ശബരിമല യുവതീപ്രവേശന വിധിയില്‍ രാഹുല്‍ ഗാന്ധിയുടെ നിലപാടിനെ എ.ഐ.സി.സിയും പിന്തുണച്ചു. രാഹുലിന്റെ നിലപാടാണ് ശരിയെന്ന് മുതിര്‍ന്ന കോണ്‍ഗ്രസ് നേതാവ് പരസ്യമായി വ്യക്തമാക്കി. രാഹുലിന്റെ നിലപാടില്‍ അപാകതയില്ല. കോടതി വിധി സ്വാഗതം ചെയ്യുന്നു. കെ.പി.സി.സി പ്രാദേശിക വികാരം കണക്കിലെടുത്താണ് നിലപാട് സ്വീകരിച്ചതെന്നും ആനന്ദ് ശര്‍മ കുറ്റപ്പെടുത്തി.

ഇതോടെ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും വര്‍ക്കിംഗ് പ്രസിഡന്റ്മാരും മറ്റ് നേതാക്കളും വെട്ടിലായി. യുവതീപ്രവേശന വിധി നടപ്പാക്കുമെന്ന നിലപാടുമായി മുന്നോട്ട് നീങ്ങുന്ന സര്‍ക്കാരിനും മുഖ്യമന്ത്രിക്കും എതിരെ ഇവര്‍ എങ്ങനെ സമരം നടത്തുമെന്ന ആശയക്കുഴപ്പത്തിലായി. ശബരിമല വിഷയത്തില്‍ കോണ്‍ഗ്രസ് കഴിഞ്ഞ ദിവസം സമരപരിപാടികള്‍ പ്രഖ്യാപിക്കുകയും ചെയ്തു. 

രാഹുലിന്റെയും ആനന്ദ് ശര്‍മയുടെയും പ്രസ്താവനകള്‍ വന്നതിന് പിന്നാലെ കെ.പി.സി.സി പ്രസിഡന്റ് ഉടന്‍ വിശദീകരണവുമായി രംഗത്തെത്തിയുമില്ല. പ്രതിപക്ഷനേതാവ് രമേശ് ചെന്നിത്തലയാകട്ടെ മാധ്യമങ്ങളെ കാണാതെ, രാഹുല്‍ കെ.പി.സി.സിയെ തള്ളിപ്പറഞ്ഞിട്ടില്ലെന്ന് വാര്‍ത്താക്കുറിപ്പ് ഇറക്കുകയാണുണ്ടായത്. പിന്നീട് മാധ്യമങ്ങളെ കണ്ടപ്പോള്‍ ആശയക്കുഴപ്പമില്ലെന്നും എ.ഐ.സി.സിയുടെ നിലപാട് നേരത്തെ വ്യക്തമാക്കിയതാണെന്നും പ്രതികരിച്ചു. രാഹുലിന്റെ പരസ്യനിലപാട് കോണ്‍ഗ്രസ് നേതാക്കളെയാകെ വെട്ടിലാക്കിയിരിക്കുകയാണ്. പാര്‍ട്ടി ദേവസ്വം ബോര്‍ഡ് പ്രസിഡന്റാക്കിയിരുന്ന ബി.രാമന്‍ നായര്‍ ബി.ജെ.പിയില്‍ ചേര്‍ന്നതിന്റെ നാണക്കേട് മാറുംമുമ്പാണ് രാഹുല്‍ ഗാന്ധിയുടെ ഇടിവെട്ട് പ്രതികരണം വന്നത്. 

എന്‍.എസ്.എസുമായി അകന്ന് നില്‍ക്കുന്ന ചെന്നിത്തല എങ്ങനെയും ജനറല്‍ സെക്രട്ടറി സുകുമാരന്‍ നായരുമായി അടുക്കാനാണ് ശബരിമല യുവതീപ്രവേശനത്തെ എതിര്‍ത്ത് നടത്തുന്ന നാമജപ ഘോഷയാത്രയ്ക്ക് അടക്കം പിന്തുണ നല്‍കുന്നത്. കഴിഞ്ഞ നിയമസഭാ തെരഞ്ഞെടുപ്പിലും ചെങ്ങന്നൂര്‍ ഉപതെരഞ്ഞെടുപ്പിലും ഏറ്റ തിരിച്ചടിയുടെ ക്ഷീണം വരുന്ന പാര്‍ലമെന്റ്് തെരഞ്ഞെടുപ്പില്‍ മാറ്റിയില്ലെങ്കില്‍ ഹൈക്കമാന്‍ഡിന് മുന്നിലെത്താനാവില്ല. ഇതെല്ലാം കണക്ക് കൂട്ടിയാണ് കോടതിവിധിയെ ആദ്യം സ്വാഗതം ചെയ്ത ചെന്നിത്തല പിന്നീട് കടകംമറിഞ്ഞത്. ബി.ജെ.പിയെ ഭയന്ന് അവര്‍ക്കൊപ്പം നീങ്ങുന്ന കോണ്‍ഗ്രസിന് ഭാവിയില്‍ ഇത് വലിയ തിരിച്ചടിയാകുമെന്ന് രാഷ്്ട്രീയനിരീക്ഷകര്‍ വിലയിരുത്തുന്നു.