ശബരിമലയില് രണ്ട് യുവതികള് ദര്ശനം നടത്തിയതിന് പിന്നാലെ നടയടച്ച് ശുദ്ധിക്രീയ ചെയ്ത തന്ത്രി കണ്ഠരര് രാജീവരോട് വിശദീകരണം നേടിയ ദേവസ്വം ബോര്ഡ് നടപടി ചോദ്യം ചെയ്ത് ഒരു പൂജാരി സമര്പ്പിച്ച ഹര്ജി ഹൈക്കോടതി തള്ളി
ശബരിമലയില് രണ്ട് യുവതികള് ദര്ശനം നടത്തിയതിന് പിന്നാലെ നടയടച്ച് ശുദ്ധിക്രീയ ചെയ്ത തന്ത്രി കണ്ഠരര് രാജീവരോട് വിശദീകരണം നേടിയ ദേവസ്വം ബോര്ഡ് നടപടി ചോദ്യം ചെയ്ത് ഒരു പൂജാരി സമര്പ്പിച്ച ഹര്ജി ഹൈക്കോടതി തള്ളി. ഹര്ജിക്കാരന് കേസില് ഇടപെടാനാകില്ലെന്ന് കോടതി പറഞ്ഞു. തുറവൂര് മഹാദേവ ക്ഷേത്രത്തിലെ പൂജാരിയായ കൃഷ്ണ ശര്മയാണ് ഹര്ജി നല്കിയത്.
സുപ്രീംകോടതി വിധിയെ തുടര്ന്ന് ബിന്ദുവും കനകദുര്ഗയും ദര്ശനം നടത്തിയതിനെ തുടര്ന്നാണ് തന്ത്രി നടയടച്ച് ശുദ്ധിക്രിയ നടത്തിയത്. തുടര്ന്നാണ് ദേവസ്വം ബോര്ഡ് കാരണം കാണിക്കല് നോട്ടീസ് നല്കിയത്. ബോര്ഡുമായി ആലോചിക്കാതെ ശുദ്ധിക്രീയ നല്കിയതിനായിരുന്നു നോട്ടീസ്. വിശദീകരണം നല്കാന് രണ്ടാഴ്ചത്തെ സമയം നല്കിയെങ്കിലും സമയം നീട്ടി നല്കണമെന്ന് തന്ത്രി ആവശ്യപ്പെട്ടു. ബോര്ഡ് അത് അംഗീകരിച്ചു.
സാധാരണഗതിയില് ശുദ്ധിക്രീയ നടത്തണമെങ്കില് ബോര്ഡിന്റെ അനുമതി വേണം. എന്നാല് ദേവസ്വം പ്രസിഡന്റിനെ വിളിച്ച് ശുദ്ധിക്രിയ നടത്താന് പോവുകയാണെന്ന് പറഞ്ഞ ശേഷം തന്ത്രി ഫോണ് കട്ട് ചെയ്യുകയായിരുന്നു. യുവതികള് എത്തിയാല് നടയടച്ച് താക്കോല് കൈമാറുമെന്ന് തന്ത്രിയുടെ വെളിപ്പെടുത്തലും വിവാദമായിരുന്നു. പിന്നീട് താന് പറഞ്ഞിട്ടാണ് തന്ത്രി അങ്ങനെ പറഞ്ഞതെന്നും നട അടച്ചാല് കോടതിയലക്ഷ്യം ആവില്ലെന്നും തന്ത്രിക്ക് താനാണ് ഉപദേശം നല്കിയതെന്നും ബി.ജെ.പി സംസ്ഥാന അധ്യക്ഷന് പി.എസ് ശ്രീധരന്പിള്ള വെളിപ്പെടുത്തിയതിനെ തുടര്ന്ന് ദേവസ്വം ബോര്ഡ് തന്ത്രിയോട് വിശദീകരണം ചോദിച്ചിരുന്നു. എന്നാല് പിള്ളയുടെ ആരോപണം തന്ത്രി നിഷേധിച്ചിരുന്നു.
ശുദ്ധിക്രീയ നടത്തിയതോടെ കോടതിവിധി നടപ്പാക്കാനായില്ലെങ്കില് തന്ത്രി സ്ഥാനത്ത് നിന്ന് സ്വയം മാറണമെന്ന് മുഖ്യമന്ത്രി ആവശ്യപ്പെട്ടിരുന്നു. സുപ്രീംകോടതിയില് നടന്ന കേസില് തന്ത്രി കക്ഷിയായിരുന്നു. വിധിയോട് വിയോജിക്കാന് തന്ത്രിക്ക് അവകാശമുണ്ട്. എന്നാല് ആ സ്ഥാനത്തിരുന്ന് വിധിക്കെതിരായി പ്രവര്ത്തിക്കാന് പാടില്ലെന്നും മുഖ്യമന്ത്രി പറഞ്ഞിരുന്നു. തന്ത്രിയെ മാറ്റണമെന്നും ഇക്കാര്യത്തില് സംസ്ഥാന ക്യാബിനെറ്റിന് ഒരേ അഭിപ്രായമാണെന്നും മന്ത്രി സുനില്കുമാര് പറഞ്ഞിരുന്നു. തുടര്ന്നാണ് ബോര്ഡ് വിശദീകരണ നോട്ടീസ് നല്കിയത്. യുവതികള് എത്തിയതിന് പിന്നാലെ ശുദ്ധിക്രീയ നടത്തിയ തന്ത്രി ബ്രാഹ്മണ രാക്ഷസനാണെന്ന് മുന് ദേവസ്വം മന്ത്രി ജി.സുധാകരന് വിമര്ശിച്ചു. വിധിനടപ്പാക്കാന് കഴിയുന്നില്ലെങ്കില് ഒഴിഞ്ഞ് പോകണം. തങ്ങള് ആരെയും മാറ്റില്ലെന്നും അദ്ദേഹം പറഞ്ഞു.
തന്ത്രിക്കെതിരെ സര്ക്കാര് തിരിഞ്ഞതോടെ താഴമണ് കുടുംബം വിശദീകരണവുമായി വാര്ത്താക്കുറിപ്പ് ഇറക്കിയിരുന്നു. തന്ത്രിയെ മാറ്റാന് സര്ക്കാരിനോ, ബോര്ഡിനോ ആകില്ലെന്നും മന്ത്രിമാര് തന്ത്രിയെ അപമാനിക്കുകയാണെന്നും അതില് വിശദീകരിച്ചിരുന്നു. എന്നാല് തന്ത്രിയെ മാറ്റാന് സര്ക്കാരിന് അധികാരമുണ്ടെന്ന് ദേവസ്വം മന്ത്രി കടകംപള്ളി സുരേന്ദ്രന് വ്യക്തമാക്കി. താന് ദേവസ്വം മന്ത്രിയായിരുന്നപ്പോള് തന്ത്രിയായിരുന്ന മോഹനരെ മാറ്റിയത് ഓര്മയില്ലേ എന്ന് പൊതുമാരമത്ത് മന്ത്രി ജി.സുധാകരന് ചോദിച്ചു.
https://www.facebook.com/Malayalivartha
