കോഴിക്കോട് പൊയിൽകാവ് സ്വദേശി സുധയെ വെട്ടിക്കൊലപ്പെടുത്തിയ കേസിൽ ഭർത്താവ് കുട്ടികൃഷ്ണൻ കസ്റ്റഡിയിലായി. കൊയിലാണ്ടി പോലീസാണ് പ്രതിയെ കസ്റ്റഡിയിലെടുത്തത്.

കൊയിലാണ്ടി ബീവറേജിൽ മദ്യം വാങ്ങാനായി ക്യൂ നിൽക്കുന്നതിനിടെ ഇന്നലെ വൈകിട്ടോടെയാണ് പ്രതി പിടിയിലായത്. ഇയാളെ ചോദ്യം ചെയ്തു വരുന്നു. എന്താണ് കൊലപാതകത്തിലേക്ക് നയിച്ചതെന്നാണ് പൊലീസ് ചോദിച്ചറിയുന്നത്.
അതേസമയം പൊയീൽക്കാവ് ബീച്ചിൽ നാലുസെന്റ് കോളനിയിൽ സുധ(58)യാണ് കൊല്ലപ്പെട്ടത്. ഇന്നലെ രാവിലെയോടെ വീടിനോട് ചേർന്നുള്ള ഷെഡിൽ വെച്ച് വാക്കത്തി ഉപയോഗിച്ച് ഭർത്താവ് കുട്ടിക്കൃഷ്ണൻ സുധയെ വെട്ടിക്കൊലപ്പെടുത്തുകയായിരുന്നുവെന്നാണ് ലഭിക്കുന്ന സൂചനകൾ. ഷെഡിൽ രക്തത്തിൽ കുളിച്ചു കിടക്കുന്ന നിലയിലായിരുന്നു മൃതദേഹം. സമീപത്ത് വാക്കത്തിയും കണ്ടെത്തിയിട്ടുണ്ട്.

കൃത്യത്തിന് ശേഷം മരംവെട്ട് തൊഴിലാളിയായ കുട്ടികൃഷ്ണൻ ഒളിവിൽപോകുകയായിരുന്നു. പ്രതിയെ പിടികുടുന്നതിനായി കൊയിലാണ്ടി പൊലീസ് അന്വേഷണം ഊർജിതമാക്കുകയായിരുന്നു. അതിനിടെയാണ് പ്രതിയെ ബീവറേജിൽ മദ്യം വാങ്ങാനായി ക്യൂ നിൽക്കുന്നതിനിടെ പിടികൂടിയത്. ഇൻക്വസ്റ്റ് നടപടികൾക്ക് ശേഷം മൃതദേഹം പോസ്റ്റുമോർട്ടത്തിനായി കോഴിക്കോട് മെഡിക്കൽ കോളേജിലേക്ക് മാറ്റിയിരിക്കുകയാണ്.