ശബരിമല കർമ്മ സമിതി നേതാക്കൾ കേന്ദ്രമന്ത്രി പൊൻ രാധാകൃഷ്ണന് നിവേദനം നൽകി. കേരളാ മുഖ്യ മന്ത്രിയുടെ നിര്‍ദേശപ്രകാരം ലാത്തിയും ഗണ്ണും മറ്റു ആയുധങ്ങളുമായി വന്‍തോതിലുള്ള പോലീസ് സാന്നിധ്യം ശബരിമലയില്‍യുദ്ധ സമാനമായ സാഹചര്യം ഉണ്ടാക്കിയിട്ടുള്ളതിനാല്‍ ശബരിമല തീര്‍ത്ഥാടനം ഭക്തര്‍ക്ക് ഭീതിയ്ക്കും, അസംതൃപ്തിയ്ക്കും വലിയ ശാരീരിക മാനസിക ബുദ്ധിമുട്ടുകള്‍ക്കും വഴിവയ്ക്കുകയാണ് എന്ന് നിവേദനത്തിൽ പറയുന്നു.

പോലീസ് നടപ്പാക്കിയിട്ടുള്ള അഭൂത പൂര്‍വമായ നിയന്ത്രണങ്ങള്‍ ഭക്തരുടെ ധാര്‍മികമായ എല്ലാ അവകാശങ്ങളെയും നിഷേധിയ്ക്കുകയും പൂജയും വഴിപാടും നടത്തുവാന്‍ ഭക്തര്‍ക്ക് അവസരം നിഷേധിയ്ക്കുകയും ചെയ്യുകയുമാണ്.ഭക്തര്‍ ശബരിമലയിലേയ്ക്ക് വരുന്നത് നിരുത്സാഹപ്പെടുത്തുന്നതിനായി അവര്‍ക്കുള്ള അടിസ്ഥാന സൗകര്യങ്ങള്‍ പോലും നിഷേധിയ്ക്കുന്ന നിലപാടാണ് അധികൃതര്‍ കൈക്കൊണ്ടിട്ടുള്ളത് എന്നും കേന്ദ്ര ധനകാര്യ ഷിപ്പിംഗ് സഹ മന്ത്രി പൊന്‍ രാധാകൃഷ്ണനു മുന്‍പില്‍ സമര്‍പ്പിച്ച മെമ്മോറാണ്ടത്തിൽ പറയുന്നു.