തിരുവനന്തപുരത്തെ മണ്വിളയില് പ്ലാസറ്റിക് നിര്മ്മാണ ശാലയിലുണ്ടായ തീ നിയന്ത്രണവിധേയം, പ്ലാസ്റ്റിക് കത്തി വന്തോതില് വിഷപ്പുക പടര്ന്നതിനാല് പരിസരവാസികള് ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ്
തിരുവനന്തപുരം മണ്വിളയില് പ്ലാസ്റ്റിക് നിര്മാണ ശാലയിലുണ്ടായ തീ നിയന്ത്രണവിധേയമായി. 90ശതമാനം തീയും അണച്ചു. അഗ്നിബാധയില് ആശങ്കയൊഴിഞ്ഞതായി സംഭവസ്ഥലത്തുള്ള മന്ത്രി കടകംപള്ളി സുരേന്ദ്രന് അറിയിച്ചു. അഗ്നിശമന സേനയുടെ അന്പതിലധികം വാഹനങ്ങള് തീ പൂര്ണമായി കെടുത്താന് പ്രയത്നിച്ചു. കെട്ടിടം പൂര്ണമായി കത്തിനശിച്ചു. തമിഴ്നാട്ടില്നിന്നുള്ള രണ്ടു യൂണിറ്റ് ഫയര്ഫോഴ്സും എയര്ഫോഴ്സിന്റെ ഫയര്ഫോഴ്സ് യൂണിറ്റുകളും രക്ഷാപ്രവര്ത്തനത്തില് പങ്കെടുക്കുന്നു. ബുധനാഴ്ച രാത്രി ഏഴോടെയാണ് തീപിടിത്തം ആരംഭിച്ചത്. ഈ ഭാഗത്തേക്കുള്ള വാഹനഗതാഗതം തടഞ്ഞിരിക്കുകയാണ്. വ്യാഴാഴ്ച മുഖ്യമന്ത്രി പങ്കെടുക്കാനിരുന്ന സമ്മേളന വേദിക്ക് സമീപമാണു തീപിടിത്തമുണ്ടായത്. തീ നിയന്ത്രണ വിധേയമാക്കാന് അഗ്നിശമന സേനയ്ക്ക് ഏഴു മണിക്കൂര് പ്രയത്നിക്കേണ്ടിവന്നു. ഇതുവരെ ആളപായം റിപ്പോര്ട്ട് ചെയ്തിട്ടില്ല. എന്നാല് വിഷപ്പുക ശ്വസിച്ച് രണ്ടു പേരെ ആശുപത്രിയില് പ്രവേശിപ്പിച്ചിട്ടുണ്ട്.
ഫാമിലി പ്ലാസ്റ്റിക് കന്പനിയുടെ നിര്മാണ യൂണിറ്റും ഗോഡൗണും ചേര്ന്നു പ്രവര്ത്തിക്കുന്നതിനാല് പ്ലാസ്റ്റിക് ഉത്പന്നങ്ങളും അസംസ്കൃത വസ്തുക്കളും ഇവിടെയുണ്ടായിരുന്നു. പ്ലാസ്റ്റിക് കത്തി വന്തോതില് വിഷപ്പുക പടര്ന്നതിനാല് ഒരു കിലോ മീറ്റര് ചുറ്റളവിലുള്ള ആളുകള് ജാഗ്രത പാലിക്കണമെന്ന് ആരോഗ്യവകുപ്പ് മുന്നറിയിപ്പ് നല്കിയിട്ടുണ്ട്. സമീപപ്രദേശത്തുനിന്നും ആളുകളെ ഒഴിപ്പിച്ചു.
"
https://www.facebook.com/Malayalivartha
