കടവന്ത്രയില്‍ നടി ലീനാ മരിയാ പോളിന്റെ ബ്യൂട്ടി പാര്‍ലറിനു നേരെയുണ്ടായ വെടിവെയ്പ്പില്‍ അന്വേഷണം പുരോഗമിക്കുകയാണ്. ആക്രമണത്തിനു പിന്നില്‍ അധോലോക സംഘമാണെന്നും, സിനിമയ്ക്കുള്ളിലുള്ളവര്‍ക്ക് ഇതുമായി ബന്ധമുണ്ടെന്നും റിപ്പോര്‍ട്ടുകള്‍ വന്നിരുന്നു. അധോലോക നായകന്‍ രവി പൂജാരിയുടെ പേരില്‍ ലീനയ്ക്കു വന്ന ഫോണ്‍കോളുകള്‍ കേന്ദ്രീകരിച്ച് അന്വേഷണം നടക്കുകയാണെന്നും ഉടന്‍ പ്രതികളെ കണ്ടെത്തുമെന്നും പോലീസ് പറയുന്നു. എന്നാല്‍ ഈ വിഷയത്തില്‍ മാധ്യമങ്ങളെ വിമര്‍ശിച്ച് രംഗത്തെത്തിയിരിക്കുകയാണ് ലീനാ.

'സത്യം പുറത്തു കൊണ്ടു വരുന്നതിനു പകരം എന്റെ വ്യക്തിജീവിതം ചികയാനാണ് മാധ്യമങ്ങള്‍ ശ്രമിക്കുന്നത്. എന്റെ ശരീരത്തിലും വ്യക്തിപരമായ കാര്യങ്ങളിലും കേന്ദ്രീകരിച്ച് വഴിതിരിച്ചു വിടാനാണ് മാധ്യമങ്ങള്‍ക്ക് തിടുക്കം. ഭര്‍ത്താവ് സുകേഷ് ചന്ദ്രശേഖറുമായുള്ള ബന്ധത്തിലേയ്ക്കാണ് ഇവര്‍ കണ്ണോടിക്കുന്നത്' ലീന കുറ്റപ്പെടുത്തി. 'പാര്‍ലറില്‍ വെടിവെയ്പ്പു നടത്തിയ ആ രണ്ടുപേര്‍ ഇപ്പോള്‍ എവിടെയാണ്?. അവരുടെ ദൃശ്യങ്ങള്‍ സിസിടിവിയില്‍ പതിഞ്ഞിരുന്നു. ഇതിനു പിന്നാലെ പോയി സത്യം പുറത്തുകൊണ്ടു വരാന്‍ ശ്രമിക്കുന്നതിനു പകരം എന്റെ ജീവിതം വര്‍ണ്ണിക്കാനാണ് ശ്രമിക്കുന്നത്. ഇത് യഥാര്‍ത്ഥ പ്രതികള്‍ക്ക് സുരക്ഷിതമായി ഒളിച്ചു താമസിക്കാനുള്ള അവസരം നല്‍കുകയാണ്.' ലീന പറഞ്ഞു.

പാര്‍ലറിനു നേരേ ആക്രമണമുണ്ടാകുമെന്ന് മുന്നറിയിപ്പു നല്‍കിയ പോലീസ് പക്ഷേ സുരക്ഷ നല്‍കിയില്ല. ആക്രമണം സംബന്ധിച്ച് പോലീസിന് മുന്‍കൂട്ടി അറിയാമായിരുന്നു. പക്ഷേ ഇത് തടയാന്‍ യാതൊന്നും സ്വീകരിച്ചില്ല. എന്നാല്‍ പോലീസിനെതിരെ ഒരു പരാതിയുമില്ല. പോലീസിനെ ബഹുമാനിക്കുന്നു, പ്രതികളെ ഉടന്‍ പിടികൂടുമെന്നാണ് പ്രതീക്ഷിക്കുന്നത്. രവി പൂജാരി എന്ന പേരില്‍ ഫോണ്‍ കോളുകള്‍ വന്നിരുന്നു. തുടക്കത്തില്‍ ഇത് അവഗണിക്കുകയായിരുന്നു. എന്നാല്‍ തുടര്‍ച്ചയായി കോളുകള്‍ എത്തിയതോടെ നിയമോപദേശം തേടുകയും കോളുകള്‍ റെക്കോര്‍ഡ് ചെയ്യുകയും ചെയ്തു. പോലീസ് എന്നെ കാണാന്‍ വന്നിരുന്നു.' നടി പറഞ്ഞു.