സി.പി.എം പി.ബി അംഗങ്ങളായ പ്രകാശ്കാരാട്ടും ബൃന്ദകാരാട്ടും ലോക്സഭാ തെരഞ്ഞെടുപ്പില് കേരളത്തില് നിന്ന് മത്സരിച്ചേക്കുമെന്ന് സൂചന, കൊല്ലം, ആലപ്പുഴ, പാലക്കാട്, കാസര്കോട് മണ്ഡലങ്ങളില് ഏതെങ്കിലുമായിരിക്കും ദേശീയനേതാക്കള്ക്കായി നല്കുക
സി.പി.എം പി.ബി അംഗങ്ങളായ പ്രകാശ്കാരാട്ടും ബൃന്ദകാരാട്ടും ലോക്സഭാ തെരഞ്ഞെടുപ്പില് കേരളത്തില് നിന്ന് മത്സരിച്ചേക്കുമെന്ന് സൂചന. കൊല്ലം, ആലപ്പുഴ, പാലക്കാട്, കാസര്കോട് മണ്ഡലങ്ങളില് ഏതെങ്കിലുമായിരിക്കും ദേശീയനേതാക്കള്ക്കായി നല്കുക. കാരാട്ടിനെ കണ്ണൂരില് മത്സരിപ്പിച്ചേക്കും. ബംഗാളിലും ത്രിപുരയിലും സ്വാധിനം കുറഞ്ഞതിനാലാണ് ദേശീയ നേതാക്കളെ കേരളത്തിലേക്ക് കെട്ടിയിറക്കുന്നത്. കോണ്ഗ്രസ് നേതൃത്വത്തിലുള്ള സര്ക്കാരുണ്ടായാല് ദേശീയനേതാക്കള് പാര്ലമെന്റിലുണ്ടെങ്കില് അത് വലിയ നേട്ടമാകും എന്ന വിലയിരുത്തലിന്റെ അഠിസ്ഥാനത്തിലാണ് മലയാളിയായ കാരാട്ടിനെയും അദ്ദേഹത്തിന്റെ ഭാര്യയായ ബൃന്ദയേയും തെരഞ്ഞെടുപ്പ് ഗോദയിലിറക്കുന്നത്.
പ്രകാശ് കാരാട്ട് ഇതുവരെ പാര്ലമെന്ററി രംഗത്ത് മത്സരിച്ചിട്ടില്ല. ബൃന്ദയാകാട്ടെ എം.പിയായിരുന്നു. രണ്ട് തവണ എം.പിയായ എം.ബി രാജേഷിന് പാര്ട്ടിയുടെ ചുമതലകള് നല്കാനും പകരം പാലക്കാട് സീറ്റില് കാരാട്ടിനെ മത്സരിപ്പിക്കാനുമുള്ള സാധ്യത തള്ളിക്കളയാനാകില്ല. കാരാട്ടിന്റെ കുടുംബവീട് പാലക്കാട്ടാണ്. അദ്ദേഹത്തിന്റെ കുടുംബക്കാരൊക്കെ പാലക്കാട്ട് ഉണ്ട്. എം.ബി രാജേഷ് രണ്ട് തവണയും മികച്ച പാര്ലമെന്റേറിയന് ആയിരുന്നു. എന്നാല് ഇത്തവണ പാര്ലമെന്റിലേക്ക് പതിവ് സ്ഥാനാര്ത്ഥികളെ എല്ലാം ഒഴിവാക്കാനാണ് സി.പി.എം തീരുമാനിച്ചിരിക്കുന്നത്. അതിന്റെ ഭാഗമായി പി.കെ ബിജുവിനെയും എം.ബി രാജേഷിനേയും മാറ്റിനിര്ത്തിയേക്കും.
മഹാരാഷ്ട്രയില് കര്ഷകരുടെ ലോങ്മാര്ച്ചിന് നേതൃത്വംകൊടുത്ത വിജു കൃഷ്ണനെ മത്സരിപ്പിക്കാനും ആലോചിക്കുന്നുണ്ട്. അതിന് പുറമേ പൊതുസമ്മതരായ നിരവധി വ്യക്തികളെയും സ്ഥാനാര്ത്ഥികളാക്കും പാര്ട്ടി സ്ഥാനാര്ത്ഥികള് എന്നതിലുപരി വിജയിക്കുന്നവര്ക്കായിരിക്കും പരിഗണന. അവരില് പാര്ട്ടിചിഹ്നത്തില് മത്സരിക്കാന് താല്പര്യമുള്ളവരുണ്ടെങ്കില് അവര്ക്ക് പാര്ട്ടി അംഗത്വം നല്കും. ചാലക്കുടിയില് ഇന്നസെന്റിന് പകരം എറണാകുളം ജില്ലാ സെക്രട്ടറി പി.രാജീവായിരിക്കും മത്സരിക്കുക. മികച്ച രാജ്യസഭാ എം.പിയായിരുന്നു പി.രാജീവ്. അദ്ദേഹത്തെ സഭയില് തുടരാന് അനുവദിക്കണമെന്ന് ബി.ജെ.പി നേതാവും ധനമന്ത്രിയുമായ അരുണ് ജെയ്റ്റ്ലി ഉള്പ്പെടെ സീതാറാം യച്യൂരിയോട് ആവശ്യപ്പെട്ടിരുന്നു.
മാവേലിക്കര ലോക്സഭാ മണ്ഡലത്തില് കെ.പി.എം.എസ് നേതാവ് പുന്നല ശ്രീകുമാറിനെ മത്സരിപ്പിക്കാന് സി.പി.എം നീക്കംനടത്തുന്നുണ്ട്. സി.പി.ഐയുടെ സീറ്റാണ് മാവേലിക്കര. ചെങ്ങറ സുരേന്ദ്രനാണ് അവിടെ മുമ്പ് മത്സരിച്ചിരുന്നത്. കഴിഞ്ഞതവണ യു.ഡി.എഫിലെ കൊടിക്കുന്നിലാണ് ജയിച്ചത്. തിരുവനന്തപുരവും സി.പി.ഐയുടെ സീറ്റാണ്. കഴിഞ്ഞതവണ കാശ് വാങ്ങി ബെന്നറ്റ് ഏബ്രഹാമിനെ സ്ഥാനാര്ത്ഥിയാക്കിയതിന്റെ നാണക്കേട് ഇതുവരെ മാറിയിട്ടില്ല.
ശശി തരൂരിനെതിരെ ഇത്തവണയും സ്വതന്ത്രനെ ഇറക്കുമെന്നാണ് അറിയുന്നത്. അതില് നമ്പിനാരായണന്റെ പേരും കേള്ക്കുന്നുണ്ട്. കൊല്ലത്ത് യു.ഡി.എഫിലെ എന്.കെ പ്രേമചന്ദ്രനെ തോല്പ്പിക്കാന് സി.പി.എം ഏതറ്റംവരെയും പോകാന് തയ്യാറാണ്. ജില്ലാ സെക്രട്ടറി കെ.എന് ബാലഗോപാലിന്റെ പേര് കേള്ക്കുന്നുണ്ട്. അദ്ദേഹം മുന് രാജ്യസഭാ എം.പിയായതിനാല് അവിടെയും പൊതുസ്വതന്ത്രന് സാധ്യതയുണ്ട്.
https://www.facebook.com/Malayalivartha
