അരമനയിലെ ആഢംബരത്തില്‍ നിന്ന് തടവറയിലെ തറയിലേക്ക് ബിഷപ്പ് ഫ്രാങ്കോ മുളയ്ക്കല്‍, രാജ്യത്ത് ആദ്യമായാണ് ഒരു ബിഷപ്പ് ബലാല്‍സംഗക്കേസില്‍ അറസ്റ്റിലാകുന്നത് , നീതി തേടി കന്യാസ്ത്രീകള്‍ തെരുവിലിറങ്ങി എന്ന പ്രത്യേകതയും ഈ കേസിനുണ്ട്
അരമനയിലെ ആഢംബര ജീവിതത്തില്‍ നിന്ന് തടവറയിലെ തറയില്‍ ഇരുന്നും കിടന്നും ബിഷപ്പ് ഫ്രാങ്കോ മുളയ്ക്കല്‍ ദിനരാത്രങ്ങള്‍ തള്ളിനീക്കേണ്ട അവസ്ഥയിലായി. പരാതിക്കാരിയേയും അവരുടെ കുടുംബത്തെയും അവര്‍ക്കൊപ്പം നിന്നവരെയും ഭീഷണിപ്പെടുത്തിയും സ്വാധീനിക്കാന്‍ ശ്രമിച്ചും അവര്‍ക്കെതിരെ കേസുകള്‍ കൊടുത്തും പ്രതിരോധം തീര്‍ത്ത ബിഷപ്പിന്റെ ആവനാഴിയിലെ ആയുധങ്ങള്‍ അന്വേഷണസംഘത്തിന് മുന്നില്‍ തകര്‍ന്നടിഞ്ഞു. മൂന്ന് ദിവസങ്ങളിലായി 18 മണിക്കൂറോളം ബിഷപ്പിനെ ചോദ്യം ചെയ്തു. രണ്ടാംദിവസം മുതലാണ് ബിഷപ്പിന്റെ പ്രതിരോധങ്ങള്‍ക്ക് ശക്തിയില്ലാതായത്. അതോടെ തനിക്കൊന്നും അറിയില്ലെന്നും ഓര്‍മയില്ലെന്നും പറഞ്ഞൊഴിയുകയായിരുന്നു ബിഷപ്പ്.
2014 മുതല്‍ 2016 വരെ പരാതിക്കാരിയായ കന്യാസ്ത്രീയെ 13 തവണയാണ് ബിഷപ്പ് ബലാല്‍സംഗം ചെയ്തതെന്ന് പൊലീസിന് നല്‍കിയ പരാതിയില്‍ പറയുന്നു. വൈക്കം കോടതിയില്‍ ഹാജരാക്കുന്ന ബിഷപ്പിനെ റിമാന്‍ഡ് ചെയ്യും. തുടര്‍ന്ന് രണ്ട് ദിവസത്തേക്ക് കസ്റ്റഡിയില്‍ വേണമെന്ന് ആവശ്യപ്പെട്ട് പൊലീസ് അപേക്ഷ നല്‍കും. അറസ്റ്റിന് മുമ്പ് ബിഷപ്പിന്റെ അഭിഭാഷകനെയും ബന്ധുക്കളെയും പരാതിക്കാരിയേയും പൊലീസ് വിവരം അറിയിച്ചു. ബിഷപ്പിനെതിരായ കേസ് വ്യക്തിപരമായതിനാല്‍ കക്ഷിചേരില്ലെന്ന് മിഷണറീസ് ഓഫ് ജീസസും അറിയിച്ചിരുന്നു. അറസ്റ്റ് സംബന്ധിച്ച് ഉചിതമായ തീരുമാനം എടുക്കാമെന്ന് ഡി.ജി.പി ലോക്‌നാഥ് ബഹ്‌റ ഇന്നലെ അറിയിച്ചിരുന്നു.
അറസ്റ്റിന് മുന്നോടിയായി ജലന്ദര്‍ പൊലീസിനെ കേരളാ പൊലീസ് വിവരങ്ങള്‍ അറിയിച്ചു. തുടര്‍ന്ന് ബിഷപ്പിന്റെ അഭിഭാഷകന്‍ ബന്ധുക്കളെ ജാമ്യക്കാരാക്കി ജാമ്യാപേക്ഷ തയ്യാറാക്കി. മജിസ്‌ട്രേട്ടിന്റെ മുന്നില്‍ ഹാജരാക്കിയ ശേഷമായിരിക്കും ജാമ്യാപേക്ഷ സമര്‍പ്പിക്കുക. സാധാരണ ഗതിയില്‍ ബലാല്‍സംഗക്കേസില്‍ ജാമ്യംകിട്ടാന്‍ സാധ്യതയില്ല. അതുകൊണ്ടാണ് ഇതുവരെ മുന്‍കൂര്‍ ജാമ്യാപേക്ഷ നല്‍കാതിരുന്നത്. ഔദ്യോഗികമായി അറസ്റ്റ് രേഖപ്പെടുത്തുന്നതിന് മുമ്പായി ചില നടപടിക്രമങ്ങള്‍ പൂര്‍ത്തിയാക്കാനുണ്ട്. അതിന് മുന്നോടിയായി ബിഷപ്പിനെ ചോദ്യംചെയ്യല്‍ മുറിയില്‍ നിന്ന് മറ്റൊരു മുറിയിലേക്ക് മാറ്റി. അറസ്റ്റ് വിവരം അന്വേഷണ ഉദ്യോഗസ്ഥനായ വൈക്കം ഡിവൈ.എസ്.പിയാണ് ബിഷപ്പിനെ അറിയിച്ചത്.
സാക്ഷിമൊഴികളും സാഹചര്യത്തെളിവുകളും രേഖകളും പരിശോധിച്ച ശേഷമായിരുന്നു അറസ്റ്റ്. സാധാരണഗതിയില്‍ ഇരയുടെ മൊഴിമാത്രം മതി അറസ്റ്റിന്. എന്നാല്‍ ബിഷപ്പിനെ പോലെ ഒരു ഉന്നതെ അറസ്റ്റ് ചെയ്യുമ്പോള്‍ പഴുതടച്ച് വേണമെന്ന് അന്വേഷണ സംഘത്തിന് നിര്‍ബന്ധം ഉണ്ടായിരുന്നു. കാരണം കോടതിയില്‍ കേസ് വരുമ്പോള്‍ പൊലീസിന് തിരിച്ചടിയാകരുത്. അതോടെയാണ് പരാതിക്കാരിയുടെ രഹസ്യമൊഴി കൂടി കണക്കിലെടുത്ത് അറസ്റ്റിന് തീരുമാനിച്ചത്. അറസ്റ്റിന് രാഷ്ട്രീയ തീരുമാനം ഇന്നലെ ലഭിച്ചിരുന്നു. അറസ്റ്റ് ഒഴിവാക്കാനൊക്കാത്ത സാഹചര്യമാണെന്ന് സര്‍ക്കാരിനെ പൊലീസ് അറിയിച്ചിരുന്നു.
https://www.facebook.com/Malayalivartha
