തിരുവനന്തപുരം മണ്‍വിള വ്യവസായ എസ്‌റ്റേറ്റിനുള്ളില്‍ പ്രവര്‍ത്തിക്കുന്ന ഫാമിലി പ്ലാസ്റ്റിക്കിന്റെ നിര്‍മാണ യൂണിറ്റിലുണ്ടായ തീപിടിത്തത്തെ കുറിച്ച് സമഗ്രാന്വേഷണം നടത്തുമെന്ന് അഗ്‌നിശമന സേന. പൊലീസും അഗ്‌നിശമന സേനയും സംയുക്തമായിട്ടായിരിക്കും അന്വേഷണം നടത്തുക. തീപൂര്‍ണമായി അണഞ്ഞശേഷം കെട്ടിടം ഫൊറന്‍സിക് സംഘം പരിശോധിക്കും. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.
യൂണിറ്റിലെ ഒരു നിലയില്‍ കഴിഞ്ഞ ദിവസം ഷോര്‍ട് സര്‍ക്യൂട്ട് മൂലം ചെറുതായി തീപിടിച്ചിരുന്നു. അത് ഉടന്‍ അണക്കുകയും ചെയ്തു. നിലവില്‍ അതിന്റെ താഴെ നിലയില്‍ നിന്നാണ് തീ പടര്‍ന്ന്. അത് പെട്ടെന്ന് മറ്റിടങ്ങളിലേക്ക് വ്യാപിക്കുകയായിരുന്നു. 12 മണിക്കൂര്‍ ശ്രമത്തിനൊടുവില്‍ തീ അണക്കാന്‍ അഗ്‌നിശമന സേനക്കായി. എന്നാലും ചിലയിടങ്ങളില്‍ ഇപ്പോഴും ചെറു രീതിയില്‍ തീ കത്തുന്നുണ്ട്. കെട്ടിടത്തിന്റെ പലഭാഗങ്ങളും കത്തിനശിച്ച് തൂണുകള്‍ക്കും ചുമരുകള്‍ക്കും ബലക്ഷയം സംഭവിച്ചിട്ടുണ്ട്. കെട്ടിടത്തിനകത്തു കടന്ന് പരിശോധിക്കുന്നതിന് ഇത് തടസമാകുമെന്ന് കണ്ട് കൂടുതല്‍ ബലക്ഷയമുള്ള ഭാഗങ്ങള്‍ അഗ്‌നിശമന സേന പൊളിച്ചുമാറ്റി.
തീപിടിത്തത്തെ തുടര്‍ന്ന് വിഷപ്പുക ശ്വസിച്ച് രണ്ടുപേര്‍ ആശുപത്രിയിലായ സംഭവത്തിന്റെ പശ്ചാത്തലത്തില്‍ കെട്ടിടത്തിന്റെ രണ്ടു കിലോ മീറ്റര്‍ ചുറ്റളവില്‍ സ്‌കൂളകള്‍ക്ക് ഇന്ന് അവധി പ്രഖ്യാപിച്ചു. ഫാക്ടറി തൊഴിലാളികളെല്ലാം സുരക്ഷിതരാണെന്ന് അധികൃതര്‍ അറിയിച്ചു. സമീപ പ്രദേശത്തെ ആളുകളെ ഒഴിപ്പിച്ചതിനാല്‍ ആളപായങ്ങളൊന്നും സംഭവിച്ചിട്ടില്ല. നാലു നിലകെട്ടിടം പൂര്‍ണമായി കത്തിനശിച്ചതിനാല്‍ കോടികളുടെ നഷ്ടമാണ് കണക്കാക്കുന്നത്.