തുലാമാസ പൂജകള്‍ക്ക് ശബരിമല നടതുറന്നപ്പോള്‍ യുവതികള്‍ പ്രവേശനത്തിനെത്തിയപ്പോള്‍ നട അടച്ചിടുമെന്ന് തന്ത്രി കണ്ഠര് രാജീവര്‍ പറഞ്ഞത് തന്നോട് ആലോചിച്ച ശേഷമാണെന്ന് ബി.ജെ.പി അധ്യക്ഷന്‍ പി.എസ് ശ്രീധരന്‍ പിള്ള വെളിപ്പെടുത്തിയത് സര്‍ക്കാരിനെ വെട്ടിലാക്കി. പൊലീസ് കനത്ത സുരക്ഷ ഒരുക്കിയിട്ടും യുവതികളെ തടയാന്‍ തയ്യാറാകാതിരുന്ന തന്ത്രിക്ക് സര്‍വ്വപിന്തുണയും നല്‍കിയത് ബി.ജെ.പിയാണെന്ന് വ്യക്തമായതോടെ വിശ്വാസികള്‍ അവര്‍ക്കൊപ്പം നില്‍ക്കുമെന്ന വിശ്വാസത്തിലാണവര്‍. തന്ത്രിയും ബി.ജെ.പിയും ചേര്‍ന്ന് സര്‍ക്കാരിനെ വലിയ കുരുക്കിലാണ് എത്തിച്ചത്. കോടതി അലക്ഷ്യമാവില്ലേ എന്ന് തന്ത്രി ചോദിച്ചപ്പോള്‍ അങ്ങനെയുണ്ടാകില്ലെന്ന് അഭിഭാഷകന്‍ തന്നെയായ ശ്രീധരന്‍ പിള്ള ഉറപ്പ് നല്‍കി. അങ്ങനെയാണ് തന്ത്രിയാണ് നട അടയ്ക്കുമെന്ന കടുത്തനിലപാട് സ്വീകരിച്ചത്.

ഇനിയും യുവതികള്‍ എത്തിയാല്‍ തന്ത്രി നട അടയ്ക്കുമെന്നും ശ്രീധരന്‍പിള്ള യുവമോര്‍ച്ച യോഗത്തില്‍ പറയുന്നു. മാത്രമല്ല സമരം ആസൂത്രണം ചെയ്തതും ബി.ജെ.പിയാണെന്നും വെളിപ്പെടുത്തി. ഇത് സി.പി.എമ്മിനും സര്‍ക്കാരിനും വലിയ തിരിച്ചടിയാണ്. കാരണം ദേവസ്വം ബോര്‍ഡിനും സര്‍ക്കാരിനും അവര്‍ നേതൃത്വം നല്‍കുമ്പോള്‍ ശബരിമല തന്ത്രി സി.പി.എമ്മിന്റെ പ്രധാന രാഷട്രീയ എതിരാളിയായ ബി.ജെ.പിയെ കൂട്ടുപിടിച്ച് സര്‍ക്കാരിനെ പ്രതിസന്ധിയിലാക്കി. അത് ഗുരുതരമായ വീഴ്ചയാണ്. തന്ത്രിയുടെ പ്രസ്താവനയെ തുടര്‍ന്നാണ് പത്തനംതിട്ടിയില്‍ മുഖ്യമന്ത്രി തന്ത്രിക്കെതിരെ വിവാദമായ പ്രസ്താവന നടത്തിയത്.