മണ്ഡലകാലം രണ്ട് ദിവസം പിന്നിട്ടപ്പോള്‍ അപ്പം അരവണ വില്‍പ്പനയില്‍ വലിയ ഇടിവ്. ദേവസ്വംബോര്‍ഡ് അംഗം കെ.പി ശങ്കര്‍ദാസ് ഇക്കാര്യം അറിയിച്ചു. കഴിഞ്ഞ സീസണില്‍ ആദ്യ രണ്ട് ദിനം ഒരു കോടി 26 ലക്ഷത്തോളം രൂപയാണ് അരവണ വില്‍പ്പനയില്‍ ലഭിച്ചത്. ഇത്തവണയത് 72 ലക്ഷത്തി നാല്‍പ്പത്തയ്യായിരത്തോളം രൂപയായി കുറഞ്ഞു. ഏതാണ്ട് 53 ലക്ഷത്തോളം രൂപയുടെ കുറവുണ്ട്. അപ്പം വില്‍പ്പനയില്‍ അഞ്ച് ലക്ഷം രൂപയുടെ ഇടിവുണ്ടായി. അതേസമയം കാണിക്ക ഇനത്തില്‍ നേരിയ വര്‍ദ്ധനവുണ്ടായി. കഴിഞ്ഞതവണ 75 ലക്ഷം രൂപ കിട്ടിയപ്പോള്‍ ഇത്തവണ 3,765 രൂപ കൂടി. 

നെയ്യ് അഭിഷേകത്തിന് നിയന്ത്രണം ഏര്‍പ്പെടുത്തിയെങ്കിലും ഒരു കോടിയോളം രൂപ വരുമാനം കൂടി. കഴിഞ്ഞതവണ നെയ്യഭിഷേകത്തിന് ഒരു കോടി അന്‍പത്തഞ്ച്‌ലക്ഷം രൂപ ലഭിച്ചപ്പോള്‍ ഇത്തവണ അത് 1,64,49000 രൂപയായി. പല കാണിക്ക വഞ്ചികളിലും സ്വാമിശരണം എന്ന് എഴുതിയ പേപ്പറുകള്‍ നിറഞ്ഞിരുന്നു. ദേവസ്വം ബോര്‍ഡ് ക്ഷേത്രങ്ങളില്‍ യാതൊരു കാരണവശാലും കാണിക്കയിടരുതെന്നാണ് സംഘപരിവാറിന്റെ ആഹ്വാനം. ഇക്കാര്യം സുരേഷ്‌ഗോപി എം.പിയും പരസ്യമായി ആവശ്യപ്പെട്ടിരുന്നു. എന്നാല്‍ ബി.ജെ.പി സംസ്ഥാന പ്രസിഡന്റ് പി.എസ് സുരേന്ദ്രന്‍പിള്ള ഇക്കാര്യം നിഷേധിച്ചിരുന്നു. 

അപ്പം, അരവണ കൗണ്‍റുകള്‍ 24 മണിക്കൂറും തുറന്ന് പ്രവര്‍ത്തിച്ചിരുന്നതാണ്. എന്നാല്‍ ഇത്തവണ സുരക്ഷാക്രമീകരണങ്ങളുടെ ഭാഗമായി രാത്രി 10 മണിക്ക് ശേഷം കൗണ്ടറുകള്‍ അടച്ച് പൂട്ടണമെന്ന് പൊലീസ് ആവശ്യപ്പെട്ടിരുന്നു. പ്രതിഷേധം ശക്തമായതോടെയാണ് ഇത് എടുത്ത് കളഞ്ഞത്. നിയന്ത്രണമാവാം അപ്പം, അരവണ ഇനത്തില്‍ വരുമാനം കുറയാന്‍ കാരണമെന്നും ബോര്‍ഡ് വിലയിരുത്തുന്നു. കടുത്ത നിയന്ത്രണങ്ങള്‍ ശബരിമലയില്‍ ഏര്‍പ്പെടുത്തിയത് ഭക്തരെ അകറ്റുന്നുണ്ടെന്നതിന് തെളിവുകൂടിയാണ് വരുമാനത്തിലെ ഇടിവ്. ദേവസ്വം ബോര്‍ഡിന് ലഭിക്കേണ്ട കോടിക്കണക്കിന് രൂപയാണ് ഇത് കാരണം നഷ്ടമായിരിക്കുന്നത്. കടുത്ത നിയന്ത്രണങ്ങള്‍ കാരണം ശബരിമലയില്‍ ഒരു ദിവസത്തെ വരുമാനത്തില്‍ 2.64 കോടി രൂപയുടെ കുറവാണുണ്ടായത്. 

ഓരോ വര്‍ഷവും വരുമാനം ശരാശരി 10 ശതമാനം വര്‍ദ്ധിക്കുമ്പോഴാണ് ഇത്തവണ കനത്ത നഷ്ടമുണ്ടായത്. അപ്പം, അരവണ, മുറിവാടക, അന്നദാന സംഭാവന എന്നിവയിലാണ് കനത്ത നഷ്ടമുണ്ടായത്. അരവണയില്‍ മാത്രം 53.76 ലക്ഷം നഷ്ടമുണ്ട്. കഴിഞ്ഞ സീസണില്‍ 1.10 കോടി ലഭിച്ചപ്പോള്‍ ഇക്കുറി 72.45 ലക്ഷം മാത്രമാണ് ലഭിച്ചത്. ഉണ്ണിയപ്പത്തില്‍ 5.17 ലക്ഷവും മുറിവാടകയില്‍ 34.06 ലക്ഷവും അന്നദാന സംഭാവനയില്‍ 2.91 ലക്ഷവും കുറവുണ്ട്. കഴിഞ്ഞ സീസണില്‍ വൃശ്ചികം ഒന്നിന് 4,34,33,480 രൂപ ലഭിച്ചിരുന്നു, എന്നാല്‍ ഇക്കുറി ലഭിച്ചത് 1,70,21,858 രൂപ മാത്രമാണ്.