എസ്.എസ്.എല്.സി, ഹയര് സെക്കന്ഡറി, വി.എച്ച്.എസ്.ഇ പരീക്ഷകള് ഒന്നിച്ചുനടത്താനുള്ള ശ്രമം വിദ്യാഭ്യാസവകുപ്പ് ഉപേക്ഷിച്ചു
എസ്.എസ്.എല്.സി, ഹയര് സെക്കന്ഡറി, വി.എച്ച്.എസ്.ഇ പരീക്ഷകള് ഒന്നിച്ചുനടത്താനുള്ള ശ്രമം വിദ്യാഭ്യാസവകുപ്പ് ഉപേക്ഷിച്ചു. പരീക്ഷകള് ഒന്നിച്ചുനടത്താന് ആവശ്യമായ സ്ഥലസൗകര്യമില്ലെന്ന് ഹയര് സെക്കന്ഡറി, വി.എച്ച്.എസ്.ഇ ഡയറക്ടര്മാര് നല്കിയ റിപ്പോര്ട്ടിനെ തുടര്ന്നാണ് രാവിലെ ഒന്നിച്ച് പരീക്ഷ നടത്താനുള്ള ശ്രമം വേണ്ടെന്നുവെച്ചത്. ഇതോടെ എസ്.എസ്.എല്.സി പരീക്ഷ ഉച്ചക്ക് ശേഷം തന്നെ നടത്താന് ഇന്നലെ പൊതുവിദ്യാഭ്യാസ ഡയറക്ടറുടെ അധ്യക്ഷതയില് ചേര്ന്ന ക്യു.ഐ.പി യോഗം തീരുമാനിച്ചു.
ഹയര് സെക്കന്ഡറി, വി.എച്ച്.എസ്.ഇ പരീക്ഷകള് രാവിലെയും നടക്കും. പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി 200ല്പരം സ്കൂളുകളില് നിര്മാണ പ്രവര്ത്തനങ്ങള് നടക്കുന്നതിനാല് എസ്.എസ്.എല്.സി, ഹയര് സെക്കന്ഡറി, വി.എച്ച്.എസ്.ഇ പരീക്ഷകള് ഒന്നിച്ചുനടത്താന് ആവശ്യമായ സ്ഥലം സൗകര്യമില്ലെന്നാണ് ഡയറക്ടര്മാര് റിപ്പോര്ട്ട് നല്കിയത്.
അടുത്ത അധ്യയനവര്ഷം മുതല് പാദവാര്ഷിക പരീക്ഷ (ഓണ പരീക്ഷ) മുതല് ഈ പരീക്ഷകള് ഒന്നിച്ചുനടത്താനാണ് നിര്ദേശം. ജനുവരി 26 മുതല് ഫെബ്രുവരി 15 വരെയുള്ള തീയതികളില് പൊതുവിദ്യാലയങ്ങളില് പഠനോത്സവം നടത്തും. ഇതില് ഒരുദിവസം പൊതുജനങ്ങള്ക്കും രക്ഷിതാക്കള്ക്കും മുന്നില് പഠന മികവ് പ്രദര്ശിപ്പിക്കാന് വിദ്യാര്ഥികള്ക്ക് അവസരമൊരുക്കും.
https://www.facebook.com/Malayalivartha
