പോലീസിന്റെ രഹസ്യ റിപ്പോര്ട്ട് ഞെട്ടിക്കുന്നത്... ശബരിമലയില് 40 യുവതികളെ എത്തിക്കാന് തമിഴ്നാട്ടിലെ ഹൈന്ദവസംഘടന തീരുമാനം; സംഘടനയെയും നേതാക്കളെയും കുറിച്ചുള്ള വിവരങ്ങള് പോലീസിന്
ശബരിമലയിലേക്ക് അമ്പതുവയസ്സ് തികയാത്ത 40 സ്ത്രീകളെ എത്തിക്കാന് തമിഴ്നാട്ടിലെ ഹൈന്ദവസംഘടന പദ്ധതിയിടുന്നതായി പോലീസിന്റെ രഹസ്യറിപ്പോര്ട്ട്. നിലയ്ക്കലിലെയും പമ്പയിലെയും സന്നിധാനത്തെയും സ്പെഷ്യല് പോലീസ് ഓഫീസര്മാര്ക്കും പത്തനംതിട്ട, കോട്ടയം എസ്.പി.മാര്ക്കുമാണ് പോലീസ് ദക്ഷിണമേഖലാ എ.ഡി.ജി.പി. അനില്കാന്ത് രഹസ്യറിപ്പോര്ട്ട് നല്കിയത്. സംഘടനയെയും നേതാക്കളെയും കുറിച്ചുള്ള വിവരങ്ങളും അതിലുണ്ട്.
എരുമേലി വാവരുപള്ളിയിലെ പ്രാര്ഥനാലയത്തില് കടക്കുകയാണ് യുവതികളുടെ ലക്ഷ്യമെന്ന് റിപ്പോര്ട്ടില് പറയുന്നു. സന്നിധാനത്തു പ്രവേശിക്കാന് ശ്രമിച്ചേക്കാമെന്നും സൂചനയുണ്ട്.
ഹിന്ദു മക്കള് കക്ഷി എന്ന സംഘടനയുടെ തമിഴ്നാട് സംസ്ഥാന പ്രസിഡന്റ് അര്ജുന് സമ്പത്ത്, തിരുവള്ളൂര് ജില്ലാ പ്രസിഡന്റ് സോമു രാജശേഖര് എന്നിവരാണ് നേതൃത്വം നല്കുന്നത്. ഒന്നാംഘട്ടമായാണ് 40 പേരെ അയയ്ക്കുന്നതെന്നാണ് കുറിപ്പിലുള്ളത്.
ജാഗ്രതപുലര്ത്തണമെന്നും തുടര്നടപടികള് സ്വീകരിക്കണമെന്നും സുരക്ഷാച്ചുമതലയുള്ള ഉന്നത പോലീസുദ്യോഗസ്ഥര്ക്ക് എ.ഡി.ജി.പി. നിര്ദേശം നല്കി. ഒന്നിലേറെ ഹൈന്ദവസംഘടനകള് ഇത്തരത്തില് നീക്കംനടത്തുന്നതായി പോലീസിന് സംശയമുണ്ട്.
ശബരിമലയിലെ യുവതീപ്രവേശ വിഷയത്തിലേക്ക് എരുമേലി വാവരുപള്ളിയെക്കൂടി വലിച്ചിഴയ്ക്കുന്നത് സ്ഥിതി കൂടുതല് സങ്കീര്ണമാക്കും എന്നാണ് വിലയിരുത്തല്. യുവതികള് വരുന്നത് എപ്പോഴാണ് എന്നതിന്റെ വിശദാംശങ്ങളൊന്നും തിങ്കളാഴ്ച എ.ഡി.ജി.പി. അയച്ച റിപ്പോര്ട്ടിലില്ല.
അതേസമയം വനിതാ മതില് അടക്കം ശബരിമല പ്രശ്നത്തില് സംസ്ഥാന സര്ക്കാര് നടത്താനിരിക്കുന്ന പരിപാടികളെ പ്രതിരോധിക്കാന് സംഘപരിവാര് നീക്കം. ഇത്തരം പരിപാടികളില് പങ്കെടുക്കുന്നതിലൂടെ ആചാരലംഘനത്തിനാണ് നീക്കമെന്നും അതില് നിന്ന് പിന്മാറണമെന്നും ആവശ്യപ്പെട്ട് വെള്ളാപ്പള്ളി അടക്കമുള്ള സാമുദായിക നേതാക്കളെ കാണാനാണ് ശബരിമല കര്മ സമിതിയുടെ നീക്കം. നവോത്ഥാന യോഗമുള്പ്പടെയുള്ള പരിപാടികള്ക്കെതിരെ കോടതിയെ സമീപിക്കാനും നീക്കമുണ്ട്.
വനിതാ മതില് അടക്കമുള്ള പരിപാടികള് ശബരിമല പ്രക്ഷോഭങ്ങള്ക്ക് പ്രതിരോധമെന്നവണ്ണമാണ് സര്ക്കാര് സംഘടിപ്പിക്കുന്നത്. എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് ഉള്പ്പടെയുടെ ഒരു വിഭാഗം ഹിന്ദു സംഘടനാ നേതാക്കളുടെ പിന്തുണയും സര്ക്കിരിന് ലഭിച്ചിരുന്നു. ഈ സാഹചര്യത്തിലാണ് സര്ക്കാര് നീക്കങ്ങളെ പ്രതിരോധിക്കാന് സംഘപരിവാര് തീരുമാനിച്ചത്. വെള്ളാപ്പള്ളി അടക്കം സര്ക്കാര് വിളിച്ച യോഗത്തില് പങ്കെടുത്ത സാമുദായിക സംഘടനാ നേതാക്കളെ നേരില് കണ്ട് കാര്യങ്ങള് ചര്ച്ച ചെയ്യാന് തീരുമാനിച്ചതായി ശബരിമല കര്മ സമിതി വ്യക്തമാക്കി. ഏവരേയും തെറ്റിദ്ധരിപ്പിച്ച് ആചാരലംഘനത്തിനുള്ള നീക്കമാണ് സര്ക്കാര് നടത്തുന്നതെന്ന വാദമാണ് ഇവര് മുന്നോട്ടുവയ്ക്കുന്നത്.വിഷയങ്ങള് ചര്ച്ച ചെയ്യാന് നാളെ കൊച്ചിയില് യോഗം ചേരും.
ശബരിമല കര്മ സമിതി നവോത്ഥാന സംഘടനകളുടെ യോഗം വിളിച്ച് സര്ക്കാര് നടത്തുന്ന പരിപാടികളെ നിയമപരമായി നേരിടാനും തീരുമാനമുണ്ട്. പാര്ട്ടി താത്പര്യങ്ങള് സംരക്ഷിക്കാന് സര്ക്കാര് തല യോഗം വിളിച്ചത്,വനിതാ മതിലിന്റെ നടത്തിപ്പ് ഉള്പ്പടെയുള്ള കാര്യങ്ങള് ചൂണ്ടിക്കാട്ടി കോടതിയെ സമീപിക്കാനാണ് നീക്കം.
https://www.facebook.com/Malayalivartha
