ലഹരിമരുന്ന് നല്കി 24 വയസ്സുകാരിയെ കൂട്ടബലാത്സംഗത്തിന് ഇരയാക്കി
പശുക്കള്ക്ക് പുല്ലു ശേഖരിക്കാന് പോയ 24 വയസ്സുകാരിയെ അഞ്ചംഗ സംഘം ലഹരിമരുന്ന് നല്കി കൂട്ടബലാത്സംഗം ചെയ്തതായി പരാതി. ഉത്തര്പ്രദേശിലെ മുസാഫര്നഗറില് ചാര്ത്താവല് പൊലീസ് സ്റ്റേഷന് പരിധിയിലെ ഗ്രാമത്തിലാണ് സംഭവം.
കൃഷിയിടത്തില് പുല്ലു ശേഖരിക്കാന് പോയ യുവതിയെ പ്രതികള് ലഹരിപദാര്ഥം നല്കി അബോധാവസ്ഥയിലാക്കിയ ശേഷമാണ് ക്രൂരതയ്ക്ക് ഇരയാക്കിയതെന്നാണ് സംഭവത്തെക്കുറിച്ച് പൊലീസ് പറയുന്നത്. രാവിലെ പുല്ലു ശേഖരിക്കാന് പോയ യുവതി വൈകിട്ടും വീട്ടില് തിരിച്ചെത്താതിരുന്നതിനെ തുടര്ന്ന് ബന്ധുക്കള് നടത്തിയ തിരച്ചിലിലാണ് സമീപത്തെ വനപ്രദേശത്തുനിന്ന് യുവതിയെ കണ്ടെത്തിയത്.
ഇരയായ യുവതിയുടെ പരാതിയുടെ അടിസ്ഥാനത്തില് ഉമര് എന്നയാള്ക്കെതിരെയും ഇയാളുടെ കൂട്ടാളികള്ക്കെതിരെയും ഭാരതീയ ന്യായ സംഹിതയിലെ വകുപ്പുകള് പ്രകാരം പൊലീസ് കേസ് റജിസ്റ്റര് ചെയ്തു. പ്രതികള് നിലവില് ഒളിവിലാണ്. യുവതിയെ നിലവില് വിദഗ്ധ ചികിത്സയ്ക്കായി ആശുപത്രിയില് പ്രവേശിപ്പിച്ചു. ഒളിവിലുള്ള പ്രതികളെ കണ്ടെത്താനായി മൂന്ന് പ്രത്യേക പൊലീസ് സംഘങ്ങളെ നിയോഗിച്ചിട്ടുണ്ടെന്നും അന്വേഷണം ഊര്ജിതമായി പുരോഗമിക്കുകയാണെന്നും സീനിയര് പൊലീസ് സൂപ്രണ്ട് സഞ്ജയ് കുമാര് അറിയിച്ചു.
https://www.facebook.com/Malayalivartha
