വിലയേറിയ ആധുനിക ജനറേറ്ററുകള് മാത്രം മോഷ്ടിച്ചിരുന്ന ആള് പിടിയില്, ഒപ്പം കൂടുന്ന സഹോദരനായി തിരച്ചില് തുടരുന്നു
സംസ്ഥാന വ്യാപകമായി ജനറേറ്ററുകള് മോഷണം നടത്തിവന്നിരുന്ന സംഭവത്തില് പ്രതി പിടിയിലായി. പകല് സമയങ്ങളില് ബൈക്കില് കറങ്ങി നടന്ന് സിസിടിവി ഇല്ലാത്ത സ്ഥലങ്ങളില് ജനറേറ്റര് കണ്ടുവച്ചശേഷം രാത്രി സഹോദരനൊപ്പം എത്തി മോഷണം നടത്തുകയായിരുന്നു ഇയാളുടെ രീതിയെന്ന് അധികൃതര് പറഞ്ഞു.
മോഷണ സമയത്ത് ഇവര് മൊബൈല് ഫോണ് ഉപയോഗിക്കാറില്ലെന്നും പോലീസ് പറഞ്ഞു. തൃശൂര് മരത്താക്കര ഭാഗത്ത് ഫിഷറീസ് റോഡില് വാടകയ്ക്കു താമസിച്ചുവരികയായിരുന്ന തൃശൂര് ചാവക്കാട് ഒരുമനയൂര് അമ്പലത്താഴം സുബ്രഹ്മണ്യ സ്വാമിക്ഷേത്രത്തിനു സമീപം വാല വീട്ടില് ഉണ്ണികൃഷ്ണനെ (32) ആണ് ജനറേറ്റര് മോഷണ കേസില് പാലാരിവട്ടം പോലീസ് പിടികൂടിയത്.
തൃശൂര് ഭാഗത്തുനിന്ന് സാഹസികമായാണ് പാലാരിവട്ടം സ്റ്റേഷന് ഹൗസ് ഓഫീസറായ എസ്. സനലിന്റെ നേതൃത്വത്തിലുള്ള പോലീസ് സംഘം ഇയാളെ പിടികൂടിയത്. പാലാരിവട്ടം പോലീസ് സ്റ്റേഷന് പരിധിയില്നിന്ന് വിലയേറിയ ആധുനിക ജനറേറ്ററുകള് മോഷണം പോകുന്നത് പതിവായപ്പോള് എറണാകുളം അസി. കമ്മീഷണര് കെ. ലാല്ജിയുടെ നിര്ദേശപ്രകാരം സബ് ഇന്സ്പെക്ടര് വി.എന്. ജിബിയുടെ നേതൃത്വത്തില് സ്പെഷല് സ്ക്വാഡ് രൂപീകരിച്ച് അന്വേഷണം നടത്തുകയായിരുന്നു.
തമ്മനം പാലാരിവട്ടം റോഡിലുള്ള ഒരു കടയില്നിന്ന് രണ്ടു ലക്ഷം രൂപ വില വരുന്ന ഹോണ്ട കമ്പനി നിര്മിതമായ ഒരു ഡീസല് ജനറേറ്റര് മോഷണം പോയ സംഭവത്തില് സ്ഥാപനത്തിന്റെ പരിസരത്തുള്ള സിസിടിവി ദൃശ്യങ്ങള് പരിശോധിച്ചപ്പോള് മോഷണത്തിന് ഉപയോഗിച്ചതായി കരുതുന്ന വാഹനത്തിന്റെ ദൃശ്യം ലഭിച്ചു. തുടര്ന്ന് വാഹനം പോയ വഴികളിലെ നൂറോളം സിസിടിവി ദൃശ്യങ്ങള് പരിശോധിച്ച് വിവിധ ജില്ലകള് കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പ്രതി പിടിയിലായത്.
പാലാരിവട്ടം പോലീസ് സ്റ്റേഷന് പരിധിയില്നിന്നു മാത്രം ആറ് ജനറേറ്ററുകള് പ്രതികള് മോഷ്ടിച്ചിട്ടുണ്ട്. ഇക്കാര്യത്തില് പാലാരിവട്ടം പോലീസ് സ്റ്റേഷനില് ഏഴ് കേസുകള് നിലിവിലുണ്ടെന്നും പോലീസ് അറിയിച്ചു. മോഷണം നടത്തിയെടുക്കുന്ന ജനറേറ്ററുകള് വില്പ്പന നടത്തി കിട്ടുന്ന പണം പ്രതികള് വാഹനം വാങ്ങാനും ആഡംബര ജീവിതത്തിനുമാണ് ഉപയോഗിച്ചിരുന്നതെന്ന് പോലീസ് പറഞ്ഞു.
കേസില് സഹോദരനെ പിടികൂടാനുള്ള അന്വേഷണം ഊര്ജിതമാക്കിയെന്നും പ്രതികള് കേരളത്തില് ഇത്തരത്തില് നിരവധി മോഷണങ്ങള് നടത്തിയിട്ടുള്ളതായി സംശയിക്കുന്നതായും പോലീസ് അറിയിച്ചു. കോടതിയില് ഹാജരാക്കി റിമാന്ഡ് ചെയ്ത പ്രതിയെ കസ്റ്റഡിയില് വാങ്ങി ചോദ്യം ചെയ്യുമെന്നും പോലീസ് പറഞ്ഞു.
https://www.facebook.com/Malayalivartha
