ശബരിമല നട ഇന്ന് തുറക്കാനിരിക്കെ നിലയ്ക്കലില്‍ നിന്നും പമ്പയിലേക്ക് കെഎസ്ആര്‍ടിസി സര്‍വ്വീസ് ആരംഭിച്ചില്ല. രാവിലെ 11.30 നാണ് കെഎസ്ആര്‍ടിസി സര്‍വീസ് തുടങ്ങുമെന്നാണ് അറിയിച്ചിരിക്കുന്നത്. നട 5 മണിക്ക് തുറക്കാനിരിക്കെ ഗതാഗതക്കുരുക്കില്‍ പെട്ട് ഭക്തര്‍ക്ക് സന്നിധാനത്ത് കൃത്യ സമയത്ത് എത്താന്‍ പറ്റുമോയെന്നും ആശങ്കയുണ്ട്. എന്നാല്‍ കെഎസ്ആര്‍ടിസി ബസ് ഇതുവരേയും പുറപ്പെടാത്തത് കടുത്ത പ്രതിഷേധം വിളിച്ചു വരുത്തിയിട്ടുണ്ട്. കെഎസ്ആര്‍ടിസി ബുക്ക് ചെയ്ത് വന്ന യാത്രക്കാര്‍ അവസാനം നടന്നാണ് പമ്പയിലേക്ക് പോകുന്നത്. ഇത് വളരെയധികം പ്രതിഷേധത്തിന് കാരണമാക്കിയിട്ടുണ്ട്. കെഎസ്ആര്‍ടിസിയെ വിശ്വസിച്ച് പണമടച്ചവരാണ് പെട്ടു പോയത്. പ്രായമായവരും കുട്ടികളുമടക്കം നടന്നു പോകേണ്ട അവസ്ഥയാണ് ഉണ്ടായിരിക്കുന്നത്. ഒരു സ്വകാര്യ വാഹനത്തേയും കടത്തി വിടുന്നുമില്ല. 

പോലീസിന്റെ നിര്‍ദേശം അനുസരിച്ച് കെഎസ്ആര്‍ടിസിയുടെ യാത്ര മുടക്കിയതില്‍ വന്‍ പ്രതിഷേമുയരുകയാണ്. എരുമേലിയിലും ഇത് സംഘര്‍ഷാവസ്ഥ സൃഷ്ടിച്ചിട്ടുണ്ട്. സുരക്ഷയുടെ പേരില്‍ തീര്‍ഥാടകരെ പോലീസ് പമ്പയിലേക്ക് കടത്തി വിടാത്തതിലാണ് പ്രതിഷേധം. ശരണം വളിച്ചാണ് ഇവര്‍ പ്രതിഷേധം സംഘടിപ്പിച്ചത്. ആയിരത്തി അഞ്ഞൂറിലധികം ഭക്തരാണ് എരുമേലിയില്‍ ഉള്ളത്. ഇതില്‍ വികലാംഗരുള്‍പ്പെടെയുള്ളവര്‍ ഉണ്ട്.

ഗുരുവായൂരില്‍ നിന്നും കാല്‍ നടയായി വന്ന വിഷ്ണുദാസ് എന്ന ഭക്തന്‍ ഒരു കാലില്ലാത്ത ആള്‍ ആണ്. ഇദ്ദേഹത്തിനെ പോലും തടഞ്ഞു എന്നാണ് അദ്ദേഹം വ്യക്തമാക്കുന്നത്. തന്റെ ജീവിതത്തില്‍ ഇതേവരെ താന്‍ ഇത്തരം യുദ്ധ സമാനമായ അന്തരീക്ഷം കണ്ടിട്ടില്ലെന്നും അദ്ദേഹം പറയുന്നു. ശരണം വിളിയുടെ അന്തരീക്ഷം യുദ്ധ സമാനമായതായി അദ്ദേഹം പറയുന്നു.

ബുക്ക് ചെയ്ത പണം തിരികെ നല്‍കണമെന്ന് പല ഭക്തരും ആവശ്യപ്പെട്ടു തുടങ്ങി. ഇത് വരുന്ന മണ്ഡല കാലത്തെ കെഎസ്ആര്‍ടിസി വരുമാനത്തെ വലുതായി ബാധിക്കുന്നതാണ്. 

അതേ സമയം പോലീസ് സുരക്ഷ കര്‍ശനമാക്കിയിട്ടുണ്ട്. ഇന്നലെ പമ്പയിലെത്തിയ വനിത പോലീസ് ഉദ്യോഗസ്ഥര്‍ ഇന്നുരാവിലെ സന്നിധാനത്ത് എത്തിയ. 20 കമാന്റോകളും 100 വനിത പോലീസും അടക്കം 2300 സുരക്ഷാ ഉദ്യോഗസ്ഥരെയാണ് ശബരിമലയില്‍ നിയോഗിച്ചിട്ടുള്ളത്. ശബരിമലയ്ക്ക് 20 കിലോമീറ്റര്‍ അകലെ മുതല്‍ തന്നെ പോലീസ് ശക്തമായ കാവല്‍ ഏര്‍പ്പെടുത്തിയിട്ടുണ്ട്. ശബരിമലയിലേക്കുള്ള എല്ലാ വഴികളിലും പരിശോധനയുണ്ട്.