കൊല്ലം ബൈപാസ് നാടിനു സമര്‍പ്പിക്കാനും സംസ്ഥാനത്ത് എന്‍.ഡി.എയുടെ ലോക്‌സഭ തെരഞ്ഞെടുപ്പ് പ്രചാരണത്തിനു തുടക്കം കുറിക്കാനും പ്രധാനമന്ത്രി നരേന്ദ്ര മോദി ഇന്ന് എത്തും. വൈകുന്നേരം തിരുവനന്തപുരം വിമാനത്താവളത്തില്‍ എത്തുന്ന പ്രധാനമന്ത്രി ഹെലികോപ്ടറില്‍ 4.50ന് കൊല്ലം ആശ്രാമം മൈതാനത്തെ ഹെലിപാഡിലിറങ്ങും.
4.55ന് കൊല്ലം ബൈപാസ് ഉദ്ഘാടനം. ആറിന് ആശ്രാമത്തുനിന്ന് എന്‍.ഡി.എ റാലി നടക്കുന്ന കൊല്ലം പീരങ്കി മൈതാനത്ത് എത്തും. 6.10ന് റാലിയെ അഭിവാദ്യം ചെയ്യും. ഏഴിന് തിരുവനന്തപുരത്തേക്ക് തിരിക്കും. രാത്രി 7.20 മുതല്‍ 7.40 വരെ പ്രധാനമന്ത്രി നരേന്ദ്ര മോദി പത്മനാഭസ്വാമി ക്ഷേത്ര ദര്‍ശനത്തിനും സ്വദേശി ദര്‍ശന്‍ പരിപാടിയുടെ ഉദ്ഘാടനത്തിനും ചെലവഴിക്കും.
ദര്‍ശന്‍ പദ്ധതിയുടെ ഭാഗമായി നടപ്പാക്കുന്ന തീര്‍ഥാടക സൗഹൃദ നിര്‍മാണ പദ്ധതികളുടെ ഉദ്ഘാടനമാണ് മോദി നിര്‍വഹിക്കുക. പ്രധാനമന്ത്രിയായശേഷം മോദി മൂന്നാം തവണയാണ് കൊല്ലത്തെത്തുന്നത്. ബൈപാസ് ഉദ്ഘാടനം വിവാദമായ സാഹചര്യത്തിലാണ് അപ്രതീക്ഷിതമായി പ്രധാനമന്ത്രി ഉദ്ഘാടകനായത്.
ബൈപാസ് ഉദ്ഘാടന വേദിയില്‍ ഗവര്‍ണര്‍ ജസ്റ്റിസ് പി. സദാശിവം, മുഖ്യമന്ത്രി പിണറായി വിജയന്‍, ജില്ലയിലെ മന്ത്രിമാര്‍, എം.പി, എം.എല്‍.എ തുടങ്ങിയവരുമുണ്ടാകും.