പന്തളം കൊട്ടാരത്തിനും തന്ത്രി കുടുംബത്തിനുമെതിരെ മുഖ്യമന്ത്രി പിണറായി വിജയന്‍ നിയമസഭയിലും ആഞ്ഞടിച്ചു. ശബരിമലയിലെ യുവതീപ്രവേശനത്തെ പ്രതിപക്ഷ പാര്‍ട്ടികള്‍ ഉള്‍പ്പെടെ സ്വാഗതം ചെയ്തതാണ്, എന്നാല്‍ പന്തളം കൊട്ടാരവും തന്ത്രി കുടുംബവും ആളുകളെ കൂട്ടി പ്രതിഷേധം സംഘടിപ്പിച്ചതോടെ ഇവര്‍ മലക്കംമറിഞ്ഞെന്നും മുഖ്യമന്ത്രി നിയമസഭയില്‍ വ്യക്തമാക്കി. യുവതികള്‍ ദര്‍ശനത്തിനെത്തിയാല്‍ ശബരിമല ക്ഷേത്രം പൂട്ടി താക്കോല്‍ കൈമാറുമെന്ന് ഭീഷണിമുഴക്കി, വിശ്വാസികളുടെ ആരാധനാ സ്വാതന്ത്ര്യം തടസപ്പെടുത്താന്‍ ശ്രമിച്ച തന്ത്രി കണ്ഠരര് രാജീവര്‍ക്കെതിരെയായ നടപടി ദേവസ്വം ബോര്‍ഡിന്റെ പരിഗണനയിലാണെന്നും മുഖ്യമന്ത്രി അറിയിച്ചു. 

അറസ്റ്റിലായ പ്രതികളുടെ രാഷ്ട്രീയം പരിശോധിച്ചാല്‍ പ്രതികള്‍ ആര്‍എസ്,എസ്, ബി ജെ പി പ്രവര്‍ത്തകരാണെന്ന് മനസിലാകുമെന്നും മുഖ്യമന്ത്രി പറഞ്ഞു. രണ്ടാംതവണയാണ് മുഖ്യമന്ത്രി പന്തളം കൊട്ടാരത്തിനും തന്ത്രി കുടുംബത്തിനും തന്ത്രിക്കും എതിരെ പരസ്യവിമര്‍ശനം നടത്തുന്നത്. തന്ത്രി ക്ഷേത്രം അടച്ചിട്ടാല്‍ വേറെ ആളെ വയ്ക്കുമെന്ന് ലോകനാര്‍ക്കാവ് ക്ഷേത്രത്തില്‍ പണ്ട് രാജാവ് സ്വീകരിച്ച നടപടി ഉദാഹരിച്ച് മുഖ്യമന്ത്രി നിലപാട് വ്യക്തമാക്കിയിരുന്നു. അയ്യപ്പന്‍ നൈഷ്ഠികബ്രഹ്മചാരിയാണെങ്കില്‍ തന്ത്രിയും നൈഷ്ഠിക ബ്രഹ്മചാരിയായിരിക്കണമെന്നും ഇവിടുത്തെ തന്ത്രി ഗൃഹസ്ഥാശ്രമവും കടന്ന് വ്യവിചാരം വരെ പോയ കഥ എല്ലാവര്‍ക്കും അറിയാമെന്നും മോഹനര്‍ക്കെതിരായ ബ്ലാക്‌മെയിലിംഗ് കേസിനെ അടിസ്ഥാനമാക്കി മുഖ്യമന്ത്രി വിമര്‍ശിച്ചിരുന്നു.

പന്തളം കൊട്ടാരത്തിന് ശബരിമല ക്ഷേത്രത്തിന്റെ ഉടമസ്ഥാവകാശം ഇല്ലെന്നും ചില ആചാരങ്ങള്‍ അവര്‍ നടത്തുന്നുണ്ടെന്നും അതിന് സര്‍ക്കാര്‍ തടസമില്ലെന്നും മുഖ്യമന്ത്രി പറഞ്ഞിരുന്നു. ഐ.ജി ശ്രീജിത്തിന്റെ നേതൃത്വത്തില്‍ രഹ്നാഫാത്തിമയെ നടപ്പന്തല്‍ വരെ എത്തിച്ചപ്പോള്‍ തന്ത്രി രാജീവരര് വിളിച്ചെന്നും നടഅടച്ചിട്ടാല്‍ കോടതിയലക്ഷ്യമാവില്ലേ എന്ന് തന്നോട് ചോദിച്ചെന്നും അങ്ങനെ സംഭവിക്കില്ലെന്നും കേസ് എടുക്കുന്നെങ്കില്‍ ആദ്യം എനിക്കെതിരെയാകുമെന്നും പതിനായിരങ്ങള്‍ തിരുമേനിക്കൊപ്പം ഉണ്ടാകുമെന്നും ബി.ജെ.പി അധ്യക്ഷന്‍ ശ്രീധരന്‍പിള്ള യുവമോര്‍ച്ചാ നേതൃയോഗത്തില്‍ വെളിപ്പെടുത്തിയപ്പോഴും മുഖ്യമന്ത്രി തന്ത്രിക്കും പന്തളം കൊട്ടാരത്തിനും എതിരെ രംഗത്ത് വന്നിരുന്നു.

തന്ത്രിയും പന്തളം കൊട്ടാരവും താന്‍ ആദ്യം വിളിച്ച യോഗത്തില്‍ പങ്കെടുക്കാതിരുന്നത് എന്തുകൊണ്ടാണെന്ന് ശ്രീധരന്‍പിള്ളയുടെ വെളിപ്പെടുത്തലില്‍ നിന്ന് മനസിലായെന്നും താഴമണ്‍കുടുംബം വരുന്നതിന് മുമ്പും ശബരിമലക്ഷേത്രം ഉണ്ടായിരുന്നെന്നും അവര്‍ ആന്ധ്രയില്‍ നിന്നെത്തിയ ബ്രാഹ്മണരാണെന്നും മുഖ്യമന്ത്രി വെളിപ്പെടുത്തിയിരുന്നു. പിന്നീട് മുഖ്യമന്ത്രി വിളിച്ച ചര്‍ച്ചയില്‍ രണ്ട് കൂട്ടരും പങ്കെടുത്തിരുന്നു. അവരുടെ നിര്‍ദ്ദേശപ്രകാരമാണ് ദേവസ്വംബോര്‍ഡ് സുപ്രീംകോടതിയില്‍ സാവകാശ ഹര്‍ജി നല്‍കിയത്.