ശബരിമലയിലേക്ക് സ്വകാര്യവാഹനങ്ങള്‍ കടത്തിവിടണമെന്ന് ആവശ്യപ്പെട്ട കേന്ദ്രമന്ത്രി പൊന്‍രാധാകൃഷ്ണനോട് , ഉത്തരവാദിത്തം ഏറ്റെടുക്കുമോ എന്ന് ചോദിക്കുകയും പരിഹസിക്കുകയും ചെയ്ത എസ്.പി യതീഷ് ചന്ദ്രയ്ക്ക് പണി പാഴ്‌സലായി വരുന്നു. കേന്ദ്രമന്ത്രിയോട് അപമര്യാദയായി പെരുമാറിയെന്ന് ആരോപരിച്ച് റിച്ചാഡ് ഹേ എം.പി നല്‍കിയ പരാതിയില്‍ അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ കേന്ദ്ര ആഭ്യന്തരമന്ത്രാലയം കേരളാ ആഭ്യന്തര സെക്രട്ടറിയോട് ആവശ്യപ്പെട്ടു. എസ്.പിയെ പിരിച്ചുവിടണമെന്ന് പരാതിയില്‍ ആവശ്യപ്പെട്ടിട്ടുണ്ട്. പരാതിയില്‍ എത്രയും പെട്ടെന്ന് റിപ്പോര്‍ട്ട് നല്‍കണമെന്നാണ് നിര്‍ദേശം. മന്ത്രിയോടു മാത്രമല്ല, ഹൈക്കോടതി ജഡ്ജിയോടും ഭക്തരോടും യാതൊരു മര്യാദയുമില്ലാതെയാണ് എസ്.പി പെരുമാറിയതെന്ന് പരാതിയില്‍ ആരോപിക്കുന്നു.

ഹൈക്കോടതി ജഡ്ജിക്ക് പരാതിയില്ലാത്തതിനാലാണ് എസ്.പിക്കെതിരെ നടപടി ഉണ്ടാകാതിരുന്നത്. മുമ്പും ഇതേ എസ്.പി സാധാരണക്കാരോട് മോശമായി പെരുമാറുകയും സ്്ത്രികളും കുട്ടികളും ഉള്‍പ്പെടെ പങ്കെടുത്ത സമരത്തിന് നേരെ ക്രൂരമായി ലാത്തിച്ചാര്‍ജ്ജ് നടത്തുകയും ചെയ്തതായും ചൂണ്ടിക്കാട്ടുന്നു. സംസ്ഥാന സര്‍ക്കാര്‍ യതീഷ് ചന്ദ്രയെ രക്ഷിക്കാനേ ശ്രമിക്കൂ. കാരണം സര്‍ക്കാര്‍ നിര്‍ദ്ദേശപ്രകാരമാണ് നിലയ്ക്കലില്‍ നിന്ന് പമ്പയിലേക്ക് സ്വകാര്യവാഹനങ്ങള്‍ കടത്തിവിടാഞ്ഞത്. മന്ത്രിക്കൊപ്പം വന്ന സ്വകാര്യവാഹനങ്ങള്‍ കടത്തിവിടണമെന്നായിരുന്നു ആവശ്യം. മന്ത്രിയോട് ഉത്തരവാദിത്തം ഏറ്റെടുക്കുമോ എന്ന് എസ്.പി ചോദിച്ചപ്പോള്‍ കൂടെയുണ്ടായിരുന്ന ബി.ജെ.പി നേതാവ് എ.എന്‍ രാധാകൃഷ്ണന്‍ ക്ഷുഭിതനാവുകയും ചെയ്തിരുന്നു.

യതീഷ് ചന്ദ്രയ്‌ക്കെതിരേ പൊന്‍ രാധാകൃഷ്ണന്‍ ലോക്‌സഭാ സ്പീക്കര്‍ സുമിത്രാ മഹാജന് അവകാശലംഘനത്തിന് നോട്ടീസ് നല്‍കിയിട്ടുണ്ട്. അത് നിയമപരമായി നിലനില്‍ക്കില്ലെന്നാണ് അറിയുന്നത്. അതിനെ തുടര്‍ന്നാണ് ബി.ജെ.പി സംസ്ഥാന നേതൃത്വം റിച്ചാഡ് ഹേ എം.പി വഴി പരാതി നല്‍കിയത്. എന്നാല്‍ പാര്‍ലമെന്ററി സമിതി യതീഷ് ചന്ദ്രയെ വിളിച്ചുവരുത്തി വിശദീകരണം തേടുമെന്നാണ് ബി.ജെ.പി സംസ്ഥാനനേതൃത്വം പറയുന്നത്. കഴിഞ്ഞ നവംബര്‍ 21നാണ് ശബരിമല ദര്‍ശനത്തിനായി എ.എന്‍ രാധാകൃഷ്ണന്‍ നിലയ്ക്കലിലെത്തിയത്. പ്രളയത്തില്‍ പമ്പ തകര്‍ന്ന് കിടക്കുന്നതിനാല്‍ സ്വകാര്യവാഹനങ്ങള്‍ കടത്തിവിടാനാകില്ലെന്നും മണ്ണിടിച്ചില്‍ അടക്കം ഉണ്ടാകുമെന്നും എസ്.പി പറഞ്ഞിട്ടും വാഹനം കടത്തിവിടണമെന്ന് മന്ത്രി ആവശ്യപ്പെട്ടപ്പോള്‍ ഉത്തരാവദിത്തം ഏറ്റെടുക്കാമെങ്കില്‍ കടത്തിവിടാമെന്ന് മറുപടി നല്‍കിയതാണ് വിവാദമായത്.

ദര്‍ശനം കഴിഞ്ഞ് മന്ത്രി തിരികെ എത്തിയപ്പോഴും വിവാദമുണ്ടായിരുന്നു. മന്ത്രിക്ക് പിന്നാലെ വന്ന സ്വകാര്യവാഹനങ്ങള്‍ എസ്.പി ഹരീഷ് തടഞ്ഞിരുന്നു. തുടര്‍ന്ന് മന്ത്രി തിരികെ വന്ന് വിശദീകരണം തേടി. അസമയത്ത് കണ്ട വണ്ടിയായതിനാലാണ് തടഞ്ഞതെന്ന് എസ്.പി അറിയിച്ചതോടെ മന്ത്രി മടങ്ങുകയായിരുന്നു. തുടര്‍ന്നാണ് മന്ത്രി പാര്‍ലമെന്റില്‍ അവകാശലംഘനത്തിന് നോട്ടീസ് നല്‍കിയത്. എന്നാല്‍ പാര്‍ലമെന്റ് ചുമതലപ്പെടുത്തിയ പരിപാടിക്ക് മന്ത്രി പങ്കെടുക്കുമ്പോള്‍ എന്തെങ്കിലും പ്രശ്‌നം ഉണ്ടായാലേ അവകാശലംഘനം ആകൂ എന്ന് ലോക്‌സഭാ സെക്രട്ടറിയായിരുന്ന പി.ഡി.ടി ആചാരി ഉള്‍പ്പെടെ ചൂണ്ടിക്കാട്ടുന്നു.