അടുത്ത വര്ഷം മാര്ച്ചില് നടക്കുന്ന ഒന്നും രണ്ടും വര്ഷ ഹയര് സെക്കന്ഡറി പരീക്ഷയുടെ വിജ്ഞാപനം പുറപ്പെടുവിച്ചു
അടുത്ത വര്ഷം മാര്ച്ചില് നടക്കുന്ന ഒന്നും രണ്ടും വര്ഷ ഹയര് സെക്കന്ഡറി പരീക്ഷയുടെ വിജ്ഞാപനം പുറപ്പെടുവിച്ചു. മാര്ച്ച് 6ന് ആരംഭിച്ച് 27ന് അവസാനിക്കത്തക്ക വിധമാണു പരീക്ഷകള് ക്രമീകരിച്ചിരിക്കുന്നത്. പ്രായോഗിക പരീക്ഷകള് ഫെബ്രുവരി 14ന് തുടങ്ങും. പ്രളയക്കെടുതികളെ തുടര്ന്ന് നിരവധി അദ്ധ്യയന ദിനങ്ങള് നഷ്ടപ്പെട്ട സാഹചര്യത്തില്, മാര്ച്ച് 6ന് തുടങ്ങാനിരുന്ന ഇക്കൊല്ലത്തെ എസ്.എസ്.എല്.സി പരീക്ഷ ഒരാഴ്ചത്തേക്ക് നീട്ടാന് തീരുമാനിച്ചിരുന്നു. മാര്ച്ച് 13ന് ആരംഭിക്കുന്ന പരീക്ഷ ഇടവേളകളില്ലാതെ തുര്ച്ചയായ പ്രവൃത്തി ദിനങ്ങളിലാണ് നടത്തുന്നത്.
എന്നാല്, സയന്സ് വിഷയങ്ങള് ഉള്പ്പെടെയുള്ള ഹയര് സെക്കന്ഡറി പരീക്ഷകള് ഇത്തരത്തില് നടത്തുന്നത് കുട്ടികള്ക്ക് ബുദ്ധിമുട്ട് സൃഷ്ടിക്കുമെന്ന് ഹയര് സെക്കന്ഡറി ഡയറക്ടര് പി.കെ.സുധീര്ബാബു പറഞ്ഞു. ഉച്ചയ്ക്ക് ശേഷം നടത്തിവരുന്ന എസ്.എസ്.എല്.സി പരീക്ഷ ഹയര്സെക്കന്ഡറി പരീക്ഷയ്ക്കൊപ്പം രാവിലെ 10 മുതലാക്കണമെന്നതിനെപ്പറ്റി ക്രിസ്മസ് പരീക്ഷയ്ക്ക് ശേഷം തീരുമാനിക്കും. എസ്.എസ്.എല്.സി പരീക്ഷയും രാവിലെയാക്കിയാല് ഹയര് സെക്കന്ഡറി പരീക്ഷാ തീയതികളില് ആവശ്യമെങ്കില് ചില ക്രമീകരണങ്ങള് വരുത്തുമെന്ന് ഡയറക്ടര് പറഞ്ഞു.
ഹയര് സെക്കന്ഡറി ഒന്നാം വര്ഷ പരീക്ഷാഫീസ് 240 രൂപയും രണ്ടാം വര്ഷം 270 രൂപയുമാണ്. ഒന്നാം വര്ഷക്കാര്ക്ക് ഡിസംബര് 12 വരെയും രണ്ടാം വര്ഷക്കാര്ക്ക് നവംബര് 26 വരെയും പിഴയില്ലാതെ ഫീസടയ്ക്കാം.
രണ്ടാം വര്ഷ പരീക്ഷയെഴുതുന്ന മുഴുവന് വിദ്യാര്ത്ഥികള്ക്കും ഉപരിപഠനത്തിന് യോഗ്യരാകുന്ന മുറയ്ക്ക് പരീക്ഷാ സര്ട്ടിഫിക്കറ്റിനോടൊപ്പം മൈഗ്രേഷന് സര്ട്ടിഫിക്കറ്റും നല്കും. ഇതിന് പ്രത്യേക അപേക്ഷ നല്കേണ്ടതില്ല.
കംപാര്ട്ട്മെന്റില് വിദ്യാര്ത്ഥികള്ക്ക് മാത്രം 2017 മുതല് ഒന്നാം വര്ഷ ഇംപ്രൂവ്മെന്റ് പരീക്ഷയ്ക്ക് ഒറ്റത്തവണ രജിസ്ട്രേഷനാണ് നല്കിയത്. അവര് 2018ലെ ഒന്നാംവര്ഷ ഇംപ്രൂവ്മെന്റ്/സപ്ലിമെന്ററി പരീക്ഷയ്ക്ക് എഴുതിയ വിഷയത്തിന് മാര്ച്ച് 2019 ലെ രണ്ടാം വര്ഷ പരീക്ഷയ്ക്കും രജിസ്റ്റര് ചെയ്തിട്ടുണ്ട്. ഈ വിഭാഗം 2019 മാര്ച്ചിലെ പരീക്ഷയ്ക്ക് വീണ്ടും ഫീസൊടുക്കി അപേക്ഷ നല്കേണ്ടതില്ല. അപേക്ഷാഫോമുകള് ഹയര്സെക്കന്ഡറി പോര്ട്ടലിലും എല്ലാ ഹയര്സെക്കന്ഡറി സ്കൂളുകളിലും ലഭിക്കും.
ഓപ്പണ് സ്കൂള് വിദ്യാര്ത്ഥികള് അവര്ക്കനുവദിച്ചിട്ടുള്ള പരീക്ഷാ കേന്ദ്രങ്ങളില് അപേക്ഷ നല്കണം. അപേക്ഷകള് ഡയറക്ടറേറ്റില് നേരിട്ട് സ്വീകരിക്കില്ല. പരീക്ഷാ വിജ്ഞാപനത്തിനും വിശദവിവരങ്ങള്ക്കും www.dhsekerala.gov.in എന്ന വെബ്സൈറ്റ് സന്ദര്ശിക്കുക.
"
https://www.facebook.com/Malayalivartha
