സംസ്ഥാനതല പോഷകാഹാര വാരാചരണ സമാപനം: മന്ത്രി കെ.കെ. ശൈലജ ടീച്ചര് ഉദ്ഘാടനം ചെയ്യുന്നു; അംഗന്വാടി ജീവനക്കാരുടെ പുതിയ യൂണിഫോം വിതരണോദ്ഘാടനം
വനിത ശിശു വികസന വകുപ്പ് സംഘടിപ്പിച്ചു വരുന്ന ദേശീയ പോഷകാഹാര വാരാചരണത്തിന്റെ സംസ്ഥാനതല സമാപന സമ്മേളനം നവംബര് ഒന്നാം തീയതി ഉച്ചയ്ക്ക് 2 മണിക്ക് തിരുവനന്തപുരം ഭാഗ്യമാല ഓഡിറ്റോറിയത്തില് (ചന്ദ്രശേഖരന് നായര് സ്റ്റേഡിയം, പാളയം) വച്ച് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര് ഉദ്ഘാടനം ചെയ്യുന്നു.
വനിത ശിശുവികസന വകുപ്പിന്റെ വെബ്സൈറ്റ് ഉദ്ഘാടനം, അംഗന്വാടി ജീവനക്കാരുടെ യൂണിഫോം വിതരണോദ്ഘാടനം, ശൈശവകാല പോഷകാഹാര ബോധവത്ക്കരണ ലഘുലേഖ പ്രാകാശനം, പോഷകാഹാര പ്രദര്ശന വിജയികള്ക്കുള്ള സമ്മാനദാനം എന്നിവയും മന്ത്രി നിര്വഹിക്കുന്നു. വി.എസ്. ശിവകുമാര് എം.എല്.എ. അധ്യക്ഷത വഹിക്കുന്ന ചടങ്ങില് മേയര് അഡ്വ. വി.കെ. പ്രാശാന്ത് മുഖ്യാതിഥിയായിരിക്കും.
എല്ലാ വര്ഷവും സെപ്റ്റംബര് 1 മുതല് 7 വരെയാണ് ദേശീയ പോഷകാഹാര വാരാചരണം ആചരിക്കുന്നത്. എന്നാല് കേരളത്തിലെ പ്രളയ ദുരന്തത്തിന്റെ പശ്ചാത്തലത്തില് ഈ വര്ഷത്തെ സംസ്ഥാനതല പോഷകാഹാര വാരാചരണം ഒക്ടോബര് 25 മുതല് നവംബര് 1 വരെയാണ് നടത്തിവരുന്നത്. പോഷകാഹാരത്തിലൂടെ മികച്ച ആരോഗ്യമുള്ള തലമുറയെ വാര്ത്തെടുക്കുവാനും അതിലൂടെ രാജ്യത്തിന്റെ സാമ്പത്തിക വ്യവസ്ഥയില് സമൂലമായ മാറ്റങ്ങള് ഉണ്ടാക്കുവാനും സാധിക്കുന്നു. ഈ ലക്ഷ്യം മുന്നിര്ത്തിയാണ് വനിത ശിശുവികസന വകുപ്പ് സംസ്ഥാനതല വാരാചരണം സംഘടിപ്പിച്ച് വരുന്നത്.
https://www.facebook.com/Malayalivartha
