ലോക്സഭാ തെരഞ്ഞെടുപ്പില് കേരളാ കോണ്ഗ്രസ് ബിക്ക് സീറ്റ് വേണ്ടെന്നും ബി.ജെ.പിയുടെ പതനം കണ്ടാല് മതിയെന്നും ചെയര്മാന് ആര്. ബാലകൃഷ്ണപിള്ള, തെരഞ്ഞെടുപ്പില് എല്.ഡി.എഫ് നിലമെച്ചപ്പെടുത്തുമെന്നും അദ്ദേഹം പ്രത്യാശിച്ചു
ലോക്സഭാ തെരഞ്ഞെടുപ്പില് കേരളാ കോണ്ഗ്രസ് ബിക്ക് സീറ്റ് വേണ്ടെന്നും ബി.ജെ.പിയുടെ പതനം കണ്ടാല് മതിയെന്നും ചെയര്മാന് ആര്. ബാലകൃഷ്ണപിള്ള. തെരഞ്ഞെടുപ്പില് എല്.ഡി.എഫ് നിലമെച്ചപ്പെടുത്തുമെന്നും അദ്ദേഹം പ്രത്യാശിച്ചു. അടുത്തിടെ മുന്നണിയുടെ ഭാഗമായതിന്റെ ആത്മവിശ്വാസത്തിലാണ് മുന്നോക്കവികസന കോര്പ്പറേഷന് ചെയര്മാന്. താന് പങ്കെടുത്തതു കൊണ്ടാണോ കഴിഞ്ഞ എല്ഡിഎഫ് യോഗത്തില് നിന്ന് വിഎസ് വിട്ടുനിന്നതെന്ന് അദ്ദേത്തോടു ചോദിക്കണം. വി.എസിന്റെ അസാന്നിധ്യം ശ്രദ്ധയില് പെട്ടിരുന്നില്ലെന്നും ബാലകൃഷ്ണ പിള്ള പറഞ്ഞു.
അതേസമയം മാതാ അമൃതാനന്ദമയിക്ക് എതിരെ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന് നടത്തിയ വിമര്ശനത്തില് അപാകതയൊന്നും ഇല്ലെന്നും ആര് ബാലകൃഷ്ണപിള്ള. കോടിയേരി പറഞ്ഞതില് തെറ്റില്ല. സി.പി.എമ്മിന്റെ രാഷ്ട്രീയ വീക്ഷണം മാത്രമാണ്. പ്രശ്നങ്ങള് ഉണ്ടാക്കണമെന്ന് ആഗ്രഹിക്കുന്നവരാണ് വിവാദങ്ങള് പ്രസംഗത്തെ വളച്ചൊടിക്കുന്നതെന്നും അദ്ദേഹം ചൂണ്ടിക്കാട്ടി. കൊല്ലത്ത് അമൃതാനന്ദമയിക്ക് ഏറെ വിശ്വാസികളുള്ള സ്ഥലമാണ്. മഠവുമായി പിള്ളയ്ക്കും ബന്ധം ഉണ്ടായിരുന്നു. എന്നാല് മുന്നണിയുടെ ഭാഗമായതോടെ എന്.എസ്.എസ് ജനറല് സെക്രട്ടറി സുകുമാരന് നായരെ വരെ ബാലകൃഷ്ണപിള്ള തള്ളിക്കളഞ്ഞിരുന്നു.
പത്തനാപുരം, കൊട്ടാരക്കര മണ്ഡലങ്ങളിലാണ് ബാലകൃഷ്ണപിള്ളയുടെ പാര്ട്ടി മത്സരിക്കുന്നത്. ലോക്സഭാ തെരഞ്ഞെടുപ്പില് അവര് അടുത്തകാലത്തെങ്ങും മത്സരിച്ചിട്ടില്ല. കൊടിക്കുന്നില് സുരേഷാണ് പിള്ളയുടെ മണ്ഡലത്തിലെ എം.പി. യു.ഡി.എഫില് ഉള്ള കാലം മുതല് പിള്ള കൊടിക്കുന്നിലുമായി ഉടക്കിലാണ്. ഇത്തവണ മാവേലിക്കര മണ്ഡലത്തില് എല്.ഡി.എഫ് സ്ഥാനാര്ത്ഥിയായി പുന്നല ശ്രീകുമാര് മത്സരിക്കുമെന്ന് സൂചനയുണ്ട്. സി.പി.ഐയുടെ സീറ്റാണ്. അവരുടെ കൂടി അനുമതി വാങ്ങിയ ശേഷമേ സി.പി.എം അത്തരമൊരു നീക്കം നടത്തൂ. അതേസമയം സി.പി.ഐ അവരുടെ നേതാവ് ചെങ്ങറ സുരേന്ദ്രനെ തന്നെ മത്സരിപ്പിച്ചേക്കുമെന്നും റിപ്പോര്ട്ടുണ്ട്.
കൊല്ലത്ത് എന്.കെ പ്രേമചന്ദ്രന് എം.പിയെ എങ്ങനെയും തോല്പ്പിക്കണമെന്ന വാശിയിലാണ് സി.പി.എം. ബാലകൃഷ്ണപിള്ളയുടെ എല്ലാ സഹായവും അതിനുണ്ടാകും. കഴിഞ്ഞതവണ എം.എ ബേബിയെ തോല്പ്പിച്ചാണ് പ്രേമചന്ദ്രന് എം.പിയായത്. എല്.ഡി.എഫിന്റെ വോട്ട് നേടി ജയിച്ച ശേഷമാണ് പ്രേമചന്ദ്രനും അദ്ദേഹത്തിന്റെ പാര്ട്ടിയായ ആര്.എസ്.പിയും യു.ഡി.എഫിലേക്ക് ചേക്കേറിയത്. അന്ന് തൊട്ട് തുടങ്ങിയതാണ് സി.പി.എമ്മുമായുള്ള ഉടക്ക്. കൊല്ലം ബൈപ്പാസിന്റെ ഉദ്ഘാടന വേളയിലും പ്രേമചന്ദ്രന് സി.പി.എമ്മിനെതിരെ കളിച്ചു. അതിനാല് പ്രേമചന്ദ്രനെ വീഴ്ത്താന് പിള്ളയുടെ സാനിധ്യം എല്.ഡി.എഫിന് ആവേശം പകരും.
https://www.facebook.com/Malayalivartha
