പലപ്പോഴും പലരും അറിയാതെ പോവുന്ന ഒന്നാണ് ശബരിമലയിലെ നെയ്യഭിഷേകത്തിന്റെ പ്രാധാന്യം. കലാകാലങ്ങളായി ആചരിച്ചുവരുന്ന ഈ സമ്പ്രദായം എന്തിന്റെ പ്രതീകമാണ് എന്ന് ആരും തന്നെ ചിന്തിക്കാറില്ല. സന്നിധാനത്ത് ഇപ്പോൾ നടക്കുന്ന കോലാഹലങ്ങൾക്കിടയിലും ആരും ഇതിന്റെ പ്രാധാന്യത്തെ എടുത്ത് പറഞ്ഞുകൊണ്ട് മുന്നോട്ടു വരുന്നില്ല ; 24 മണിക്കൂറിൽ കൂടുതൽ ആരും സന്നിധാനത്ത് ഉണ്ടാകരുതെന്ന് സർക്കാർ പ്രഖ്യാപിച്ചപ്പോഴും ഇതിനെ കുറിച്ച് വ്യക്തമായി പറഞ്ഞു കൊണ്ട് ആരും തന്നെ വിലക്കിനെ തടയാൻ പോലും മുതിരുന്നില്ല എന്നത് വേദനാജനകമാണ്. ഈ അവസരത്തിൽ നെയ്യഭിഷേകത്തിന്റെ പ്രാധാന്യത്തെ നാം അറിയേണ്ടത് അനിവാര്യമാണ് .

ചിത്തിര ആട്ടവിശേഷത്തോടനുബന്ധിച്ച് ഇന്ന് ശബരിമല നട തുറക്കുന്ന സാഹചര്യത്തില്‍ ശബരിമലയിലെ നെയ്യഭിഷേകത്തിന്റെ പ്രാധാന്യം ആരും മറന്ന് പോകരുത് . തത്വമസിയുടെ പൂർണത ലഭിക്കുന്നത് നെയ്യഭിഷേകത്തിന്റെ അന്തസത്ത ഭഗവാനിൽ ലയിക്കുമ്പോഴാണ്. ഭക്തൻ പൂർണമായി അയ്യപ്പനാകുന്നതിന്റെ അല്ലെങ്കിൽ സ്വാമിയാകുന്നതിന്റെ പര്യായമാണ് നെയ്യഭിഷേകം.

നെയ്യഭിഷേകത്തിന്റെ പ്രാധാന്യം ഇങ്ങനെ :

ശബരിമലയിലെ നെയ്യഭിഷേകം; ഹിന്ദുമത വിശ്വാസമനുസരിച്ച് ജനനമരണങ്ങളിലൂടെ, വേദനകളില്‍പ്പെട്ടുഴലുന്ന ജീവാത്മാവ്‌ ഭഗവത്സായൂജ്യം നേടുന്നതോടെ, അതായത്‌ പരമാത്മാവില്‍ ലയിക്കുന്നതോടെ അതിന് ജനനമരണങ്ങളില്‍ നിന്ന് മോക്ഷം കിട്ടുന്നു എന്നാണ് വിശ്വാസം. ജീവാത്മാവിന്റെയും പരമാത്മാവിന്റെയും കൂടിച്ചേരലിന്റെ പ്രതീകമാണ്‌ നെയ്യഭിഷേകം. ഇതു ചെയ്തു കഴിഞ്ഞു പടിയിറങ്ങുമ്പോൾ മാത്രമേ അയ്യനായി മാറു എന്നാണ് വിശ്വാസം .

നെയ്‌ത്തേങ്ങയിലെ നെയ്യ്‌ ഭഗവാന്‌ അഭിഷേകം ചെയ്‌തശേഷം മുറിത്തേങ്ങ പതിനെട്ടാംപടിയുടെ താഴെയുള്ള അഗ്നികുണ്‌ഠത്തിലെറിയുo . ജീവിതത്തില്‍ നാം ചെയ്ത പാപപുണ്യങ്ങൾ എല്ലാം ഇരിമുടികെട്ടായി ശിരസ്സിലേറ്റി കൊണ്ടു പോയി ഭഗവാന്റെ കാൽചുവട്ടിൽ സമർപ്പിക്കുന്നു.ഇങ്ങനെ ചെയ്തുപോയ പാപങ്ങളെല്ലാം ശുദ്ധീകലശം നടത്തി താൻ സ്വാമിയായി തിരികെ വരുന്നുയെന്നതാണ് ഓരോ ഭക്തന്റെയും വിശ്വാസം .

തേങ്ങ നമ്മുടെ ശരീരവും, നെയ് നമ്മുടെ ആത്മാവുമാണ് . ഇരുമുടിയില്‍ വെക്കുന്ന നെയ് തേങ്ങ നമ്മള്‍ തന്നെയാണ് എന്നാണ് സങ്കല്‍പ്പം. ഇത് വളരെ ഉദാത്തമായ ഒരു സങ്കല്‍പ്പമാണ് .നെയ്യഭിഷേകം ചെയ്യുമ്പോള്‍ ആത്മാവ് ഭഗവാനില്‍ പൂർണമായി അര്‍പ്പിക്കപ്പെടുന്നു.അതുപോലെ തന്നെ ശരീരമാകുന്ന നെയ്തേങ്ങ ആഴിയാകുന്ന അഗ്നിയിലും സമര്‍പ്പിക്കപ്പെടുന്നു.

” അറിഞ്ഞും അറിയാതെയും വാക്കാലോ, പ്രവർത്തിയാലോ, ചിന്തയാലോ നീയാകുന്ന ഈ പ്രപഞ്ചത്തിൽ വച്ച് ഇന്നുവരെ ഞാൻ ചെയ്തു പോയ സകലവിധ പാപങ്ങളും പൊറുത്തു മാപ്പാക്കി എന്റെ ശരീരമാകുന്ന ഈ നാളികേരത്തിൽ ഞാനോ എന്റെ തലമുറയോ ഉണ്ടാക്കി വച്ച മുജ്ജന്മ പാപങ്ങളും ഇഹത്തിലെ കർമ്മ ദോഷങ്ങളും ദുരിതങ്ങളും അവിടത്തെ അനുഗ്രഹം കൊണ്ടു അഗ്നിയാൽ ഭസ്മമാക്കി തന്നു എന്നെയും നീ , നീയാം പൊരുളായി മാറ്റേണമേ അയ്യനെ”. ഇതാണ് ഇതിന്റെ പൊരുൾ. ഇങ്ങനെയുണ്ടാവുമ്പോൾ ആണ് തത്വമസി എന്ന പൊരുൾ പൂർണതയിൽ എത്തിച്ചേരുന്നത് തന്നെ. ഇതിന്റെ ഉദാത്തമായ ഒന്നാണ് നെയ്യഭിഷേകം.
ആത്മാവും , ശരീരവും ഒത്തുചേരുന്ന ധന്യ നിമിഷങ്ങള്‍.എന്നിട്ട് പവിത്രമായ ആത്മാവുമായി മലയിറങ്ങുന്നു.മരണാ‍നന്തരം നടക്കുന്ന കാര്യങ്ങള്‍ സ്വാമി ജീവിതത്തില്‍ തന്നെ നമുക്ക് പഠിപ്പിച്ചുതരുന്നു.