ശബരിമലയില്‍ സ്ത്രീകള്‍ക്ക് നിയന്ത്രണം ഏര്‍പ്പെടുത്തിയത് സുപ്രീംകോടതി റദ്ദാക്കിയത് ആചാരങ്ങള്‍ക്കേറ്റ തിരിച്ചടിയാണെന്ന് തന്ത്രി കണ്ഠര് രാജീവര്. നിരാശാജനകമാണെങ്കിലും വിധി അംഗീകരിക്കുന്നു. ക്ഷേത്രം പിന്തുടര്‍ന്നിരുന്ന പഴയനിലപാട് തുടരണമെന്ന് ആഗ്രഹിച്ചിരുന്നു. എന്നാല്‍ തുടര്‍നടപടികള്‍ക്ക് ഇനി സാധ്യതയുണ്ടെന്ന് കരുതുന്നില്ല. സ്ത്രീകളെ ഈ സീസണില്‍ തന്നെ പ്രവേശിപ്പിക്കണമോ എന്ന് തീരുമാനിക്കേണ്ടത് ദേവസ്വം ബോര്‍ഡാണ്. ഇത് സംബന്ധിച്ച പ്രായോഗിക ബുദ്ധിമുട്ടുകള്‍ ഇപ്പോള്‍ പറയാനാവില്ല. പഠിച്ചിട്ട് പ്രതികാരിക്കാമെന്നും തന്ത്രി വ്യക്തമാക്കി. വിധി നിരാശാ ജനകമാണെന്ന് പന്തളം രാജകൊട്ടാരം അധികൃതരും ്അറിയിച്ചു. കോടതി വിധിക്കെതിരെ അപ്പീല്‍ പോകുന്ന കാര്യം പരിഗണിക്കുമെന്നും കൊട്ടാരം അധികൃതര്‍ പറഞ്ഞു. 

സുപ്രീംകോടതി വിധി ദൂരവ്യാപകമായ പ്രത്യാഘാതങ്ങളുണ്ടാക്കുമെന്ന് യോഗക്ഷേമസഭ നേതാവ് അക്കീരമണ്‍ കാളിദാസ ഭട്ടതിരിപ്പാട് വ്യക്തമാക്കി. വിധി നിരാശാജനകമാണ്. ആചാരപരമായ കാര്യങ്ങളും മതപരമായ വിഷയങ്ങളും കോടതി പരിഗണിക്കണമായിരുന്നെന്നും അദ്ദേഹം പറഞ്ഞു. വിധിക്കെതിരെ അപ്പീല്‍ പോകുമെന്ന് മുന്‍ ദേവസ്വംബോര്‍ഡ് അംഗവും കോണ്‍ഗ്രസ് നേതാവുമായ അജയ് തറയില്‍ അഭിപ്രായപ്പെട്ടു. അതേസമയം ബി.ജെ.പി സംസ്ഥാനഘടകം വിധിയെ സ്വാഗതം ചെയ്തു. ആര്‍.എസ്.എസ് വിധി വരുന്നതിന് മുമ്പേ തന്നെ സ്ത്രീ നിയന്ത്രണം എടുത്ത്കളയണമെന്ന് വ്യക്തമാക്കിയിരുന്നു. 

സംസ്ഥാനത്തിന്റെ വിവിധ ഭാഗങ്ങളിലുള്ള സ്ത്രീകള്‍ വ്യത്യസ്തമായ അഭിപ്രായമാണ് ഇക്കാര്യത്തില്‍ സ്വീകരിച്ചിരിക്കുന്നത്. പുതുതലമുറയിലെ പെണ്‍കുട്ടികള്‍ പ്രവേശനത്തോട് യോജിക്കുമ്പോള്‍ മുപ്പത് വയസിന് മുകളിലുള്ള ഭൂരിപക്ഷം സ്ത്രീകളും നിലവിലുള്ള ആചാരം തുടരണമെന്നാണ് പറയുന്നത്. എന്നാല്‍ തമിഴ്‌നാട്ടില്‍ നിന്നും ആന്ധ്രയില്‍ നിന്നും ധാരാളം സ്ത്രീകള്‍ എത്തുമെന്ന കാര്യത്തില്‍ സംശയമില്ല. കുറേ വര്‍ഷങ്ങളായി വേഷം മാറിയും മറ്റും ഈ സംസ്ഥാനങ്ങളില്‍ നിന്ന് യുവതികള്‍ ശബരിമല ദര്‍ശനത്തിന് എത്താറുണ്ട്. ചിലരെ വനിതാ പൊലീസ് പമ്പയില്‍ തടഞ്ഞ സംഭവങ്ങളും ഉണ്ടായിട്ടുണ്ട്.