്നെ മന്ത്രിപദത്തില്‍ നിന്ന് ആദ്യം ഇറക്കിവിട്ടതിന് പിന്നില്‍ കോടിയേരിയുടെ കരങ്ങളുണ്ടെന്ന് ഇ.പിക്ക് വ്യക്തമായി അറിയാം. കണ്ണൂരിലെ ജയരാജന്‍മാര്‍ തമ്മിലുള്ള ഐക്യം തകര്‍ന്നിട്ട് കുറേയായി. അതിന്റെ പ്രതിഫലനമാണ് ഇ.പി ഇന്ന് കോടിയേരിയെ പരസ്യമായി തള്ളിപ്പറഞ്ഞതിന് പിന്നില്‍. 

പി.ബി അംഗം ബൃന്ദകാരാട്ട് മാത്രമാണ് ഇതുവരെ കന്യാസ്ത്രീകളെ പിന്തുണച്ച ഏക സി.പി.എം വനിതാ നേതാവ്. അതിന് പിന്നാലെയാണ് ഇപ്പോള്‍ മേഴ്‌സിക്കുട്ടിയമ്മയും രംഗത്തെത്തിയത്. ജനാധിപത്യമഹിളാ അസോസിയേഷന്‍ നേതാക്കളടക്കം ആരും ഇതുവരെ കന്യാസ്ത്രീകളുടെ സമരപ്പന്തലില്‍ എത്തിയിട്ടില്ല. യു.ഡി.എഫ് സര്‍ക്കാരിന്റെ കാലത്ത് നടന്ന സ്ത്രീപീഡനക്കേസുകളില്‍ ശക്തമായ നിലപാട് സ്വീകരിച്ച തങ്ങളെ സ്വതന്ത്രമായി പ്രവര്‍ത്തിക്കാന്‍ അനുവദിക്കാത്തതില്‍ ജനാധിപത്യമഹിളാ അസോസിയേഷനിലെ പല നേതാക്കള്‍ക്കും പരാതിയുണ്ട്.