അഞ്ചിന് നടതുറക്കുമ്പോള് ശബരിമലയില് എത്താന് അണികളോട് രഹസ്യ ആഹ്വാനം നല്കി സംഘപരിവാര്; എല്ലാം മുന്നില് കണ്ട് രഹസ്യാന്വേഷണ വിഭാഗം കര്ശന സുരക്ഷ നിര്ദേശം നല്കി
ചിത്തിര ആട്ട വിശേഷത്തിനായി നവംബര് 5ന് ശബരിമല നട തുറക്കുമ്പോള് വീണ്ടും ശബരി മലയില് സംഘര്ഷ സാധ്യതയെന്ന് രഹസ്യാന്വേഷണ വിഭാഗം മുന്നറിയിപ്പ് നല്കി. അതേസമയം ദേവസ്വം ബോര്ഡ് രണ്ട് പ്രധാന ഉത്തരവുകള് പുറത്തിറക്കി. മണ്ഡല മകരവിളക്ക് മഹോല്സവത്തോടനുബന്ധിച്ച് ജീവനക്കാരുടെ സ്പെഷ്യല് നിയമനവുമായി ബന്ധപ്പെട്ടതും ശബരിമലയിലെ മുഖ്യപ്രസാദമായ അരവണ പ്രസാദത്തിന്റെ കരുതല് ശേഖരത്തിനായുള്ള ഉദ്യോഗസ്ഥരുടെ നിയമനവും സംബന്ധിച്ച ഉത്തരവാണു ദേവസ്വം കമ്മിഷണര് പുറത്തിറക്കിയത്.
എന്നാല് മുന്വര്ഷങ്ങളിലേത് പോലെ യുവതികളെ പമ്പയില് നിരീക്ഷിക്കാനുള്ള വനിതാ ഉദ്യോഗസ്ഥരുടെ നിയമനം സംബന്ധിച്ച നിര്ദേശം ഇതുവരെ നല്കിയിട്ടില്ല. സാധാരണഗതിയില് ഇതൊടൊപ്പം പമ്പയില്നിന്ന് യുവതികള് സന്നിധാനത്തേക്കു കയറാതിരിക്കാന് ഒരു വനിതാ അസിസ്റ്റന്റ് കമ്മിഷണറുടെ നേതൃത്വത്തില് ബോര്ഡ് വനിതാ ജീവനക്കാരുടെ സംഘത്തെ ദേവസ്വം കമ്മിഷണര് നിയോഗിക്കാറുണ്ടെങ്കിലും ഇതുസംബന്ധിച്ച് നിര്ദേശം ഇതുവരെ പുറത്തിറക്കിയിട്ടില്ല.
മുന്വര്ഷങ്ങളില് ഈ വനിതാ ജീവനക്കാരാണു സ്ത്രീകളെ തടഞ്ഞ് രേഖകള് പരിശോധിച്ച് സന്നിധാനത്തേക്കു കടത്തിവിടുന്നത്. സംശയമുള്ളവരെ പമ്പയില്നിന്നു തിരിച്ചയയ്ക്കുകയാണു പതിവ്. ശബരിമലയില് നടന്നിട്ടുള്ള ക്രമക്കേടുകളുമായി ബന്ധപ്പെട്ട ഉദ്യോഗസ്ഥരെ സ്പെഷല് ഡ്യൂട്ടിയില്നിന്ന് ഒഴിവാക്കണമെന്നു സര്ക്കുലറില് പ്രത്യേകം ആവശ്യപ്പെട്ടിട്ടുമുണ്ട്. ചിത്തിര ആട്ട വിശേഷത്തിനായി അഞ്ചിനു നടതുറക്കാനിരിക്കെ മൂന്നുമുതല് പോലീസ് നിയന്ത്രണം ഏറ്റെടുക്കും.
സ്ത്രീകള് പ്രവേശിച്ചാല് ശബരിമല കലാപ ഭൂമിയാകാന് സാധ്യതയുണ്ടെന്ന രഹസ്യാന്വേഷണവിഭാഗങ്ങളുടെ റിപ്പോര്ട്ടിന്റെ അടിസ്ഥാനത്തില് സുരക്ഷയുടെ ഭാഗമായാണു മൂന്നിനു പോലീസ് നിലയ്ക്കല് മുതല് സന്നിധാനം വരെയുള്ള നിയന്ത്രണമേറ്റെടുക്കുന്നത്. പമ്പയില് ഒരു എസ്.പിയുടെ നേതൃത്വത്തില് വന് പോലീസ് സന്നാഹമുണ്ടാകും. സന്നിധാനത്ത് ഭക്തരെ അധിക സമയം തങ്ങാന് അനുവദിക്കില്ല. വിവിധ സംഘപരിവാര് സംഘടനകള് തങ്ങളുടെ അണികളോട് അഞ്ചിന് ക്ഷേത്രത്തിലെത്തണമെന്നു രഹസ്യ നിര്ദേശം നല്കിയിട്ടുണ്ട്. യുവതികള് പ്രവേശിച്ചാല് എന്തു വിലകൊടുത്തും തടയണമെന്നാണു നിര്ദേശം.
"
https://www.facebook.com/Malayalivartha
