ലോക്‌സഭ തെരഞ്ഞെടുപ്പ് അടുത്തതോടെ കേരളത്തിലെ ബിജെപി ക്യാമ്പ് ആവേശത്തിലാണ്. ശബരിമല വിഷയം ബിജെപിയ്ക്ക് നല്‍കിയ ഊര്‍ജം ചെറുതല്ല. അതിന് പിന്നാലെയാണ് മോഡിയും അമിത് ഷായും ഇതേറ്റെടുക്കുന്നത്. അതിനിടെ പാര്‍ലമെന്റ് തിരഞ്ഞെടുപ്പില്‍ കേരളത്തില്‍ നൂറു കോടി രൂപ ചിലവഴിക്കാന്‍ ബിജെപി ദേശീയ നേതൃത്വത്തിന്റെ നീക്കം നടത്തുന്നതായി സൂചന. പത്ത് പാര്‍ലമെന്റ് മണ്ഡലങ്ങളിലെ വിജയം ലക്ഷ്യമിട്ട് ഒരു മണ്ഡലത്തില്‍ അഞ്ചു കോടി രൂപ ചിലവഴിക്കുന്നതിനാണ് ബിജെപി നേതൃത്വം പദ്ധതി തയ്യാറാക്കിയിരിക്കുന്നത്. വിജയസാധ്യതയുള്ള മണ്ഡലങ്ങളില്‍ അധികമായി രണ്ടു കോടി രൂപ കൂടി ചിലവഴിക്കുന്നതിനുമാണ് ബിജെപി കേന്ദ്ര നേതൃത്വം വന്‍ പദ്ധതി തയ്യാറാക്കിയിരിക്കുന്നത്.

സംസ്ഥാനത്ത് ശബരിമല വിഷയത്തോടെ ബിജെപിയുടെ സാധ്യതകള്‍ വര്‍ധിച്ചതായാണ് അമിത് ഷായുടെ നിര്‍ദേശത്തൈ തുടര്‍ന്ന് കേരളത്തിലെ സാഹചര്യം വിലയിരുത്തിയ നേതാക്കളുടെ സംഘവും, പഠനം നടത്തിയ ഏജന്‍സിയും കണ്ടെത്തിയിരുന്നു. ഇതിനു പിന്നാലെയാണ് സംസ്ഥാനത്തെ ഓരോ നിയോജക മണ്ഡലത്തിലും അഞ്ചു കോടി രൂപ വീതം തിരഞ്ഞെടുപ്പ് ചിലവിലേയ്ക്കായി അനുവദിക്കാന്‍ ബിജെപി കേന്ദ്ര നേതൃത്വം തീരുമാനിച്ചിരിക്കുന്നത്.

ഓരോ മണ്ഡലത്തിലും ബൂത്ത് തലം മുതല്‍ നടപ്പാക്കാന്‍ ഉദ്ദേശിക്കുന്ന പദ്ധതികള്‍ എന്തൊക്കെയാണ് എന്നും, ലഭിക്കുന്ന വോട്ട് എത്രയാണെന്നും കൃത്യമായി വിലയിരുത്തി നല്‍കുന്ന റിപ്പോര്‍ട്ടുകളുടെ അടിസ്ഥാനത്തിലാണ് ഓരോ മണ്ഡലത്തിലും തുക അനുവദിക്കുന്നത്. ഈ വിവരം കൃത്യമായിരിക്കുകയും, തുക ചിലവഴിക്കുന്നതിനുള്ള പദ്ധതികള്‍ കൃത്യമായി കേന്ദ്ര നേതൃത്വത്തിന് റിപ്പോര്‍ട്ട് ചെയ്യുകയും ചെയ്യണം. ഇതിന്റെ അടിസ്ഥാനത്തിലാണ് തുക അനുവദിക്കുന്നതെന്നും മുതിര്‍ന്ന ബിജെപി നേതാവ് അറിയിച്ചു.

തിരുവനന്തപുരം, കാസര്‍കോട്, പത്തനംതിട്ട, ആലപ്പുഴ, ഇടുക്കി, തൃശൂര്‍, പാലക്കാട്്, കണ്ണൂര്‍, ചാലക്കുടി, കോട്ടയം സീറ്റുകളില്‍ വിജയിക്കാന്‍ സാധിക്കുമെന്നാണ് ബിജെപി കേന്ദ്ര നേതൃത്വത്തിന്റെ വിലയിരുത്തല്‍. വിജയസാധ്യതയുള്ള ഈമണ്ഡലങ്ങളില്‍ അധികമായി രണ്ടു കോടി രൂപ വീതം അനുനദിക്കുന്നതിനാണ് ബിജെപി കേന്ദ്ര നേതൃത്വം ആലോചിക്കുന്നത്.

നിലവിലെ സാഹചര്യത്തില്‍ അടിത്തട്ട് മുതല്‍ ഇളക്കിമറിച്ച് യു.പി മോഡല്‍ പ്രചാരണത്തിനാണ് ബിജെപി കേരളത്തില്‍ പദ്ധതി തയ്യാറാക്കിയിരിക്കുന്നത്. ഇതിനായി ആര്‍എസ്എസിന്റെ പിന്‍തുണയും തേടിയിട്ടുണ്ട്. സംഘം സഹായിക്കാന്‍ തയ്യാറായി രംഗത്ത് എത്തിയാല്‍ കേരളത്തില്‍ സുഖമായി വിജയിച്ച് കയറാന്‍ സാധിക്കുമെന്ന പ്രതീക്ഷയാണ് ബിജെപി കേന്ദ്ര നേതൃത്വത്തിനുള്ളത്.

അതേസമയം സംസ്ഥാനത്ത് ആകെയുള്ള ഇരുപത് ലോക്‌സഭാ സീറ്റുകളില്‍ പതിനെട്ടിലും എന്‍ഡിഎയ്ക്ക് വിജയപ്രതീക്ഷയുണ്ടെന്ന് ബിജെപി ജനറല്‍ സെക്രട്ടറി കെ.സുരേന്ദ്രന്‍ പറഞ്ഞു. മലപ്പുറം, പൊന്നാനി സീറ്റുകളില്‍ ജയിക്കാമെന്ന് പാര്‍ട്ടി കരുതുന്നില്ലെന്നും സുരേന്ദ്രന്‍ പറഞ്ഞു. എല്ലാ മണ്ഡലങ്ങളിലും ഇക്കുറി ത്രികോണ മത്സരം നടക്കും. ബി ജെ പി നിര്‍ണ്ണായക ശക്തിയാകും.

ഫെബ്രുവരി രണ്ടാം വാരത്തോടെ ബിജെപി സ്ഥാനാര്‍ഥികളുടെ പട്ടിക തയ്യാറാവുമെന്ന് ബിജെപി ജനറല്‍ സെക്രട്ടറി കെ.സുരേന്ദ്രന്‍. ബിഡിജെഎസുമായുള്ള സീറ്റ് വിഭജന ചര്‍ച്ചകള്‍ ഉടന്‍ പൂര്‍ത്തിയാക്കും. എന്‍ഡിഎയിലോ ബിജെപിയിലോ സീറ്റിനായി അടിപടി ഉണ്ടാവില്ലെന്നും അടുത്ത നിയമസഭാ തെരഞ്ഞെടുപ്പിനുള്ള ട്രയല്‍ റണ്‍ ആണ് ലോക്‌സഭാ തെരഞ്ഞെടുപ്പെന്നും കെ സുരേന്ദ്രന്‍ പറഞ്ഞു.

അതേസമയം ശബരിമല വിഷയത്തില്‍ ശക്തമായ പ്രക്ഷോഭവുമായി മുന്നോട്ട് പോകാന്‍ ബിജെപി കോര്‍ കമ്മിറ്റി യോഗത്തില്‍ തീരുമാനമായി. പ്രളയാനന്തര പുനരധിവാസ പ്രവര്‍ത്തനങ്ങളിലുണ്ടായ വീഴ്ച്ച മറച്ചു വയ്ക്കാന്‍ ശബരിമല വിഷയം ആളിക്കത്തിക്കുകയാണ് പിണറായി സര്‍ക്കാര്‍ ചെയ്തതെന്ന് കെ സുരേന്ദ്രന്‍ പറഞ്ഞു.

സംസ്ഥാന സര്‍ക്കാര്‍ കേരളത്തിലെ ജനങ്ങളോട് അങ്ങേയറ്റം ക്രൂരമായാണ് പെരുമാറുന്നത്. സംസ്ഥാന സര്‍ക്കാരിന്റെ വീഴ്ച്ച മൂലം അമൃത് പദ്ധതിയിലൂടെ കേരളത്തിന് ലഭിക്കേണ്ട ആയിരം കോടി രൂപയോളം നഷ്ടമായി. പ്രളയാനന്തര കേരളത്തില്‍ പുനരുദ്ധാരണപ്രവര്‍ത്തനങ്ങള്‍ക്ക് ശ്രമിക്കാതെ ശബരിമല വിഷയവുമായി ബന്ധപ്പെട്ട് മൂന്ന് മാസത്തോളം കേരള ജനതയെ സര്‍ക്കാര്‍ മുള്‍മുനയില്‍ നിര്‍ത്തിയെന്ന് കെ സുരേന്ദ്രന്‍ പറഞ്ഞു.

മണ്ഡലകാലത്ത് ഉടനീളം ആചാരലംഘനത്തിന് ശ്രമിച്ച സര്‍ക്കാര്‍ നട അടച്ചശേഷവും ഈ വെല്ലുവിളിയുമായി മുന്നോട്ട് പോകുകയാണ്. കുംഭമാസത്തില്‍ നട തുറക്കുന്‌പോള്‍ വീണ്ടും ആചാരലംഘനം നടത്താനാണ് സര്‍ക്കാര്‍ തീരുമാനമെങ്കില്‍ പല്ലും നഖവും ഉപയോഗിച്ച് അതിനെ എതിര്‍ത്ത് തോല്‍പിക്കാനാണ് പാര്‍ട്ടി തീരുമാനമെന്നും ശബരിമല വിഷയത്തില്‍ ശക്തമായ പ്രക്ഷോഭം ബിജെപി തുടരുമെന്നും കെ.സുരേന്ദ്രന്‍ വ്യക്തമാക്കി.