വിളവൂര്‍ക്കല്‍ പൊറ്റയില്‍ കാവടിവിള ശിവോദയം വീട്ടില്‍ അടച്ചിട്ടിരുന്ന കിടപ്പുമുറിയുടെ ജനല്‍ചില്ലുകള്‍ പൊട്ടിയനിലയില്‍ കണ്ടതിനെ തുടര്‍ന്നു നടത്തിയ പരിശോധനയില്‍ മുറിക്കുള്ളില്‍ നിന്നും കിട്ടിയതു വെടിയുണ്ട. ശിവോദയത്തില്‍ അജിത്തിന്റെ വീട്ടിനുള്ളിലേക്കാണു വെടിയുണ്ട തുളച്ചു കയറിയത്. കഴിഞ്ഞ ചൊവ്വാഴ്ച മുതല്‍ അജിത്തും ഭാര്യ നീതുവും കുഞ്ഞിന്റെ അസുഖത്തെ തുടര്‍ന്നു സ്വകാര്യ ആശുപത്രിയിലായിരുന്നു.

അജിത്തിന്റെ അച്ഛനും അമ്മയും മാത്രമാണു ഈ ദിവസങ്ങളില്‍ വീട്ടിലുണ്ടായിരുന്നത്. ഇവര്‍ താഴത്തെ നിലയിലാണു താമസം. എന്നാല്‍ ഇന്നലെ രാവിലെ 11-ന് ആശുപത്രിയില്‍ നിന്നും അജിത്തും ഭാര്യയും എത്തിയപ്പോഴാണു വീടിന്റെ മുകളിലത്തെ നിലയില്‍ അടച്ചിട്ടിരുന്ന കിടപ്പുമുറിയിലെ രണ്ടു ജനല്‍ പാളികളില്‍ ഒന്നിന്റെ ചില്ല് തകര്‍ന്നതു ശ്രദ്ധയില്‍പെട്ടത്.

തുടര്‍ന്നു മുറി വൃത്തിയാക്കിയപ്പോഴാണു വെടിയുണ്ട ലഭിച്ചത്. നെടുമങ്ങാട് ഡിവൈഎസ്പിയുടെ ചുമതലയുള്ള അശോക് കുമാര്‍, മലയിന്‍കീഴ് എസ്‌ഐ: എന്‍.സുരേഷ്‌കുമാര്‍ എന്നിവര്‍ സ്ഥലത്ത് എത്തി. വെടിയുണ്ട കൊണ്ടാണു ചില്ലു തകര്‍ന്നതെന്നു പൊലീസ് സ്ഥിരീകരിച്ചു. ബാലിസ്റ്റിക് സ്‌ക്വാഡും ഫൊറന്‍സിക് വിഭാഗവും ഇന്നു പരിശോധന നടത്തും. മുറി പൂട്ടി പൊലീസ് സീല്‍ ചെയ്തിരിക്കുകയാണ്.

വ്യോമസേനയുടെ ഉടമസ്ഥയിലുള്ള മൂക്കുന്നിമലയിലെ ഫയറിങ് സ്‌റ്റേഷനില്‍ നിന്നാവും വെടിയുണ്ട വന്നതെന്നു പൊലീസ്. ശനിയാഴ്ച ഇവിടെ വിവിധ സേനാവിഭാഗങ്ങളുടെ പരിശീലനം നടന്നതായി അന്വേഷണ സംഘം പറഞ്ഞു. രണ്ടുവര്‍ഷം മുന്‍പ് വിളവൂര്‍ക്കല്‍ സിന്ധുഭവനില്‍ രാമസ്വാമിയുടെ വീട്ടില്‍ വെടിയുണ്ട തുളച്ചു കയറിയിരുന്നു.

അന്നു വീട്ടിനുള്ളില്‍ കുട്ടികളടക്കം ഒട്ടേറെ പേരുണ്ടായിരുന്നെങ്കിലും തലനാരിഴയ്ക്കാണു പരുക്കേല്‍ക്കാതെ രക്ഷപ്പെട്ടത്. കൂടാതെ നാലു വര്‍ഷം മുന്‍പ് മലയം ശിവക്ഷേത്രത്തിനു സമീപം വീട്ടുമുറ്റത്തു നില്‍ക്കുകയായിരുന്ന സ്ത്രീയുടെ വയറ്റില്‍ ബുള്ളറ്റ് പതിച്ചു സാരമായ പരുക്കേറ്റു.

മൂക്കുന്നിമലയിലെ ഫയറിങ് സ്‌റ്റേഷനില്‍ നിന്നാണ് ഇവിടങ്ങളില്‍ ബുള്ളറ്റ് എത്തിയതെന്നു പൊലീസ് തറപ്പിച്ചു പറയുമ്പോഴും ഉത്തരവാദിത്തം ഏറ്റെടുക്കാന്‍ വ്യോമസേനയിലെ ഉദ്യോഗസ്ഥര്‍ തയാറായില്ല. മൂക്കുന്നിമലയില്‍ നിന്നും കിലോമീറ്റര്‍ അകലെയുള്ള ഈ പ്രദേശങ്ങളില്‍ വെടിയുണ്ട വരാന്‍ സാധ്യത കുറവാണെന്നാണു സൈന്യത്തിന്റെ വിശദീകരണം. എന്നാല്‍ ഫയറിങ് സ്‌റ്റേഷനില്‍ പരിശീലനം നടക്കുമ്പോഴാണ് ഇതു സംഭവിക്കുന്നതെന്നു നാട്ടുകാര്‍ ആരോപിക്കുന്നു.