ഫിഫ ലോകകപ്പ്...കരുത്തരായ ഇക്വഡോറിനെ ഏകപക്ഷീയമായ ഒരു ഗോളിന് തകര്ത്ത് ഐവറി കോസ്റ്റ്
ഫിഫ ലോകകപ്പ് ഗ്രൂപ്പ് ഇയില് ലാറ്റിന് അമേരിക്കന് കരുത്തരായ ഇക്വഡോറിനെ ഏകപക്ഷീയമായ ഒരു ഗോളിന് തകര്ത്ത് ഐവറി കോസ്റ്റ്. ഫിലാഡല്ഫിയയിലെ ലിങ്കണ് ഫിനാന്ഷ്യല് ഫീല്ഡ് സ്റ്റേഡിയത്തില് നടന്ന കടുത്ത പോരാട്ടത്തില് 90-ാം മിനിറ്റില് മാഞ്ചസ്റ്റര് യുണൈറ്റഡ് താരം അമദ് ദിയാലോ നേടിയ ഗോളാണ് ആഫ്രിക്കന് വമ്പന്മാര്ക്ക് ചരിത്രവിജയം സമ്മാനിച്ചത്.
ഈ പരാജയത്തോടെ ഇക്വഡോറിന്റെ തുടര്ച്ചയായ 19 മത്സരങ്ങളുടെ അപരാജിത കുതിപ്പിനാണ് വിരാമമായത്. മത്സരത്തിന്റെ ആദ്യ പകുതിയില് ഇക്വഡോര് കളം നിറഞ്ഞു കളിച്ചെങ്കിലും രണ്ടാം പകുതിയില് തന്ത്രപരമായ മാറ്റങ്ങളിലൂടെ ഐവറി കോസ്റ്റ് കളി കൈപ്പിടിയിലൊതുക്കി. മത്സരത്തിന്റെ ആദ്യ അരമണിക്കൂറില് ഇക്വഡോര് ആണ് പൂര്ണ ആധിപത്യം പുലര്ത്തിയത്.
എന്നാല് നിര്ഭാഗ്യം അവരുടെ മുന്നേറ്റങ്ങള്ക്ക് വിലങ്ങുതടിയായി. കളിയുടെ ആദ്യ പകുതിയില് ഇക്വഡോര് താരങ്ങളായ ജോണ് യെബോവയുടെയും അലന് മിന്ഡയുടെയും തകര്പ്പന് ഷോട്ടുകള് ഐവറി കോസ്റ്റ് ഗോള്പോസ്റ്റിന്റെ ക്രോസ്സ്ബാറില് തട്ടിത്തെറിക്കുകയായിരുന്നു. രണ്ടാം പകുതിയില് കളിയിലേക്ക് ശക്തമായി തിരിച്ചുവന്ന ഐവറി കോസ്റ്റിനും ഒരു സുവര്ണ്ണാവസരം നഷ്ടമായി. എലി വാഹിയുടെ ഒരു മികച്ച ശ്രമം ഇക്വഡോര് പോസ്റ്റില് തട്ടി മടങ്ങി. മത്സരം സമനിലയിലേക്ക് എന്ന് ഉറപ്പിച്ചിരുന്ന 90-ാം മിനിറ്റിലാണ് കളിയിലെ ഒരേയൊരു ഗോള് പിറന്നത്.
"
https://www.facebook.com/Malayalivartha
