ശബരിമല: സുപ്രീംകോടതി റിവ്യൂഹര്ജി പരിഗണിച്ച് തീരുമാനം വരുന്നത് വരെ യുവതികളെ പ്രവേശിപ്പിക്കുന്നത് തടയാനാകില്ലെന്ന് ഹൈക്കോടതി, വിധി നടപ്പാക്കുകയാണ് സര്ക്കാര് ചെയ്തത്, ഹൈക്കോടതിക്ക് ഇക്കാര്യത്തില് ഇടപെടാനാവില്ല
ശബരിമല യുവതീപ്രവേശനത്തില് സംസ്ഥാന സര്ക്കാരിന് വീണ്ടും ഹൈക്കോടതിയില് നിന്ന് അനുകൂല പരാമര്ശം. സുപ്രീംകോടതി റിവ്യൂഹര്ജി പരിഗണിച്ച് തീരുമാനം എടുക്കുന്നത് വരെ യുവതികളെ പ്രവേശിപ്പിക്കരുതെന്ന ഹര്ജിയിലെ ആവശ്യം കോടതി തള്ളി.
വിധി നടപ്പാക്കുകയാണ് സര്ക്കാര് ചെയ്തത്. റിവ്യൂ ഹര്ജി തീരുമാനം വരുന്നത് വരെ സര്ക്കാര് കാത്ത് നില്ക്കേണ്ട കാര്യമില്ല. അത് നിയമപരമായ കാര്യമാണ്. സുപ്രീംകോടതി വിധിയില് ഹൈക്കോടതിക്ക് ഇടപെടാനാവില്ല. എന്നാല് ഹര്ജിക്കാരന് സുപ്രീംകോടതിയെ സമീപിക്കാം. എന്നാല് യുവതികളെ പ്രവേശിപ്പിച്ചാല് കലാപം ഉണ്ടാകാന് സാധ്യതയുണ്ടെന്ന് സ്വകാര്യഹര്ജിക്കാരന് ചൂണ്ടിക്കാട്ടി. രക്തച്ചൊരിച്ചിലുകള് തടയാനാണ് നിയമമുള്ളതെന്ന് കോടതി ചൂണ്ടിക്കാട്ടി. ഹര്ജിക്കാരന്റെ ഒരാവശ്യവും കോടതി അംഗീകരിച്ചുമില്ല.
വിഷയവുമായി ബന്ധപ്പെട്ട് കഴിഞ്ഞ ദിവസം രണ്ട് ഹര്ജികള് പരിഗണിക്കവെ സര്ക്കാരിനെ കോടതി തല്ലുകയും തലോടുകയും ചെയ്തിരുന്നു. ശബരിമലയില് വിശ്വാസികള്ക്ക് നേരെ പൊലീസ് അതിക്രമം നടത്തിയ സംഭവത്തില് ജുഡീഷ്യല് അന്വേഷണം വേണമെന്നായിരുന്നു ആദ്യത്തെ ഹര്ജി. എന്നാല് ഇക്കാര്യത്തില് കോടതിക്ക് പരിമിതിയുണ്ടെന്നും ജുഡീഷ്യല് അന്വേഷണം സംബന്ധിച്ച വിവേചനാധികാരം സര്ക്കാരിനും മന്ത്രിസഭയ്ക്കും ആണെന്നും കോടതി വ്യക്തമാക്കി. ഇത് സംബന്ധിച്ച സുപ്രീംകോടതി ഉത്തരവും ഹൈക്കോടതി വായിച്ച് കേള്പ്പിച്ചു. നിയമപരമായി കോടതിയുടെ കൈ കെട്ടിയിട്ടിരിക്കുകയാണ്. അതിനാല് വിഷയത്തില് ഇടപെടാന് ഉദ്ദേശിക്കുന്നില്ലെന്നും കോടതി വ്യക്തമാക്കി.
സ്വതന്ത്രമായി പ്രവര്ത്തിക്കുന്ന ദേവസ്വം ബോര്ഡിന്റെ പ്രവര്ത്തനങ്ങളില് സര്ക്കാര് കൈകടത്തുന്നെന്ന് ആരോപിച്ച് നല്കിയ ഹര്ജിയാണ് രണ്ടാമത് പരിഗണിച്ചത്. ശബരിമലയില് ഭക്തര്ക്ക് നിയന്ത്രണം കൊണ്ടുവരുമെന്ന് സര്ക്കാര് പ്രഖ്യാപിച്ചത് ഇതിന്റെ ഭാഗമായാണെന്നും സര്ക്കാരിന് അതിന് അധികാരമില്ലെന്നും ഹര്ജിക്കാരന് ചൂണ്ടിക്കാട്ടി. നിയന്ത്രണം ഏര്പ്പെടുത്തിയത് സംബന്ധിച്ച വിവരങ്ങളൊന്നും കോടതിയുടെ പക്കലില്ലെന്നും ഇത് സംബന്ധിച്ച തീരുമാനം ഒരാഴ്ചയ്ക്കുള്ളില് അറിയിക്കണമെന്നും കോടതി വ്യക്തമാക്കി. ശബരിമല വിഷയം സംബന്ധിച്ച് എടുക്കുന്ന തീരുമാനങ്ങള് കോടതിയില് നിന്ന് മറച്ച് വയ്ക്കരുതെന്നും വ്യക്തമായ മറുപടി നല്കണമെന്നും കോടതി താക്കീത് നല്കി.
അക്രമത്തില് പങ്കെടുത്തവരെ അറസ്റ്റ് ചെയ്തതിനെതിരെ കഴിഞ്ഞയാഴ്ച കോടതി രൂക്ഷമായി വിമര്ശിച്ചിരുന്നു. അക്രമികളെ അറസ്റ്റ് ചെയ്യണമെന്നും അതില് ഒരാള് പോലും നിരപരാധികള് ആയിരിക്കരുതെന്നും അങ്ങനെ സംഭവിച്ചാല് വലിയ പ്രത്യാഘാതം സംഭവിക്കുമെന്നും കോടതി മുന്നറിയിപ്പ് നല്കിയിരുന്നു. ഇതേ തുടര്ന്ന് നാമജപത്തില് പങ്കെടുത്ത വനിതകളെ അറസ്റ്റ് ചെയ്യുന്നത് ഡി.ജി.പി വിലക്കിയിരുന്നു.
https://www.facebook.com/Malayalivartha
