വസ്ത്രധാരണത്തേയും സ്വത്വത്തേയും അപമാനിച്ചു; കേരള പോലീസിനെതിരെ പരാതിയുമായി ട്രാന്സ്ജെന്ഡറുകൾ
സുപ്രീംകോടതി വിധിയുടെ പശ്ചാത്തലത്തിൽ ശബരിമലയിലെത്തിയ ട്രാന്സ്ജെന്ഡർ യുവതികളെ പോലീസ് അപമാനിച്ചെന്ന് പരാതി. കാഞ്ഞിരപ്പള്ളി ഡിവൈഎസ്പിക്കും എരുമേലി പൊലീസിനുമെതിരെ കോട്ടയം എസ്പിക്ക് ഇവര് പരാതി കൈമാറി.
വസ്ത്രധാരണത്തേയും സ്വത്വത്തേയും പൊലീസ് അപമാനിച്ചെന്ന് കാണിച്ചാണ് ട്രാന്സ്ജെന്ഡറുകള് പരാതി നല്കിയിരിക്കുന്നത്. ശബരിമലയ്ക്ക് പോകാന് അനുമതി തേടി ഹൈക്കോടതി നിയോഗിച്ച മൂന്നംഗ നിരീക്ഷണ സമിതിയെ സമീപിക്കുമെന്നും ട്രാന്സ്ജെന്ഡറുകള് അറിയിച്ചു. ഇന്ന് വെളുപ്പിന് നാലുമണിയോടെയായിരുന്നു രഞ്ജു, അനന്യ, അവന്തിക, തൃപ്തി ഷെട്ടി അന്നിവരടങ്ങുന്ന സംഘം ശബരിമല ദര്ശനത്തിനെത്തിയത്.
ഏഴ് പേരടങ്ങുന്ന സംഘം ശബരിമല ദര്ശനത്തിന് സുരക്ഷ നല്കണമെന്നാവശ്യപ്പെട്ട് കഴിഞ്ഞ ദിവസം പൊലീസിന് കത്ത് നല്കിയിരുന്നു. എന്നാല്, പൊലീസ് സംരക്ഷണം നല്കാത്തതിനെ തുടര്ന്ന് ദര്ശനം നടത്താനാകാതെ സംഘം തിരികെ പോകുകയായിരുന്നു. നാലംഗസംഘത്തെ പൊലീസ് സംരക്ഷണയിലാണ് കോട്ടയത്തേക്ക് തിരിച്ചയച്ചത്. സ്ത്രീ വേഷം മാറ്റണമെന്ന പൊലീസിന്റെ ആവശ്യം തള്ളിയതിനെ തുടര്ന്നാണ് നടപടി.
ഇതേ തുടര്ന്ന് എരുമേലി പൊലീസ് തങ്ങളെ ബന്ധപ്പെടുകയായിരുന്നെന്ന് ട്രാന്സ്ജെന്ഡേഴ്സ് പറഞ്ഞു. സ്ത്രീ വേഷം അണിഞ്ഞ് ശബരിമലയിലേക്ക് പോകുന്നത് പ്രശ്നങ്ങള്ക്കിടയാക്കുമെന്ന് പൊലീസ് ഇവരെ അറിയിച്ചു. എന്നാല്, വേഷം മാറ്റാന് ഇവര് തയ്യാറായില്ല. ഇതേ തുടര്ന്നാണ് ഇവരെ കോട്ടയത്തേക്ക് തിരിച്ചയക്കുകയായിരുന്നെന്നാണ് പൊലീസ് വിശദീകരണം നൽകിയത്.
https://www.facebook.com/Malayalivartha
