ഇരുപത്തിമൂന്നാമത് കേരള രാജ്യാന്തര ചലച്ചിത്രമേളയ്ക്ക് ഇന്നു തുടക്കം.... നിശാഗന്ധിയില് വൈകിട്ട് ആറിന് മുഖ്യമന്ത്രി പിണറായി വിജയന് മേളക്ക് തിരിതെളിക്കും
23ാമത് കേരള രാജ്യാന്തര ചലച്ചിത്രമേള (ഐ.എഫ്.എഫ്.കെ)യ്ക്ക് ഇന്നു തുടക്കം. നിശാഗന്ധിയില് വൈകിട്ട് ആറിന് മുഖ്യമന്ത്രി പിണറായി വിജയന് മേളക്ക് തിരിതെളിക്കും. മന്ത്രി എ.കെ. ബാലന് അധ്യക്ഷത വഹിക്കുന്ന ചടങ്ങില് ബംഗാളി സംവിധായകന് ബുദ്ധദേവ്ദാസ് ഗുപ്ത മുഖ്യാതിഥിയാകും. നടിയും സംവിധായികയുമായ നന്ദിതാ ദാസ്, ചലച്ചിത്ര അക്കാദമി ചെയര്മാന് കമല് തുടങ്ങിയവര് പങ്കെടുക്കും.
സമഗ്ര സംഭാവനക്കുള്ള പുരസ്കാരം ഇറാനിയന് സംവിധായകന് മജീദ് മജീദിക്ക് മുഖ്യമന്ത്രി സമ്മാനിക്കും. അഞ്ച് ലക്ഷം രൂപയും ശില്പവും പ്രശസ്തിപത്രവും അടങ്ങുന്നതാണ് പുരസ്കാരം. തുടര്ന്ന് ഇറാനിയന് സംവിധായകന് അസ്ഗര് ഫര്ഹാദിയുടെ 'എവരിബഡി നോസ്' പ്രദര്ശിപ്പിക്കും. ദുരന്തം വിതച്ച ജീവിതങ്ങള്ക്ക് അതിജീവനസന്ദേശവുമായി 164 ചിത്രങ്ങളാണ് പ്രദര്ശിപ്പിക്കുക. പ്രതിസന്ധികളെ അതിജീവിച്ച് മുന്നേറാന് പ്രചോദനമാകുന്ന ആറ് ചിത്രങ്ങളടങ്ങിയ 'ദ ഹ്യൂമന് സ്പിരിറ്റ്: ഫിലിംസ് ഓണ് ഹോപ് ആന്ഡ് റീബില്ഡിങ്' ഉള്പ്പെടെ 11 വിഭാഗങ്ങളാണ് മേളയില് ഒരുക്കിയിട്ടുള്ളത്. മെല് ഗിബ്സണിന്റെ 'അപ്പോകാലിപ്റ്റോ', ജയരാജിന്റെ 'വെള്ളപ്പൊക്കത്തില്', ഫിഷര് സ്റ്റീവന്സിന്റെ 'ബിഫോര് ദി ഫ്ലഡ്', 'മണ്ടേല: ലോങ് വാക് ടു ഫ്രീഡം' തുടങ്ങിയ ആറ് ചിത്രങ്ങളാണ് ഹോപ് ആന്ഡ് റീബില്ഡിങ് വിഭാഗത്തില് പ്രദര്ശിപ്പിക്കുക. 'സുഡാനി ഫ്രം നൈജീരിയ' എന്നീ മലയാളചിത്രങ്ങള് ഉള്പ്പെടെ 14 എണ്ണമാണ് മത്സരവിഭാഗത്തിലുള്ളത്. 13 വരെ നഗരത്തിലെ 13 തിയറ്ററുകളിലായാണ് മേള.
മേളയുടെ ഡെലിഗേറ്റ് ഫീസ് 650 രൂപയില് നിന്ന് 2000 രൂപയാക്കിയപ്പോള് സിനിമ കാണേണ്ടെന്ന് തീരുമാനിച്ചവരേറെ. മുന് വര്ഷങ്ങളില് 12,000 മുതല് 13,000 വരെ പാസുകള് വിതരണം ചെയ്ത സ്ഥാനത്ത് ഇത്തവണ വിറ്റുപോയത് 7500ഓളം പാസുകള് മാത്രമാണ്. മേളക്കായി അനുവദിച്ചിരുന്ന ആറരക്കോടി പ്രളയത്തെതുടര്ന്ന് സര്ക്കാര് റദ്ദ് ചെയ്തതോടെയാണ് വിദ്യാര്ഥികള്ക്കടക്കം ഫീസ് വര്ധിപ്പിച്ചും സ്പോണ്സര്ഷിപ് വഴിയും മേള നടത്താന് സാംസ്കാരിക വകുപ്പ് തീരുമാനിച്ചത്.
എന്നാല്, നല്ലൊരു ശതമാനം ആരാധകവൃന്ദം മേളയെ കൈയൊഴിഞ്ഞതോടെ എന്ത് ചെയ്യണമെന്നറിയാത്ത അവസ്ഥയിലാണ് ചലച്ചിത്ര അക്കാദമി. പാസ് വില്പന കുറഞ്ഞതിനെത്തുടര്ന്ന് ചലച്ചിത്രമേളയുടെ ചരിത്രത്തില് ആദ്യമായി 1000 രൂപക്ക് ത്രിദിന പാസ് സൗകര്യവും പരീക്ഷിച്ചെങ്കിലും അതും ഫലം കണ്ടിട്ടില്ല. ഫണ്ടിന്റെ അപര്യാപ്തതയെ തുടര്ന്ന് ഈ മാസം ഒമ്പതുവരെ ഓണ്ലൈന് രജിസ്ട്രേഷന് തുടരാന് അക്കാദമി തീരുമാനിച്ചിട്ടുണ്ട്.
https://www.facebook.com/Malayalivartha
