മഞ്ചേശ്വരം നിയമസഭാ തിരഞ്ഞെടുപ്പില്‍ കള്ളവോട്ട് നടന്നുവെന്നാരോപിച്ച് ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ സമര്‍പ്പിച്ച ഹര്‍ജി ഇന്ന് ഹൈക്കോടതിയുടെ പരിഗണനയില്‍ . തിരഞ്ഞെടുപ്പില്‍ വിജയിച്ച മുസ്‌ലിം ലീഗിലെ പി.ബി.അബ്ദുല്‍ റസാഖിന് വേണ്ടി വ്യാപകമായി കള്ളവോട്ട് നടന്നുവെന്നും തിരഞ്ഞെടുപ്പ് റദ്ദാക്കണമെന്നുമാണ് സുരേന്ദ്രന്റെ ആവശ്യം. കേസില്‍ കക്ഷി ചേരണമെന്നാവശ്യപ്പെട്ട് അബ്ദുള്‍ റസാഖിന്റെ മകന്‍ സമര്‍പ്പിച്ച ഹര്‍ജിയും കോടതി ഇന്ന് പരിഗണിക്കും. കേരളം ഉറ്റുനോക്കിയ തിരഞ്ഞടുപ്പായിരുന്നു കഴിഞ്ഞതവണ മഞ്ചേശ്വരം മണ്ഡലത്തിലേത്. കേരളത്തെ മുഴുവന്‍ ആകാംക്ഷയുടെ മുള്‍മുനയില്‍ നിര്‍ത്തി ഒടുവില്‍ ഫോട്ടോഫിനിഷില്‍ പി.ബി.അബ്ദുള്‍ റസാഖ് 89 വോട്ടുകള്‍ക്ക് വിജയിച്ചതായി തിരഞ്ഞെടുപ്പ് കമ്മിഷന്‍ പ്രഖ്യാപിച്ചു.
മഞ്ചേശ്വരം മണ്ഡലത്തില്‍ ഉജ്വല പോരാട്ടം കാഴ്ചവച്ച ബി.ജെ.പിയുടെ കെ.സുരേന്ദ്രനെ ഭാഗ്യം തുണച്ചില്ല. 56,870 വോട്ട് അബ്ദുല്‍ റസാഖിന് ലഭിച്ചപ്പോള്‍ സുരേന്ദ്രന് 56,781 വോട്ടുകള്‍ ലഭിച്ചു. മൂന്നാം സ്ഥാനത്തേക്ക് തള്ളപ്പെട്ട സി.പി.എമ്മിലെ സി.എച്ച് കുഞ്ഞമ്പുവിന് 42,565 വോട്ടാണ് ലഭിച്ചത്. ഇതിന് പിന്നാലെ തിരഞ്ഞെടുപ്പില്‍ കള്ളവോട്ട് നടന്നുവെന്ന് ആരോപിച്ച് സുരേന്ദ്രന്‍ ഹൈക്കോടതിയെ സമീപിച്ചു. ഈ കേസില്‍ അന്തിമവിധി വരാന്‍ ഇരിക്കെയാണ് പി.ബി.അബ്ദുല്‍ റസാഖിന്റെ വിയോഗം.

തുടര്‍ന്ന് കേസ് ഇനിയും തുടരണമോയെന്ന് ഹൈക്കോടതിയെ ചോദിച്ചിരുന്നുവെങ്കിലും പിന്മാറാന്‍ തയ്യാറല്ലെന്നാണ് സുരേന്ദ്രന്റെ നിലപാട്.