ശബരിമലയില്‍ യുവതികളെ പ്രവേശിപ്പിക്കാതിരിക്കാന്‍ തന്ത്രി തന്നോട് ഫോണിലൂടെ കൂടിയാലോചന നടത്തിയെന്ന് വെളിപ്പെടുത്തല്‍ നടത്തിയ ബി.ജെ.പി സംസ്ഥാന അധ്യക്ഷന്‍ പി.എസ് ശ്രീധരന്‍പിള്ളയ്‌ക്കെതിരെ കേസ് സര്‍ക്കാര്‍ കേസ് എടുക്കണമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ആവശ്യപ്പെട്ടു. തുലാമാസകള്‍ക്ക് ശബരിമല നടതുറന്നപ്പോള്‍ സംഘര്‍ഷമുണ്ടാക്കാന്‍ ബി.ജെ.പി ഉന്നതതല ഗൂഢാലോചന നടത്തി. അതിനാല്‍ സര്‍ക്കാര്‍ ഉന്നതതല അന്വേഷണത്തിന് ഉത്തരവിടണം. തന്ത്രി കുടുംബത്തെയും ഉള്‍പ്പെടുത്തണമെന്നും കോടിയേരി ആവശ്യപ്പെട്ടു. ഇതോടെ ശബരിമലയിലെ ബി.ജെ.പിയുടെ രാഷ്ട്രീയ ഇടപെടല്‍ നിയമക്കുരുക്കിലേക്ക് നീങ്ങുകയാണ്. 

ശബരിമലയില്‍ യുവതികളെ പ്രവേശിപ്പിക്കണമെന്ന സുപ്രീംകോടതി വിധി നടപ്പാക്കാന്‍ സര്‍ക്കാര്‍ തയ്യാറായപ്പോള്‍ തന്ത്രി മറ്റൊരു രാഷ്ട്രീയപ്പാര്‍ട്ടിയുമായി ചേര്‍ന്ന് അത് അട്ടിമറിക്കാന്‍ ശ്രമിച്ചത് ഭരണഘടനാ ലംഘനമാണെന്നും കോടിയേരി വ്യക്തമാക്കി. ശബരിമലയില്‍ നടക്കുന്ന അക്രമ സംഭവങ്ങളെല്ലാം ബിജെപി ആസൂത്രണം ചെയ്തവയാണെന്ന് പി എസ് ശ്രീധരന്‍ പിള്ളയുടെ ശബ്ദരേഖ വ്യക്തമാക്കുന്നു. ശബരിമല പ്രശ്‌നവുമായി ബന്ധപ്പെട്ട് ബിജെപി സ്വീകരിച്ച നിലപാടുകളെക്കുറിച്ച് ഉന്നതതല അന്വേഷണം നടത്തണമെന്നും എല്ലാ ഗൂഢാലോചനയും പുറത്തുകൊണ്ടുവരണമെന്നും കോടിയേരി ആവശ്യപ്പെട്ടു.

ആര്‍എസ്എസ് ആസൂത്രണം ചെയ്ത അക്രമ പരമ്പരകളാണ് നടക്കുന്നത്. തെറ്റിദ്ധരിക്കപ്പെട്ട ആളുകള്‍ ഇനിയെങ്കിലും ഇത്തരം പ്രശ്‌നങ്ങളില്‍ നിന്ന് പിന്മാറണം. തന്ത്രി കുടുംബം ഏതെങ്കിലും ഒരു പാര്‍ടിയുടെ കൈയില്‍ കളിക്കേണ്ടവരല്ല. ശ്രീധരന്‍ പിള്ള പറയുന്നതിനനുസരിച്ചല്ല നട അടച്ചിടേണ്ടത്. ബാഹ്യശക്തികള്‍ക്ക് വിധേയമായി പ്രവര്‍ത്തിക്കേണ്ടവരല്ല തന്ത്രികുടുംബം. തന്ത്രികുടുംബത്തില്‍ വിശ്വാസികള്‍ അര്‍പ്പിച്ച ബഹുമാനം നഷ്ടപ്പെടുംവിധത്തിലുള്ള പെരുമാറ്റമാണ് ഉണ്ടായിട്ടുള്ളത്. അതുകൊണ്ട് പുറത്തുവന്ന വാര്‍ത്തയെ സംബന്ധിച്ച് ദേവസ്വം ബോര്‍ഡ് നടപടികള്‍ സ്വീകരിക്കണം. സര്‍ക്കാരും ഉന്നതതല അന്വേഷണത്തിന് തയ്യാറാകണമെന്നും കോടിയേരി ബാലകൃഷ്ണന്‍ ആവശ്യപ്പെട്ടു.

സര്‍ക്കാരിനെയും പൊലീസിനെയും വെട്ടിലാക്കിയ തന്ത്രിയുടെ തീരുമാനം സി.പി.എമ്മിന് രാഷ്്്ട്രീയമായി വലിയ തിരിച്ചടിയാണ്. അതിനാണ് കേസ് എടുത്ത് അന്വേഷണം നടത്തണമെന്ന് കോടിയേരി ആവശ്യപ്പെട്ടത്. പി.എസ് ശ്രീധരന്‍പിള്ളയുടെ വെളിപ്പെടുത്തലിന്റെ പശ്്ചാത്തലത്തില്‍ അത് രാഷ്ട്രീയ പ്രചരണ ആയുധമാക്കാനും സി.പി.എം തീരുമാനിച്ചിട്ടുണ്ട്.