59ാമത് സംസ്ഥാന സ്കൂള് കലോത്സവത്തിന് കൊടിയേറി.. പൊതു വിദ്യാഭ്യാസ ഡയറക്ടര് പതാക ഉയര്ത്തി, ആദ്യദിനം 62 ഇനങ്ങളില് മത്സരം, മത്സരങ്ങള് പൂര്ണ്ണ വിജിലന്സ് നിരീക്ഷണത്തില്, വിധി നിര്ണ്ണയം കുറ്റമറ്റതും സുതാര്യവുമാക്കുമെന്നും മന്ത്രി
59ാമത് സംസ്ഥാന സ്കൂള് കലോത്സവത്തിന് തുടക്കമായി. പൊതു വിദ്യാഭ്യാസ ഡയറക്ടര് പതാക ഉയര്ത്തി. പ്രളയദുരന്തത്തിന്റെ പശ്ചാത്തലത്തില് ചെലവുചുരുക്കലിന് പതിവ് പഞ്ചദിന മേളയെ മൂന്നു ദിവസമാക്കിയത്. കരയും കടലും കായലും സമ്മേളിക്കുന്ന ചരിത്രനഗരിയില് 30 വേദികളിലായി വന്കരയിലെ ഏറ്റവും വലിയ കലാമാമാങ്കത്തിലേക്ക് ആട്ടവും പാട്ടുമൊക്കെ ഇനി മൂന്നുനാള് അരങ്ങുതിമിര്ത്താടും. ആദ്യ ദിനം 62ഇനങ്ങളിലാണ് മത്സരം. മത്സരങ്ങള് പൂര്ണ്ണ വിജിലന്സ് നിരീക്ഷണത്തിലായിരിക്കും. വിധി നിര്ണ്ണയം കുറ്റമറ്റതും സുതാര്യവുമാക്കുമെന്നും മന്ത്രി.
രാവിലെ 8.30ന് സംഘാടകസമിതി ഓഫിസ് പ്രവര്ത്തിക്കുന്ന ഗവ. ഗേള്സ് ഹയര് സെക്കന്ഡറി സ്കൂളില് സംസ്ഥാന കലോത്സവ ജനറല് കോഓഡിനേറ്റര് കൂടിയായ പൊതുവിദ്യാഭ്യാസ ഡയറക്ടര് കെ.വി. മോഹന്കുമാര് പതാക ഉയര്ത്തി. പ്രധാന വേദിയായ ലിയോ തേര്ട്ടീന്ത് ഹയര് സെക്കന്ഡറി സ്കൂളില് 59 കുട്ടികള് ചേര്ന്ന് കലോത്സവദീപം തെളിച്ചു. 29 വേദികളില് രാവിലെ കൃത്യം ഒമ്പതിനുതന്നെ മത്സരങ്ങള് തുടങ്ങും. മത്സര ദിനങ്ങള് കുറച്ചതിനാല് വേദികള് പരമാവധി വര്ധിപ്പിച്ച് പരിപാടികള് തീര്ക്കാനുള്ള തീവ്രശ്രമത്തിലാണ് സംഘാടക സമിതി.
വ്യാഴാഴ്ച വൈകീട്ടോടെ എത്തിത്തുടങ്ങിയ മത്സരാര്ഥികള്ക്ക് കെ.എസ്.ആര്.ടി.സി ബസ് സ്റ്റാന്ഡിലും റെയില്വേ സ്റ്റേഷനിലും വമ്പിച്ച സ്വീകരണം ഒരുക്കിയിരുന്നു. 10,000 കുട്ടികളാണ് ഇക്കുറി വിവിധ മത്സരങ്ങളില് പങ്കെടുക്കാന് എത്തുക
"
https://www.facebook.com/Malayalivartha
