പ്രായം കൂടുതല്‍ തോന്നുന്ന തരത്തില്‍ മുടി നരപ്പിച്ച്‌ വേഷപ്രച്ഛന്നയായി കഴിഞ്ഞ ദിവസം പതിനെട്ടാംപടി ചവിട്ടി അയ്യപ്പദര്‍ശനം നടത്തിയ കൊല്ലം ചാത്തന്നൂര്‍ സ്വദേശി എസ്.പി മ‌ഞ്ജുവിനെ വിമര്‍ശിച്ച്‌ സംവിധായകനും ഗാനരചയിതാവുമായ ശ്രീകുമാരന്‍ തമ്ബി രംഗത്ത്. മേക്കപ്പ് ചെയ്ത് വൃദ്ധയായി രൂപം മാറ്റി ഒരു സ്ത്രീ ശബരിമല ക്ഷേത്രത്തില്‍ കടന്നിട്ടുണ്ടെങ്കില്‍ അവര്‍ക്കെതിരെ കേസെടുത്തേ മതിയാകൂവെന്ന് ശ്രീകുമാരന്‍ തമ്ബി പറഞ്ഞു. ഫേസ്ബുക്ക് പോസ്റ്റിലൂടെയാണ് ശ്രീകുമാരന്‍ തമ്പിയുടെ പ്രതികരണം.

നവോത്ഥാനം അത്യന്താപേക്ഷിതമാണ്. സ്ത്രീപുരുഷസമത്വം അനുപേക്ഷണീയമാണ്. കാലം മാറുന്നതനുസരിച്ച്‌ എല്ലാ ആചാരങ്ങളിലും മാറ്റമുണ്ടാകും,​ ഉണ്ടാകണം.പക്ഷേ "ഒളിസേവ" പാടില്ല. പ്രത്യേകിച്ചും ദേവാലയത്തില്‍- ശ്രീകുമാരന്‍ തമ്ബി പറഞ്ഞു. അമ്ബലം നാടകവേദിയല്ലെന്നും ആള്‍മാറാട്ടം ക്രിമിനല്‍ കുറ്റമാണെന്നും അദ്ദേഹം കൂട്ടിച്ചേര്‍ത്തു.

ഫേസ്ബുക്ക് പോസ്റ്റിന്റെ പൂര്‍ണരൂപം ഇങ്ങനെ

നവോത്ഥാനം അത്യന്താപേക്ഷിതമാണ്. സ്ത്രീപുരുഷസമത്വം അനുപേക്ഷണീയമാണ്. കാലം മാറുന്നതനുസരിച്ച് എല്ലാ ആചാരങ്ങളിലും മാറ്റമുണ്ടാകും; ഉണ്ടാകണം.പക്ഷേ"ഒളിസേവ" പാടില്ല; പ്രത്യേകിച്ചും ദേവാലയത്തിൽ .
മേക്കപ്പ് ചെയ്ത് വൃദ്ധയായി രൂപം മാറ്റി ഒരു സ്ത്രീ ശബരിമല ക്ഷേത്രത്തിൽ കടന്നിട്ടുണ്ടെങ്കിൽ അവർക്കെതിരെ കേസെടുത്തേ മതിയാകൂ. അമ്പലം നാടകവേദിയല്ലല്ലോ.
ആൾമാറാട്ടം ക്രിമിനൽ കുറ്റമാണ്.

ഇന്നലെയാണ് ദളിത് ആക്ടിവിസ്റ്റ് എസ്.പി മഞ്ജു ശബരിമല ദര്‍ശനം നടത്തിയത് . 39 കാരിയായ മഞ്ജു ദര്‍ശനം നടത്തുന്നതിന്‍റെ ദൃശ്യങ്ങള്‍ നവോത്ഥാന കേരളം ശബരിമലയിലേക്ക് എന്ന ഫേസ്ബുക്ക് പേജ് പുറത്തുവിട്ടിരുന്നു

നെയ്യഭിഷേകം മുതല്‍ എല്ലാ ചടങ്ങുകളും അയ്യപ്പക്ഷേത്രത്തിലും മാളികപ്പുറം ക്ഷേത്രത്തിലും നടത്തിയാണ് രാവിലെ 10.30 ഓടെ അവര്‍ തിരിച്ച് പമ്പയിലെത്തിയത്. ദളിത് മഹിളാ ഫെഡറേഷന് നേതാവ് കൂടിയാണ് മഞ്ജു. നേരത്തെ ഒക്ടോബര്‍ ഇരുപതിന് മഞ്ജു ശബരിമല ദര്‍ശനം നടത്താന്‍ എത്തിയിരുന്നെങ്കിലും പമ്പയില്‍ നിന്ന് തിരിച്ചു പോകേണ്ടി വന്നിരുന്നു. സുരക്ഷാ , കാലാവസ്ഥാ പ്രശ്നങ്ങള്‍ ചൂണ്ടിക്കാട്ടിയാണു അന്ന് മഞ്ജുവിന് തിരിച്ചുപോരേണ്ടി വന്നത്.ഇതിന് പിന്നാല മഞ്ജുവിന്റെ ചാത്തന്നൂരിലെ വീടിനു നേരെ ഒരു കൂട്ടം ആളുകള്‍ ആക്രമണം നടത്തിയിരുന്നു.