പ്രളയബാധിതര്‍ക്കുള്ള അടിയന്തര ധനസഹായം കൈപ്പറ്റിയത് 799 അനര്‍ഹ കുടുംബങ്ങളെന്ന് റിപ്പോര്‍ട്ട്. കോഴിക്കോട്, പാലക്കാട്, മലപ്പുറം, വയനാട് എന്നീ ജില്ലകളിലാണ് അനര്‍ഹര്‍ തുക കൈപ്പറ്റിയിരിക്കുന്നതായി തെളിഞ്ഞത്. കൈപ്പറ്റിയ തുക അനര്‍ഹരില്‍ നിന്നും തിരിച്ചുപിടിച്ചെന്ന് സംസ്ഥാന ദുരന്ത കൈകാര്യ അതോറിറ്റിയുടെ റിപ്പോര്‍ട്ടില്‍ പറയുന്നു.

ഒക്ടോബര്‍ 16 വരെ സംസ്ഥാനത്തൊട്ടാകെ 6,71,077 കുടുംബങ്ങള്‍ക്ക് അടിയന്തിര ധനസഹായം നല്‍കിയെന്ന് സംസ്ഥാന ദുരന്ത കൈകാര്യ അതോറിറ്റി വ്യക്തമാക്കിയിരുന്നു. ഇതില്‍ കോഴിക്കോട് നിന്നും 520 കുടുംബങ്ങളും പാലക്കാട് നിന്നും 11 കുടുംബങ്ങളും മലപ്പുറത്ത് നിന്നും 205 കുടുംബങ്ങളും വയനാട്ടില്‍ നിന്ന് 63 കുടുംബങ്ങള്‍ അനര്‍ഹരാണെന്ന് കണ്ടെത്തി. പ്രളയവുമായി ബന്ധപ്പെട്ട് ഹൈക്കോടതിയിലുള്ള കേസിലാണ് അതോറിറ്റിയുടെ റിപ്പോര്‍ട്ട്.