തിരുവനന്തപുരം മണ്‍ വിളയില്‍ പ്ലാസ്റ്റിക് നിര്‍മാണ യൂണിറ്റില്‍ തീപിടിത്തം. രാത്രിയോടെയാണ് തീപിടിത്തമുണ്ടായത്. ഫാമിലി പ്ലാസ്റ്റിക്‌സിന്റെ നിര്‍മാണശാലയിലാണ് തീപിടിത്തമുണ്ടായത്. ആളപായമില്ലെന്നാണ് റിപ്പോര്‍ട്ട്. ഫയര്‍ഫോഴ്‌സും പോലീസും ചേര്‍ന്ന് തീ അണയ്ക്കാന്‍ ശ്രമം നടത്തുകയാണ്.സമീപ ജില്ലകളില്‍ നിന്നുള്ള ഫയര്‍ ഫോഴ്‌സ് യൂണിറ്റുകളും വിമാനത്താവളത്തില്‍ നിന്നുള്ള യൂണിറ്റുമെത്തിയിട്ടുണ്ട്.

വിഷപ്പുക ശ്വസിച്ച് മൂന്ന് പേരെ ആശുപത്രിയില്‍ ചികിത്സ തേടി. മണ്‍വിള സ്വദേശി ജയറാം, രഘു ഗിരീഷ് എന്നിവരെയാണ് ആശുപത്രിയില്‍ പ്രവേശിപ്പിച്ചിരിക്കുന്നത്.

ഒന്നര മണിക്കൂറിനു ശേഷവും തീഅനിയന്ത്രിതമായി പടര്‍ന്നു കൊണ്ടിരിക്കുകയാണ്. മുപ്പതോളം അഗ്‌നിശമന സേനാ വിഭാഗങ്ങള്‍ സ്ഥലത്തെത്തിയിട്ടുണ്ട്. വിമാനത്താവളത്തില്‍ നിന്ന് കൂടുതല്‍ അഗ്‌നിശമന യൂണിറ്റുകളും സ്ഥലത്തെത്തിച്ചു. സമീപ ജില്ലകളില്‍ നിന്ന് കൂടുതല്‍ യൂണിറ്റുകള്‍ എത്തിക്കാന്‍ ശ്രമം നടത്തുന്നുണ്ട്. മന്ത്രി കടകംപള്ളി സുരേന്ദ്രനുംമേയറും സ്ഥലത്തെത്തി സ്ഥിതിഗതികള്‍ വിലയിരുത്തി.

കെട്ടിടത്തിനുള്ളില്‍ ഗ്യാസ് സിലിണ്ടറുകള്‍ അടക്കമുള്ളവ ഉള്ളതിനാല്‍ പ്രദേശത്തേയ്ക്ക് പോലീസ് ആളുകളെ കടത്തിവിടുന്നില്ല. ഈ ഭാഗത്തേക്കുള്ള വാഹനഗതാഗതം തടഞ്ഞിരിക്കുകയാണ്. സമീപവാസികളെ ഒഴിപ്പിക്കാന്‍ പോലീസ് നിര്‍ദേശം നല്‍കിയിട്ടുണ്ട്.

വ്യാഴാഴ്ച മുഖ്യമന്ത്രി പങ്കെടുക്കാനിരുന്ന സമ്മേളന വേദിയ്ക്ക് സമീപമാണ് തീപിടിത്തമുണ്ടായ സ്ഥാപനം. തീപിടിത്തത്തില്‍ സമ്മേളന വേദി തകര്‍ന്നതായാണ് റിപ്പോര്‍ട്ട്.ഷോര്‍ട്‌സ് സര്‍ക്യൂട്ടാണ് തീപിടിത്തത്തിന് കാരണമെന്നാണ് കരുതുന്നത്. 

ഏതാനും ദിവസം മുന്‍പും ഈ സ്ഥാപനത്തില്‍ തീപിടിത്തമുണ്ടായിരുന്നു. അന്നും ഷോര്‍ട്‌സ് സര്‍ക്യൂട്ടാണ് തീപിടിത്തത്തിന് ഇടയാക്കിയതെന്നാണ് പോലീസ് പറയുന്നത്.