സൗദിയിലെ ജുബൈലിലുണ്ടായ വാഹനാപകടത്തിൽ പ്രവാസി മലയാളി മരണപ്പെട്ടു. ഖഫ്ജിക്ക്​ സമീപം റഫിയ്യയിൽ ടൊയോട്ട ഫോർച്യൂണർ വാഹനം മറിഞ്ഞുണ്ടായ അപകടത്തിൽ പാലക്കാട് മണ്ണാർക്കാട് മണലടി സ്വദേശി മുഹമ്മദലിയുടെ മകൻ ശിഹാബുദീനാണ്​ (25) മരിച്ചത്.

അപകടത്തിൽ ഒപ്പമുണ്ടായിരുന്ന ബന്ധുവിന്​ ഗുരുതരമായി പരിക്കേറ്റു. പരിക്കേറ്റ മണ്ണാർക്കാട് സ്വദേശി സുലൈമാ​ന്റെ മകൻ നൗഫലിനെ (30) ജുബൈൽ ജനറൽ ആശുപത്രി തീവ്രപരിചരണ വിഭാഗത്തിൽ പ്രവേശിപ്പിച്ചിരിക്കുകയാണ്.

റിയാദ്​ അസീസിയയിൽ താമസിക്കുന്ന ഇരുവരും കച്ചവട ആവശ്യാർത്ഥം പുലർച്ചെ നാലിനാണ്​ റിയാദിൽ നിന്ന്​ പുറപ്പെട്ടത്​. റിയാദിലുള്ള സുഹൃത്തുക്കൾ വിളിച്ചപ്പോൾ ഇരുവരുടെയും ഫോൺ ഒാഫായതിനാൽ സംശയം തോന്നി റിയാദ്​ ഖഫ്​ജി റൂട്ടിൽ പിന്നാലെ പോയി നടത്തിയ അന്വേഷണത്തിലാണ്​ അപകടത്തെ കുറിച്ചറിഞ്ഞത്​. തുടർന്ന്​ മറിഞ്ഞുകിടക്കുന്ന ഫോർച്യൂണറും കണ്ടെത്തി.

ശിഹാബുദ്ദീ​ൻ സംഭവസ്ഥലത്ത്​ തന്നെ മരിച്ചു. മൃതദേഹം റുമാഅ്​ ജനറൽ ആശുപത്രിയിൽ മോർച്ചറിയിലാണുള്ളത്​. തലക്ക് പരിക്കേറ്റ നൗഫൽ അപകടനില തരണം ചെയ്തിട്ടുണ്ടെന്ന് ആശുപത്രി അധികൃതർ പറഞ്ഞതായി കൂടെയുണ്ടായിരുന്ന ബന്ധുക്കൾ അറിയിച്ചു. നൗഫലി​ന്റെ സഹോദരൻ ജുബൈലിലേക്ക് പുറപ്പെട്ടിട്ടുണ്ട്. ശിഹാബുദ്ദീൻ അവിവാഹിതനാണ്​. ഖദീജയാണ്​ മാതാവ്​.