ശബരിമലയില് സംഘ്പരിവാര് നേതാക്കള് ഇരുമുടിക്കെട്ടില്ലാതെ പതിനെട്ടാംപടി കയറി ആചാരം ലംഘിച്ചെന്ന് മുഖ്യമന്ത്രി പിണറായി വിജയന്
ശബരിമലയില് ആചാരത്തെ ബഹുമാനിക്കുന്നുവെന്ന് പറയുന്ന സംഘ്പരിവാര് നേതാക്കള് ഇരുമുടിക്കെട്ടില്ലാതെ പതിനെട്ടാംപടി കയറി ആചാരം ലംഘിച്ചെന്ന് മുഖ്യമന്ത്രി പിണറായി വിജയന്. ഇന്നലെ സംഘ്പരിവാര് നേതാക്കള് നടപടിക്രമങ്ങള് പാലിക്കാതെ പടിയില് കയറിയപ്പോള് ആചാരം എവിടെ പോയെന്നും മുഖ്യമന്ത്രി ചോദിച്ചു. എല്.ഡി.എഫ് മുതലക്കുളം മൈതാനിയില് സംഘടിപ്പിച്ച റാലി ഉദ്ഘാടനം ചെയ്യുകയായിരുന്നു അദ്ദേഹം. വലിയതോതില് സംഘര്ഷമുണ്ടാക്കാനാണ് ഇന്നലെയും സംഘ്പരിവാര് ശ്രമിച്ചത്. പേരക്കുട്ടിയുടെ ചോറൂണിന് വന്ന 52 കാരിയെ വരെ ആക്രമിച്ചു. നിറഞ്ഞ പൊലീസ് സാന്നിധ്യമുള്ളതിനാല് സംഘര്ഷമുണ്ടായില്ല. പൊലീസിന് പരിമിതികളുണ്ട് മുഖ്യമന്ത്രി വ്യക്തമാക്കി
ശബരിമല അടച്ചിടുകയെന്നത് സംഘ്പരിവാറിന്റെ ആവശ്യമായതിനാലാണ് തന്ത്രിക്ക് ബി.ജെ.പി സംസ്ഥാന പ്രസിഡന്റ് ശ്രീധരന് പിള്ള 'നിയമോപദേശം'നല്കിയത്. ഇമ്മാതിരി ഉപദേശം സ്വീകരിച്ചാല് തന്ത്രിമാര് പാടുപെടും. ആരാധനാലയങ്ങളെ തകര്ക്കാന് ശ്രമിക്കുന്നവരുടെ കരുവായി തന്ത്രി മാറരുത്. ആരാധനാലയത്തിന്റെ നല്ല നടത്തിപ്പിനാണ് തന്ത്രികുടുംബവുമായും പന്തളം രാജാവുമായും ചര്ച്ചക്ക് സര്ക്കാര് തീരുമാനിച്ചത്. എന്നാല്, ചര്ച്ചക്ക് വരാതിരുന്നതിന്റെ കാരണം ശ്രീധരന് പിള്ളയുടെ പ്രസംഗത്തോടെ മനസ്സിലായി. ശബരിമല സമരം കഴിയുമ്പോള് ബി.ജെ.പിയും ഭരണകൂടവും ഇടതുപക്ഷവും മാത്രമേ ഉണ്ടാവൂ എന്ന ശ്രീധരന്പിള്ളയുടെ പ്രസംഗത്തിന്റെ സാരം കോണ്ഗ്രസിന്റെ അണികളെ ഒപ്പം ചേര്ക്കുമെന്നാണ്. അത് കേട്ടിട്ടുപോലും കോണ്ഗ്രസ് നേതാക്കള് പ്രതികരിച്ചില്ല. കോണ്ഗ്രസ് നേതാക്കള് ആര്.എസ്.എസിനെ കടത്തിവെട്ടുകയാണ്.
സുപ്രീംകോടതി വിധിയെ അനുകൂലിച്ച കോണ്ഗ്രസ് അധ്യക്ഷന് രാഹുല് ഗാന്ധിയുടെ അഭിപ്രായം സ്ത്രീപക്ഷ നിലപാടയിരുന്നു. എന്നാല്, അത് വ്യക്തിപരമായ അഭിപ്രായമാണെന്ന സംസ്ഥാനത്തെ കോണ്ഗ്രസ് നേതാക്കളുടെ തൊലിക്കട്ടി അപാരമാണ്. ജനാധിപത്യത്തെ അംഗീകരിക്കാന് ആര്.എസ്.എസ് തയാറല്ലെന്നും കേരളത്തിന്റെ മതനിരപേക്ഷ മനസ്സ് തകര്ക്കാന് ഇക്കൂട്ടര് മുമ്പും ശ്രമിച്ചിട്ടുണ്ടെന്നും അദ്ദേഹം കൂട്ടിച്ചേര്ത്തു.
"
https://www.facebook.com/Malayalivartha
