തിരുവനന്തപുരം: സ്ത്രീകളിലേയും കുട്ടികളിലേയും പോഷണക്കുറവ് പരിഹരിക്കാനായി നാഷണല്‍ ന്യൂട്രീഷ്യന്‍ അഥവാ പോഷണ്‍ അഭിയാന്റെ ഭാഗമായി സംസ്ഥാന വനിതാ ശിശുവികസന വകുപ്പ് കൊട്ടിഘോഷിച്ചു ആരംഭിച്ച സമ്പുഷ്ട കേരളം പദ്ധതി തുടങ്ങിയടത്തു തന്നെ നില്‍ക്കുന്നു.ഇക്കഴിഞ്ഞ ഒക്‌ടോബര്‍ 15 ന് ലോക ഭക്ഷ്യദിനത്തിലാണ് പോഷണ്‍ അഭിയാന്‍ പദ്ധതി ആരംഭിച്ചത്. പൊതുജനങ്ങളില്‍ വിളര്‍ച്ച ഒഴിവാക്കുക എന്ന ലക്ഷ്യത്തോടെയാണു പദ്ധതി ആരംഭിച്ചതെങ്കിലും ആരോഗ്യവകുപ്പിന്റെയും കേന്ദ്ര സര്‍ക്കാരിന്റെയും അനാസ്ഥമൂലം തുടര്‍നടപടികള്‍ ഇഴഞ്ഞു നീങ്ങുകയാണ്.

ഇന്ത്യയിലെ എല്ലാ അംഗന്‍വാടികളിലേയും അങ്കന്‍വാടി വര്‍ക്കര്‍മാര്‍ക്കും ഐ.സി.ഡി.എസ് സൂപ്പര്‍വൈസര്‍മാര്‍ക്കും സ്മാര്‍ട് ഫോണുകള്‍ ലഭ്യമാക്കുമെന്നായിരുന്നു വാഗ്ദാനം. ഗുണഭോക്താക്കളെ സംബന്ധിച്ച എല്ലാ വിവരണങ്ങളും ഫോണിലെ ആപ്ലിക്കേഷന്‍ വഴി വര്‍ക്കര്‍ നല്‍കേണ്ടതുണ്ട്. ഇത് പ്രാബല്യത്തില്‍ വരുന്നതോടെ അങ്കണവാടിയില്‍ ഇപ്പോള്‍ ഉപയോഗിക്കുന്ന 11 രജിസ്റ്ററുകളും നിര്‍ത്തലാക്കും. ജനനം മുതല്‍ ആറുവയസുവരെയുള്ള കുട്ടികളുടെ പ്രായത്തിന് അനുസരിച്ചുള്ള പൊക്കം ഇല്ലായ്മ തടയുകയും കുറയ്ക്കുകയും ചെയ്യുക, കുട്ടികളിലെ പോഷണക്കുറവ് (തൂക്കക്കുറവ്) തടയുകയും കുറയ്ക്കുകയും ചെയ്യുക, ആറുമാസം മുതല്‍ 59 മാസം വരെയുള്ള കുട്ടികളിലെ നിലവിലുള്ള വിളര്‍ച്ചാ നിരക്ക് കുറയ്ക്കുക, 15 വയസ്സ് മുതല്‍ 49 വയസുവരെയുള്ള സ്ത്രീകളിലും കൗമാരക്കുട്ടികളിലും ഉള്ള വിളര്‍ച്ചാ നിരക്ക് കുറയ്ക്കുക, ജനനതൂക്കക്കുറവ് പരിഹരിക്കുക എന്നീ ലക്ഷ്യങ്ങളോടെയാണ് സമ്പുഷ്ട കേരളം നടപ്പാക്കുന്നത്. ആദ്യഘട്ടത്തില്‍ വയനാട്, മലപ്പുറം, കണ്ണൂര്‍, കാസര്‍കോഡ് എന്നീ ജില്ലകളെയാണ് ഉള്‍പ്പെടുത്തിയിരിക്കുന്നത്. ഈ ജില്ലകളിലെ 8534 അങ്കണവാടികളാണ് ഗുണഭോക്താക്കള്‍.

പദ്ധതി നടപ്പാക്കാനുള്ള സംസ്ഥാന സര്‍ക്കാരിന്റെ താല്‍പര്യക്കുറപ്പമൂലം തുടര്‍ നടപടികള്‍ ഉണ്ടായില്ല. അതേസമയം മറ്റ് സംസ്ഥാനങ്ങള്‍ പദ്ധതി നടത്തിപ്പുമായി മുന്നോട്ടുപോകുന്നുമുണ്ട്. ആദിവാസി പിന്നാക്ക മേഖലകള്‍ക്ക് ഏറെ പ്രയോജനപ്രദമായ നടപിയുമായി മാര്‍ച്ചിനുള്ളില്‍ മുന്നോട്ടുപോയില്ലെങ്കില്‍ പദ്ധതിതന്നെ സംസ്ഥാനത്തിനു നഷ്ടമായേക്കും.