ഈ വര്‍ഷത്തെ ഹജ്ജ് നറുക്കെടുപ്പ് ഇന്ന് ഉച്ചക്ക് രണ്ടിന് കരിപ്പൂര്‍ ഹജ്ജ് ഹൗസില്‍ നടക്കും. കേന്ദ്ര ഹജ്ജ് കമ്മിറ്റിയുമായി സഹകരിച്ചാണ് നറുക്കെടുപ്പ് പൂര്‍ത്തിയാക്കുക. നറുക്കെടുപ്പ് മന്ത്രി കെ.ടി. ജലീല്‍ നിര്‍വഹിക്കും. ഇപ്രാവശ്യം കേരളത്തില്‍നിന്ന് 11,197 പേര്‍ക്കാണ് അവസരം ലഭിച്ചത്.

70 വയസ്സിന് മുകളിലുള്ളവരും സഹായിയും ഉള്‍പ്പെടുന്ന സംവരണ വിഭാഗത്തിലും 45 വയസ്സിന് മുകളിലുള്ള സ്ത്രീകളുടെ വിഭാഗത്തില്‍ അപേക്ഷ നല്‍കിയവരും ഉള്‍പ്പെടെ 3,210 പേര്‍ക്ക് ഇക്കുറി നറുക്കെടുപ്പില്ലാതെ നേരിട്ട് അവസരം ലഭിക്കും. ബാക്കിയുള്ള 8,262 സീറ്റുകളിലേക്കാണ് ജനറല്‍ വിഭാഗത്തിലെ അപേക്ഷകരില്‍നിന്ന് നറുക്കെടുപ്പ് നടത്തുക. ബാക്കിയുള്ളവരെ ഉള്‍പ്പെടുത്തി കാത്തിരിപ്പുപട്ടികയും തയ്യാറാക്കും.
അധികമായി ലഭിക്കുന്ന സീറ്റുകളില്‍ കാത്തിരിപ്പുപട്ടികയില്‍ മുന്നിലുള്ളവര്‍ക്കാണ് അവസരം ലഭിക്കുക. ഇക്കുറി കേരളത്തില്‍നിന്ന് 43,115 അപേക്ഷകരാണുള്ളത്. ഇതില്‍ 1,199 പേര്‍ 70 വയസ്സിന് മുകളിലുള്ളവരും 2,011 പേര്‍ മഹ്‌റം (പുരുഷ തുണയില്ലാതെ നാലുപേരടങ്ങുന്ന സ്ത്രീകളുടെ സംഘം) വിഭാഗത്തിലുമാണ്. ഇവര്‍ക്കാണ് നേരിട്ട് അവസരം ലഭിക്കുക.