ഇത് കാലം കരുതി വച്ച കെണി. ഇനിയുള്ള ദിവസങ്ങള്‍ രമേശിന് ഉറക്കമുണ്ടാവുകയില്ല. ആലപ്പുഴ എംപി കെ.സി. വേണുഗോപാല്‍ കോണ്‍ഗ്രസ് ദേശീയ നേതൃത്വത്തില്‍ എത്തുന്നത് വെറുതെയാകില്ല. കേരള മുഖ്യമന്ത്രി സ്ഥാനമാണ് തന്റെ സ്വപ്നമെന്ന് വളരെ അടുത്ത സുഹൃത്തുക്കളോട് വേണു പറഞ്ഞത് വെറുതെയാകില്ല. ഇനി സംസ്ഥാന കോണ്‍ഗ്രസിലെ അധികാരഘടനയില്‍ കാതലായ മാറ്റം സംഭവിക്കും എന്നുറപ്പാണ്.

ഉമ്മന്‍ചാണ്ടി, രമേശ് ചെന്നിത്തല, എ.കെ. ആന്റണി എന്നിവരെ കേന്ദ്രീകരിച്ചിരുന്ന ഉള്‍പ്പാര്‍ട്ടി ബലാബലങ്ങള്‍ അപ്രസക്തമാകും, വേണുഗോപാലിനെ കേന്ദ്രീകരിച്ച് പുതിയ അധികാരകേന്ദ്രം രൂപം കൊള്ളും. പ്രതിപക്ഷ നേതാവും ഐ ഗ്രൂപ്പിന്റെ അമരക്കാരനുമായ രമേശ് ചെന്നിത്തലയ്ക്കാണ് വേണുഗോപാലിന്റെ വളര്‍ച്ച കടുത്ത തിരിച്ചടിയാകുന്നത്. തനിക്ക് വെല്ലുവിളിയാകുമെന്ന് കണ്ടാണ് കേരള രാഷ്ട്രീയത്തില്‍ അപ്രസക്തമാക്കാന്‍ നിയമസഭാംഗമായിരുന്ന വേണുഗോപാലിനെ രാജിവയ്പിച്ച് 2009ല്‍ ലോക്‌സഭയിലേക്ക് കേട്ട് കെട്ടിച്ചത്.അതിതുപോലെ പാരയാകുമെന്ന് സ്വപ്‌നേപി നിരൂപിച്ചില്ല. എന്നാല്‍ കേന്ദ്രമന്ത്രിയായി ഹൈക്കമാന്‍ഡില്‍ സ്വാധീനമുറപ്പിച്ചതോടെ കേരളത്തിലെ ഗ്രൂപ്പ് നേതാക്കള്‍ അപകടം മണത്തു. 2014ലെ ലോക്‌സഭാ തെരഞ്ഞെടുപ്പില്‍ സരിത വിഷയം ഉയര്‍ത്തി സീറ്റ് നിഷേധിക്കാന്‍ ഷാനിമോള്‍ ഉസ്മാനെ ഇറക്കി അവര്‍ പട നയിച്ചെങ്കിലും പാളി. എന്നാല്‍ അന്നത്തെ കെപിസിസി പ്രസിഡന്റ് വി.എം. സുധീരന്‍ വേണുഗോപാലിനെ പിന്തുണച്ചതോടെ ആ നീക്കം പരാജയപ്പെട്ടു. ചെന്നിത്തലോയോട് അന്ന് വേണു ഉള്ളില്‍ കുറിച്ച ഒരു വാശിയുണ്ട്. ഇനി അത് തീര്‍ക്കാന്‍ നല്ല നേരം ഒത്താല്‍ മതി.

കെപിസിസിയിലെ രണ്ടാം നിര നേതാക്കള്‍ക്കിടയിലുള്ള തന്റെ സ്വാധീനം ഗ്രൂപ്പ് സമവാക്യങ്ങള്‍ക്ക് അതീതമായി ഉയര്‍ത്താന്‍ ഇനി കെ സി വേണുഗോപാലിനാകും. കോണ്‍ഗ്രസ് നേതൃനിരയില്‍ എന്‍എസ്എസിന് ഒരു പക്ഷേ ഏറ്റവും താല്‍പ്പര്യമുള്ള നേതാവും കെ സി തന്നെ. ദീര്‍ഘകാലം ആലപ്പുഴ എംപി ആയിരുന്ന കെ സി വേണുഗോപാല്‍ എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനുമായി ചില്ലറ ഉരസലുകള്‍ ഉണ്ടാക്കിയിട്ടുണ്ടെങ്കിലും കഴിഞ്ഞ പാര്‍ലമെന്റ് തെരഞ്ഞെടുപ്പ് കാലം മുതല്‍ അദ്ദേഹവുമായി മെച്ചപ്പെട്ട ബന്ധം കാത്തുസൂക്ഷിക്കുന്നുണ്ട്. എന്‍ എസ് എസിനെ അടുപ്പിക്കാന്‍ രാഹുലിന്റെ ചട്ടകവും കെ സി തന്നെ.

ഒരു കാലത്ത് എകെ ആന്റണി സംസ്ഥാന കോണ്‍ഗ്രസില്‍ നിര്‍ണ്ണായക തീരുമാനമെടുക്കാന്‍ ശേഷിയുള്ള നേതാവായിരുന്നു. നരസിംഹറാവുവിന്റെ കാലത്ത് പെട്ടെന്നൊരു ദിവസം വിമാനത്തില്‍ തിരുവനന്തപുരത്ത് പറന്നിറങ്ങി, കെ കരുണാകരനില്‍ നിന്നും മുഖ്യമന്ത്രി സ്ഥാനം ഏറ്റെടുത്ത ആന്റണിയെ രാഷ്ട്രീയ കേരളം കണ്ടിട്ടുണ്ട്. സംസ്ഥാന കോണ്‍ഗ്രസിലെ ഒന്നാം നമ്പര്‍ നേതാവ് അല്ലാതായിരുന്നിട്ട് കൂടി അന്ന് എകെ ആന്റണിക്ക് മുഖ്യമന്ത്രി ആകാനായത് ഹൈക്കമാന്റിന്റെ വിശ്വസ്ഥന്‍ ആയിരുന്നതുകൊണ്ടാണ്. ഒരു കാലത്ത് എഐസിസിയില്‍ ആന്റണിക്ക് ഉണ്ടായിരുന്ന സ്ഥാനത്തിനും അംഗീകാരത്തിനും തുല്യമായ പദവിയിലേക്കാണ് കെസി വേണുഗോപാല്‍ ഇപ്പോള്‍ ഉയര്‍ന്നിരിക്കുന്നത്. അടുത്ത നിയമസഭാ തെരെഞ്ഞെടുപ്പിനു തൊട്ടു മുന്‍പ് ഇത്തരമൊരു നീക്കം പ്രതീക്ഷിക്കാം.

ചുരുക്കത്തില്‍ സംസ്ഥാന കോണ്‍ഗ്രസിലെ അധികാര വടംവലിയും ചക്കളത്തിപ്പോരും തുടരുന്നപക്ഷം അടുത്ത നിയമസഭാ തെരഞ്ഞെടുപ്പില്‍ കോണ്‍ഗ്രസിനെ നയിക്കാന്‍ ഒരുപക്ഷേ ഹൈക്കമാന്റ് കെസിയെ നിശ്ചയിക്കാനുള്ള സാധ്യത അതിവിദൂരമല്ല. രാജസ്ഥാന്‍ നിയമസഭാ തെരഞ്ഞെടുപ്പിന് മുഖ്യമന്ത്രി പദവിയെച്ചൊല്ലി തര്‍ക്കം ഉണ്ടായപ്പോള്‍ എഐസിസി ജനറല്‍ സെക്രട്ടറി ആയ അശോക് ഗെലോട്ടിനെ മുഖ്യമന്ത്രി സ്ഥാനം ഏറ്റെടുക്കാന്‍ ഹൈക്കമാന്റ് നിശ്ചയിച്ചതും ഓര്‍ക്കുക. ഭാവിയില്‍ മറ്റൊരു സന്ദിഗ്ധ സാഹചര്യത്തില്‍ പണ്ട് ആന്റണി വന്നതുപോലെ മറ്റൊരു വിമാനം കയറി കെസി മുഖ്യമന്ത്രിപദം ഏറ്റെടുക്കാന്‍ കേരളത്തിലേക്കെത്തിയാലും അത്ഭുതപ്പെടാനില്ല. രമേശിന്റെ കാലമായി കാലം കരുതി വച്ചതുപോലെ. കരുണാകരന്റെ കണ്ണുനീരാണെന്ന് ചിലര്‍. എന്തായാലും ഗ്രൂപ്പ് പോര് കേരളത്തില്‍ ഇനിയും മൂക്കും.

2014ലെ ലോക്‌സഭാ തെരഞ്ഞെടുപ്പിലെ വിജയം വേണുഗോപാലിന്റെ വളര്‍ച്ചയ്ക്ക് സഹായകമായി. 30 ലോക്‌സഭാംഗങ്ങള്‍ മാത്രമാണ് കോണ്‍ഗ്രസിനുണ്ടായിരുന്നത്. അതിനാല്‍ എഐസിസി പ്രസിഡന്റ് രാഹുലുമായി അടുത്ത ബന്ധമുണ്ടാക്കാനും. മനഃസാക്ഷി സൂക്ഷിപ്പുകാരനാകാനും സാധിച്ചു. 2019ലെ ലോക്‌സഭാ തെരഞ്ഞെടുപ്പ് വേണുഗോപാലിനും, കേരളത്തിലെ പരമ്പരാഗത ഗ്രൂപ്പുകള്‍ക്കും നിര്‍ണായകമാണ്. ഹാട്രിക് വിജയം ആലപ്പുഴയില്‍ വേണുഗോപാല്‍ നേടിയാല്‍ പിന്നെ സംഘടനയില്‍ വേണുഗോപാലിനെ തളയ്ക്കുക ഏറെ ബുദ്ധിമുട്ടാകും. സോണിയ കെപിസിസി പ്രസിഡന്റ് സ്ഥാനത്ത് കെട്ടിയിറക്കിയ സുധീരനെ വീഴ്ത്തിയതു പോലെ രാഹുലിന്റെ വിശ്വസ്തനെ ഒതുക്കാന്‍ ഇവിടുത്തെ ഗ്രൂപ്പ് ശക്തികള്‍ക്ക് സാധിക്കുമോയെന്ന് വരും ദിവസങ്ങളിലെ രാഷ്ട്രീയ അന്തര്‍നാടകങ്ങള്‍ തെളിയിക്കും.