ശബരിമലയില്‍ യുവതികളെ പ്രവേശിപ്പിക്കാനുള്ള കോടതിവിധി തിടുക്കപ്പെട്ട് നടപ്പാക്കാന്‍ തയ്യാറായ മുഖ്യമന്ത്രി പിണറായി വിജയന്റെ തീരുമാനത്തിന് മുന്നില്‍ അയല്‍ സംസ്ഥാനങ്ങള്‍ മുട്ടുമടക്കിയില്ല. മണ്ഡലകാലത്തിന് മുന്നോടിയായി വിളിച്ചു ചേര്‍ത്ത അവലോകന യോഗത്തില്‍ ദേവസ്വം മന്ത്രിമാരെ അയയ്ക്കാതെ അവര്‍ തങ്ങളുടെ പ്രതിഷേധം അറിയിച്ചു. കോടതി വിധി നടപ്പാക്കുന്നത് സംബന്ധിച്ച്, നിയമപരമായി അയല്‍ സംസ്ഥാനങ്ങളുമായി ചര്‍ച്ച ചെയ്യേണ്ട ബാധ്യത സര്‍ക്കാരിനില്ലെങ്കിലും അനൗദ്യോഗികമായി ചര്‍ച്ച നടത്താമായിരുന്നു.

കാരണം അന്യസംസ്ഥാനങ്ങളില്‍ നിന്നാണ് കൂടുതല്‍ അയ്യപ്പഭക്തര്‍ ദര്‍ശനത്തിനെത്തുന്നത്. നടവരവിന്റെ ഭൂരിഭാഗവും അവര്‍ നിക്ഷേപിക്കുന്നതാണ്. മാത്രമല്ല കോടതി വിധി നടപ്പാക്കുന്നതിനോട് അവിടങ്ങളിലെ ഭക്തര്‍ക്കും അയ്യപ്പസംഘടനകള്‍ക്കും കടുത്ത എതിര്‍പ്പുണ്ട്. അത് കൂടി കണക്കിലെടുത്താണ് അവിടങ്ങളിലെ ദേവസ്വം മന്ത്രിമാര്‍ മുഖ്യമന്ത്രി പിണറായി വിജയന്‍ വിളിച്ച യോഗത്തില്‍ പങ്കെടുക്കാതിരുന്നത്.

വിധി വന്നപ്പോള്‍ തന്നെ തമിഴ്‌നാട്, ആന്ധ്രാപ്രദേശ്, കര്‍ണാടക, തെലങ്കാന, പുതുച്ചേരി സംസ്ഥാനങ്ങളിലെ മുഖ്യമന്ത്രിമാരുമായി സംസാരിക്കാന്‍ മുഖ്യമന്ത്രി തയ്യാറായില്ല. അതേസമയം യുവതികളെ പ്രവേശിപ്പിക്കാന്‍ സുരക്ഷ ഒരുക്കാന്‍ വനിതാ പൊലീസിനെ ഉള്‍പ്പെടെ വിട്ട് തരണമെന്ന് ആവശ്യപ്പെട്ട് കത്തയ്ക്കുകയും ചെയ്തു. കേരളത്തിലാണ് ശബരിമല ക്ഷേത്രം സ്ഥിതി ചെയ്യുന്നതെങ്കിലും ദക്ഷിണേന്ത്യന്‍ സംസ്ഥാനങ്ങളിലെ വലിയൊരു വാഭാഗം ഭക്തരുടെ വികാരമാണ് അയ്യപ്പസ്വാമി. അത് കണക്കിലെടുക്കാന്‍ കേരളം തയ്യാറായില്ലെന്ന് അയല്‍ സംസ്്ഥാനങ്ങള്‍ക്ക് പരാതിയുള്ളതായാണ് റിപ്പോര്‍ട്ട്. മന്ത്രിമാര്‍ എത്താത്തതിനെ തുടര്‍ന്ന് മുഖ്യമന്ത്രിയും ചടങ്ങില്‍ നിന്ന് വിട്ടുനിന്നു. ദേവസ്വം മന്ത്രി കടകംപള്ളി സുരേന്ദ്രനാണ് യോഗം നിയന്ത്രിക്കുന്നത്. 

ദക്ഷിണേന്ത്യന്‍ സംസ്ഥാനങ്ങളിലെങ്ങും ബി.ജെ.പിക്ക് ഭരണം ഇല്ലാതിരുന്നിട്ടും ദേവസ്വം മന്ത്രിമാര്‍ എത്താതിരുന്നത് സംസ്ഥാന സര്‍ക്കാരിനെ ഞെട്ടിച്ചു. സുരക്ഷ ഉള്‍പ്പെടെയുള്ള കാര്യങ്ങളില്‍ അവരുടെ ഭാഗത്ത് നിന്ന് നിസഹകരണം ഉണ്ടാകുമോ എന്ന ആശങ്കയുമുണ്ട്. എന്നാല്‍ വിധി നടപ്പാക്കുമ്പോള്‍ ക്രമസമാധാന പ്രശ്‌നങ്ങള്‍ ഉണ്ടാകാതെ നോക്കണമെന്നും നിരോധനാഞ്ജ ഉള്‍പ്പെടെ നടപ്പാക്കണമെന്നും ആവശ്യപ്പെട്ട് കേന്ദ്ര ആഭ്യന്തരമന്ത്രാലയം കേരളത്തിന് പുറമേ തമിഴ്‌നാട്, കര്‍ണാടക ചീഫ് സെക്രട്ടറിമാര്‍ക്ക് കത്തയച്ചിട്ടുണ്ട്. അത് മാത്രമാണ് പ്രതീക്ഷ.