ശബരിമല സമരം ബി.ജെ.പിയുടെ ആസൂത്രിത ശ്രമമാണെന്ന് ബി.ജെ.പി അധ്യക്ഷന്‍ പി.എസ് ശ്രീധരന്‍ പിള്ളിയുടെ വെളിപ്പെടുത്തല്‍. നമ്മള്‍ മുന്നോട്ട് വെച്ച അജണ്ടയില്‍ സി.പി.എം ഉള്‍പ്പെടെ ഓരോരുത്തരും വീണു. നമുക്ക് വീണ് കിട്ടിയ സുവര്‍ണാവസരമാണിത്. കോഴിക്കോട് ജില്ല യുവമോര്‍ച്ച നേതൃയോഗത്തില്‍ ശ്രീധരന്‍പിള്ള നടത്തിയ പ്രസംഗത്തിന്റെ ഓഡിയോ പുറത്തായതോടെയാണ് ഇക്കാര്യങ്ങള്‍ വ്യക്തമായത്.

യുവതികള്‍ എത്തിയാല്‍ നട അടച്ചിടുമെന്ന് തന്ത്രി പറഞ്ഞത് തന്നോട് ആലോചിച്ച ശേഷമാണ്. ഐ.ജി ശ്രീജിത്ത് രണ്ട് യുവതികളുമായി സന്നിധാനത്തേക്ക് എത്തിയപ്പോള്‍ തന്ത്രി തന്നെ വിളിച്ചിരുന്നു. അദ്ദേഹം അസ്വസ്ഥനായിരുന്നു. യുവതികള്‍ എത്തിയാല്‍ നട അടച്ചാല്‍ കോടതി അലക്ഷ്യമാവില്ലേ എന്ന് അദ്ദേഹം ചോദിച്ചു. ആകില്ലെന്നും, ഒറ്റയ്ക്കാകില്ലെന്നും താന്‍ മറുപടി നല്‍കി, തന്ത്രിയുടെ പിന്നില്‍ ഞങ്ങള്‍ പതിനായിരങ്ങള്‍ ഉണ്ടാകും. ആദ്യം പ്രതിയാകുന്നത് ഞാനായിരിക്കുമെന്നും തന്ത്രിക്ക് ഉറപ്പ് നല്‍കി. എനിക്ക് സാറ് പറഞ്ഞ ഒറ്റവാക്ക് മതി എന്ന് പറഞ്ഞ ശേഷം തന്ത്രി എടുത്ത തീരുമാനമാണ് പൊലീസിനെയും ഭരണകൂടത്തെയും അങ്കലാപ്പിലാക്കിയതെന്നും ശ്രീധരന്‍ പിള്ള പറഞ്ഞു. ഇന്ന് തന്ത്രിക്കും തന്ത്രിസമൂഹത്തിനും ഏറ്റവും അധികം വിശ്വാസം ബി.ജെ.പിയെയും അതിന്റെ അധ്യക്ഷ്യനായ എന്നോടുമുണ്ട്. ഇനിയും യുവതികളെത്തിയാല്‍ തന്ത്രി തടയുമെന്നും അദ്ദേഹം പറയുന്നു.

ഞാന്‍ ഒന്നാം പ്രതിയും തന്ത്രി രണ്ടാംപ്രതിയുമാകുമെന്ന് അന്ന് തന്ത്രിയോട് വെറുതെ പറഞ്ഞതാണെങ്കിലും, വെറുതെയല്ല ആത്മാര്‍ത്ഥമായി പറഞ്ഞതാണ്. ഭഗവാന്റെ നിശ്ചയം പോലെ ഞാനും അദ്ദേഹവും ഒരുമിച്ച് കോടതിയലക്ഷ്യ കേസില്‍ ഒന്നും രണ്ടും പ്രതികളായി. അത് തന്ത്രിയുടെ ആത്മവിശ്വാസം കൂട്ടിയെന്നാണ് വിശ്വസിക്കുന്നത്. ശബരിമല സമരം നമ്മുടെ തന്ത്രമാണ്. നാളെ പി.ജെ.പി പറയുന്നത് പോലെ കാര്യങ്ങളെത്തും. ശബരിമല ബി.ജെ.പിക്ക് സുവര്‍ണാവസരമാണ്, സമസ്യയാണ്. അത് എങ്ങനെ പൂര്‍ത്തീകരിക്കണം എന്ന് വ്യക്തമായി ആലോചിക്കണം വര വരച്ച് നടപ്പാക്കാനാകില്ല. കാര്യങ്ങള്‍ നമ്മുടെ കയ്യിലല്ല. അധികാരമുള്ളത് സി.പി.എമ്മിന്റെയും സര്‍ക്കാരിന്റെയും കയ്യിലാണ്. നമ്മുടെ അജണ്ടയില്‍ ഓരോരുത്തരായി വീണു. ഭരണകൂടവും അവരുടെ പാര്‍ട്ടിയും പ്രതിരോധത്തിലായി. 

തുലമാസ പൂജകള്‍ക്ക് നടതുറന്നപ്പോള്‍ നിലയ്ക്കല്‍ മുതല്‍ പമ്പവരെയുള്ള സമരങ്ങള്‍ ആസൂത്രണം ചെയ്ത് നടപ്പാക്കിയത് ബി.ജെ.പിയാണ്. ഐ.ജി ശ്രീജിത്ത് ഒക്ടോബര്‍ 19ന് രഹ്നഫാത്തിമയേയും ഒരു മാധ്യമപ്രവര്‍ത്തകയേയും കൊണ്ട് സന്നിധാനത്തേക്ക് തിരിച്ചപ്പോള്‍ യുവമോര്‍ച്ചയുടെ ഒരു ജില്ലാ ജനറല്‍ സെക്രട്ടറിയാണ് ഭക്തജനങ്ങളെ സംഘടിപ്പിച്ച് തടഞ്ഞത്. എന്നാല്‍ അതിന് ശേഷം കാര്യങ്ങള്‍ മാറി. പ്രശ്‌നങ്ങള്‍ ഉണ്ടാക്കുന്നവരുടെ ഫോട്ടോയും വീഡിയോയും ഉള്‍പ്പെടെ പൊലീസ് എടുക്കാന്‍ തുടങ്ങി. അതുവരെ പ്രസ്ഥാനത്തിന് നേട്ടം ഉണ്ടാക്കിയിടത്ത് നിന്നും എതിരാളികള്‍ നമ്മെ വഴിതെറ്റിക്കുന്ന രീതിയുണ്ടായി. അതിനാല്‍ നമുക്ക് പരിമിതികള്‍ ഉണ്ടെന്നും ശ്രീധരന്‍പിള്ള യോഗത്തില്‍ പറയുന്നു.