ശബരിമല വിശ്വാസത്തെ അടിച്ചമര്‍ത്താന്‍ ഇടതുമുന്നണിയെ അനുവദിക്കില്ലെന്ന് ബിജെപി ദേശീയ അധ്യക്ഷന്‍ അമിത്ഷാ കഴിഞ്ഞ ദിവസം നടത്തിയ പ്രസ്താവന ഫലം കണ്ടു. ഒപ്പം വി. മുരളീധരന്‍ എംപിയുടെ ശക്തമായ നീക്കവും ഫലം കണ്ടു. ഭക്തര്‍ ഇന്നലെ മതിവരുവോളം ശരണം വിളിച്ചു. ആശരണം വിളിയില്‍ മുരളീധരനും ചേര്‍ന്നു. അതോടെ  ശബരിമലയിലുണ്ടായിരുന്ന നിയന്ത്രണങ്ങളും ഭാഗീകമായി മാറി. ഇതോടൊപ്പം ഭക്തരോടൊപ്പവും കൊച്ച് കുട്ടികളോടൊപ്പവും നിന്ന് പോലീസുകാര്‍ സെല്‍ഫിയുമെടുത്തത് രംഗം ശാന്തമാക്കി. പോലീസുകാര്‍ പഴയ പോലീസ് അയ്യപ്പന്‍മാരായതുപോലെ... 

മറ്റ് ചില പ്രഖ്യാപനവും പോലീസ് നടത്തി. നെയ്യഭിഷേകത്തിനോ ദര്‍ശനത്തിനോ യാതൊരു നിയന്ത്രണങ്ങളും ഏര്‍പ്പെടുത്തിയിട്ടില്ലെന്നും എല്ലാം സാധാരണ രീതിയിലാണ് നടക്കുന്നതെന്നും ഐജി വിജയ് സാഖറെ പറഞ്ഞു. നെയ്യഭിഷേകത്തിന് ടിക്കറ്റെടുത്തവര്‍ക്ക് വിരവച്ച് താമസിക്കാന്‍ സന്നിധാനത്ത് അഞ്ചിടങ്ങളിലായി പ്രത്യേക സൗകര്യങ്ങള്‍ ഒരുക്കിയിട്ടുണ്ട്. ഈ കേന്ദ്രങ്ങളിലേക്ക് എത്തിച്ചേരാനായി സഹായം ആവശ്യമുള്ളവര്‍ക്ക് പൊലീസ് സേവനം നല്‍കും. വലിയ നടപ്പന്തലില്‍ സ്ത്രീകള്‍ക്കും പ്രായമായവര്‍ക്കും ഭിന്നശേഷിയുള്ളവര്‍ക്കും രോഗികള്‍ക്കും വിശ്രമിക്കാനുള്ള അവസരം ഇന്നലെ തന്നെ പൊലീസ് നല്‍കിയിരുന്നു. ഇതിന് പിന്നാലെയാണ് നടപ്പന്തലില്‍ താല്‍ക്കാലികമായി വിശ്രമിക്കാനും അവസരമൊരുക്കുന്നത്.

കഴിഞ്ഞ ദിവസം അതി രൂക്ഷ വിമര്‍ശനമാണ് അമിത്ഷാ ഉന്നയിച്ചത്. സോവിയറ്റ് തടവുകാരെ പോലെ അയ്യപ്പഭക്തരോട് പെരുമാറാമെന്ന് പിണറായി കരുതേണ്ട. പെണ്‍കുട്ടികളോടും അമ്മമാരോടും വൃദ്ധരോടും കേരള പൊലീസ് മനുഷ്യത്വരഹിതമായി പെരുമാറുകയാണെന്നും അമിത് ഷാ ആരോപിച്ചു. ശബരിമലയിലെ ജനമുന്നേറ്റത്തെ അടിച്ചമര്‍ത്താമെന്നാണ് പിണറായി വിജയന്‍ കരുതുന്നത്. കെ സുരേന്ദ്രനെയും ബിജെപി തൃശൂര്‍ ജില്ലാ പ്രസിഡന്റ് അടക്കമുള്ളവരെയും അറസ്റ്റ് ചെയ്തത് ആ തെറ്റിദ്ധാരണയിലാണ്. ഞങ്ങള്‍ ശബരിമലയിലെ ആചാരങ്ങള്‍ സംരക്ഷിക്കണമെന്ന് ആഗ്രഹിക്കുന്ന ഭക്തന്മാര്‍ക്കൊപ്പമാണ്. വൈകാരികമായ ഒരു പ്രശ്‌നത്തെ പിണറായി വിജയന്‍ സര്‍ക്കാര്‍ നേരിടുന്ന രീതി വളരെ നിരാശാജനകമാണെന്നും അമിത്ഷാ ട്വിറ്ററിലൂടെ വ്യക്തമാക്കി.

ഇതിന് മുഖ്യമന്ത്രി മറുപടി പറഞ്ഞെങ്കിലും ആ മറുപടി കേരളത്തില്‍ മാത്രം ഒതുങ്ങി. അമിത് ഷായുടെ വിമര്‍ശനമാകട്ടെ എല്ലാ സംസ്ഥാനങ്ങളിലും എത്തി. ആ സംസ്ഥാനങ്ങളിലെ അയ്യപ്പന്‍ ശബരിമലയില്‍ എന്താണ് നടക്കുന്നതെന്ന് അന്വേഷിച്ചു. അതിന്റെ ഉദാഹരണമാണ് കഴിഞ്ഞ ദിവസം എരുമേലിയിലെത്തി മടങ്ങിയ നൂറുകണക്കിന് അയ്യപ്പന്‍മാര്‍.