ശബരിമലയിലേക്കുള്ള തിരുവാഭരണ ഘോഷയാത്ര ശനിയാഴ്ച പന്തളത്തുനിന്ന് പുറപ്പെടും. ഉച്ചക്ക് ഒന്നിന് വലിയകോയിക്കല്‍ ക്ഷേത്രത്തില്‍നിന്നാണ് ഘോഷയാത്ര ആരംഭിക്കുന്നത്. എല്ലാ ഒരുക്കവും പൂര്‍ത്തിയായതായി കൊട്ടാരം നിര്‍വാഹകസംഘം പ്രസിഡന്റ് പി.ജി. ശശികുമാരവര്‍മ അറിയിച്ചു.
പന്തളം വലിയകോയിക്കല്‍ സ്രാമ്പിക്കല്‍ കൊട്ടാരത്തില്‍ സൂക്ഷിച്ചിട്ടുള്ള തിരുവാഭരണം മകരവിളക്ക് ദിവസമാണ് ശബരിമലയിലെത്തിക്കുന്നത്. തുടര്‍ന്ന് അയ്യപ്പവിഗ്രഹത്തില്‍ ചാര്‍ത്തി ദീപാരാധന നടത്തും. മൂന്നു പെട്ടികളിലാണ് തിരുവാഭരണം കൊണ്ടുപോകുന്നത്.