സന്നിധാനത്ത് ഇന്നലെ വീണ്ടും അയ്യപ്പഭക്തരുടെ പ്രതിഷേധം ഉയര്‍ന്നത് ശരണം വിളിയുടെ പേരിലാണ്. ശബരിമലയിലെ വാവര് നടയിലാണ് 22 പേരടങ്ങുന്ന സംഘം തിങ്കളാഴ്ച രാത്രി ശരണം വിളി നടത്തിയത്. ശരണം വിളി കേട്ട് ലാത്തിച്ചാര്‍ജിന് എന്ന പോലെ വന്‍ പോലീസ് സംഘമാണ് ഷീല്‍ഡുമായി ആ ചെറു സംഘത്തെ വളഞ്ഞത്. സന്നിധാനം സ്‌പെഷ്യല്‍ ഓഫീസര്‍ കാര്യം ചോദിച്ചു. അയ്യപ്പ സന്നിധിയില്‍ ശരണം വിളിക്കാന്‍ പാടില്ലേ സാറെ എന്ന് ചോദിച്ചു. ശരണം വിളിക്കണം അല്ലേ വാ... എന്നുപറഞ്ഞ് അവരെ വാവര് നടയില്‍നിന്ന് നീക്കി മാളികപ്പുറം നടപ്പന്തലിന് സമീപത്തേക്ക് മാറ്റി.

മലിനമായ സ്ഥലത്തേക്കാണു തങ്ങളെ മാറ്റിയതെന്ന് ഭക്തര്‍ ആരോപിച്ചു. ഇവിടെ നിന്ന് ശരണം വിളിക്കുന്നതെങ്ങനെ... സാറെ. ഇതിന് തൊട്ടടുത്താണ് മൂത്രപ്പുര. പൈപ്പ് പൊട്ടിയൊഴുകുന്നു. താഴെയെല്ലാം ചെളി. ഇങ്ങനെ ഭക്തരെ അപമാനിക്കണോ സാറെ. ശബരിമലയില്‍ വരുന്നത് മനസ് തുറന്ന് ശരണം വിളിക്കാനാണ്. അതിന് പോലും സമ്മതിച്ചില്ലെങ്കില്‍... നിങ്ങള്‍ അനുഭവിക്കും സാറെ... ഈ വൃത്തികെട്ട സ്ഥലത്ത് ശരണം വിളിക്കാന്‍ ഞങ്ങളില്ല... തങ്ങള്‍ നാമജപം അവസാനിപ്പിക്കുകയാണ്... ഇതാണ് ശബരിമലയിലെ അവസ്ഥയെന്നാണ് ഭക്തര്‍ പറയുന്നത്. 

ഞായറാഴ്ച രാത്രിയും സന്നിധാനത്ത് ശരണംവിളിയുടെ പേരില്‍ ഉണ്ടായ അറസ്റ്റ് ഏറെ വിവാദമുണ്ടാക്കിയിരുന്നു. പൊലീസ് ഏര്‍പ്പെടുത്തിയിരിക്കുന്ന നിയന്ത്രണങ്ങള്‍ക്കെതിരെ വലിയനടപ്പന്തലില്‍ നാമം ജപിച്ച് പ്രതിഷേധിച്ച 69 തീര്‍ത്ഥാടകരെയാണ് അറസ്റ്റ് ചെയ്തത്. നിരോധനാജ്ഞ ലംഘിച്ചെന്ന കുറ്റം ആരോപിച്ചുള്ള അറസ്റ്റ് ബലപ്രയോഗത്തിനും കാരണമായി.

രാത്രി 10.25. നട അടക്കാന്‍ അര മണിക്കൂര്‍ മാത്രമുള്ളപ്പോഴാണ് സംഘര്‍ഷാവസ്ഥയുടെ തുടക്കം. വിവിധയിടങ്ങളിലായി തമ്പടിച്ചിരുന്ന അന്‍പതിലേറെ പേരടങ്ങിയ സംഘം നാമം ജപിച്ച് നടപ്പന്തലിലേക്ക് നീങ്ങി. വിശ്രമിക്കാന്‍ ആരെയും പൊലീസ് അനുവദിക്കാതിരുന്ന നടപ്പന്തലിരുന്ന് നാമജപം തുടര്‍ന്നു. പിരിഞ്ഞ് പോകണമെന്ന് പൊലീസ് അവശ്യപ്പെട്ടപ്പോള്‍ ഹരിവരാസനം കഴിഞ്ഞ് പോകാമെന്നറിയിച്ചു. ഇതിന് ശേഷം തിരിച്ച് പോകാന്‍ തുടങ്ങിയതോടെ ,എസ്.പി പ്രതീഷ് കുമാറെത്തി പ്രതിഷേധത്തിന് നേതൃത്വം നല്‍കിയ ചിലരെ അറസ്റ്റ് ചെയ്യുമെന്ന് അറിയിച്ചു. ഇതൊടെ ബഹളമായി. നടപ്പന്തലിലെ സംഘര്‍ഷം ഒഴിവാക്കാന്‍ ആദ്യം പൊലീസ് പിന്‍മാറിയെങ്കിലും വീണ്ടും അറസ്റ്റിന് തയാറായി. ഒരാളെ മാത്രമല്ല, എല്ലാവരെയും അറസ്റ്റ് ചെയ്യണമെന്ന് പ്രതിഷേധക്കാര്‍ അറിയിച്ചു. ഒടുവില്‍ കൂട്ട അറസ്റ്റിന് പൊലീസ് തീരുമാനമെടുത്തു.

അറസ്റ്റിന് വഴങ്ങാന്‍ തയാറായെങ്കിലും നെയ്യഭിഷേകത്തിനായി ചൊവ്വാഴ്ച വരെ സന്നിധാനത്ത് തങ്ങണമെന് ആവശ്യപ്പെട്ടു. ഇത് പൊലീസ് അംഗീകരിച്ചില്ല. കുത്തിയിരുന്ന് അറസ്റ്റ് ചെറുക്കാന്‍ ശ്രമിച്ചവരെ ബലം പ്രയാഗിച്ച് കീഴടക്കി. നിലത്ത് വീണ് ഒരാള്‍ക്ക് പരുക്കേറ്റു. ഒടുവില്‍ രണ്ട് സംഘങ്ങളായി തിരിഞ്ഞ് പമ്പയിലേക്ക് പോയി. നിരോധനാഞ്ജ ലംഘിച്ചതിനൊപ്പം പൊലീസിന്റെ കൃത്യനിര്‍വഹണം തടസപ്പെടുത്തിയെന്ന ജാമ്യമില്ലാ കുറ്റവും ചുമത്തി.