ശബരിമല സന്നിധാനം കളങ്കപ്പെടുത്താന്‍ ശ്രമിച്ചവരുമായി തന്ത്രി കണ്ഠരര് രാജീവര്‍ ഗൂഢാലോചന നടത്തിയെന്ന പരോക്ഷവിമര്‍ശനവുമായി മുഖ്യമന്ത്രി പിണറായി വിജയന്‍. ഇത് അതീവഗൗരവമായ വിഷയമാണ്. സാധാരണഗതിയില്‍ ഇത് സംഭവിക്കാന്‍ പാടില്ലാത്തതാണ്. ഇത് സംബന്ധിച്ച് ഞാനല്ല തന്ത്രിയാണ് നിലപാട് വ്യക്തമാക്കേണ്ടത്. ഈ വഴിക്ക് തന്നെയാണോ സഞ്ചരിക്കാന്‍ ആഗ്രഹിക്കുന്നതെന്ന് തന്ത്രി വ്യക്തമാക്കണമെന്നും മുഖ്യമന്ത്രി ആവശ്യപ്പെട്ടു.

തന്ത്രിക്ക് നിയമോപദേശം തേടണമെങ്കില്‍ ഇവിടെ ദേവസ്വം ബോര്‍ഡിന്റെ അഭിഭാഷകനുണ്ട്. അല്ലെങ്കില്‍ അഡ്വക്കേറ്റ് ജനറലുണ്ട്. അവരെയൊന്നും വിളിക്കാന്‍ തന്ത്രിക്ക് തോന്നിയില്ല. പകരം ആ ഘട്ടത്തില്‍ രൂപം കൊണ്ട് പ്രത്യേക കൂട്ടുകെട്ടില്‍ തന്ത്രിയും ഭാഗഭാക്കായി. ഇത് സാധാരണഗതിയില്‍ സംഭവിക്കാന്‍ പടില്ലാത്തതായിരുന്നെന്നും മുഖ്യമന്ത്രി പറഞ്ഞു. 

സുപ്രീംകോടതി വിധി വന്ന ശേഷം പന്തളം രാജകുടുംബത്തെയും തന്ത്രിയേയും ചര്‍ച്ചയ്ക്ക് മുഖ്യമന്ത്രി എന്ന നിലയില്‍ ഞാന്‍ ചര്‍ച്ചയ്ക്ക് വിളിച്ചിരുന്നു. അവര്‍ വരുമെന്നാണ് വിചാരിച്ചത്. വരാത്തത് ആശങ്കാജനകമായിരുന്നു. എന്നാല്‍ അതിന്റെ കാരണം ഇപ്പോഴാണ് വ്യക്തമായത്. ബി.ജെ.പിയുടെ വരുധിയിലേക്ക് തന്ത്രിയേയും പന്തളം രാജകുടുംബത്തെയും എത്തിച്ചു. അതില്‍ തന്ത്രിയുടെ പങ്ക് വ്യക്തമായെന്നും മുഖ്യമന്ത്രി പറഞ്ഞു. ശബരിമലയില്‍ യുവതികളെത്തിയാല്‍ നട അടച്ചിടുമെന്ന് തന്ത്രി തുലാമാസ പൂജയ്ക്കിടെ പറഞ്ഞിരുന്നു. തുടര്‍ന്ന് മുഖ്യമന്ത്രി പത്തനംതിട്ടയില്‍ അദ്ദേഹത്തിനെതിരെ രൂക്ഷവിമര്‍ശനം നടത്തിയിരുന്നു.